အီရန်နှင့် စစ်ဖြစ်မည်မဟုတ်ဟု ဆော်ဒီပြော

ဇန်န၀ါရီ ၈၊ ၂၀၁၅
M-Media

ဆော်ဒီကာကွယ်ရေးဝန်ကြီး မိုဟာမက် ဘင် ဆလ်မန်

– နှစ်နိုင်ငံ တင်းမာမှုများ မြင့်တက်နေသော်လည်း မိမိတို့မှာ အီရန်နှင့် စစ်မက်ဖြစ်ပွားမည်မဟုတ်ဘဲ မိမိတို့နှစ်နိုင်ငံကို စစ်ဖြစ်စေရန် တွန်းပို့နေသူများမှာ စိတ်သဘောထား မမှန်သူများသာဖြစ်သည်ဟု ဆော်ဒီအာရေဗျ ကာကွယ်ရေးဝန်ကြီး မိုဟာမက် ဘင် ဆလ်မန်က ပြောကြားလိုက်သည်။

“ဆော်ဒီနဲ့ အီရန်အကြား စစ်ဖြစ်တာဟာ ဒေသတွင်းမှာ ကပ်ဆိုးကြီးကို အစပျိုးလိုက်တာပါပဲ။ ပြီးတော့ ကျန်ရှိနေတဲ့ ကမ္ဘာတစ်ဝှမ်းလုံးကိုလည်း ပြင်းပြင်းထန်ထန် ရိုက်ခတ်သွားပါလိမ့်မယ်။ သေချာတာကတော့ ကျွန်တော်တို့ ဒီလိုမျိုး အဖြစ်မခံပါဘူး” ဟု ဆလ်မန်က The Economist နှင့် အင်တာဗျူးတွင် ပြောကြားခဲ့ခြင်းဖြစ်သည်။

ရှီအာဘာသာရေခေါင်းဆောင်အား ဆော်ဒီက ကွပ်မျက်မှုနှင့်ပတ်သက်၍ အီရန်တွင် ဖြစ်ပွားခဲ့သော ဆန္ဒပြမှုများအတွင်း ဆန္ဒပြသူများမှာ ဆော်ဒီသံရုံးကို တိုက်ခိုက်ခဲ့ပြီး၊ ထိုအဖြစ်အပျက်ကြောင့် ဆော်ဒီက အီရန်နှင့် သံတမန် အဆက်အသွယ် ဖြတ်တောက်ခဲ့သည်။ ဆော်ဒီ၏ ထိုလုပ်ရပ်ကြောင့် ကမ္ဘာ့နိုင်ငံများက စိုးရိမ်မိကြောင်း ပြောကြားခဲ့ကြသည်။

ထိုကဲ့သို့ တင်းမာမှုများက စစ်ရေးပဋိပက္ခအသွင် ဆောင်သွားတော့မည်ဆိုသည့် ဖော်ပြမှုများလည်း ရှိခဲ့သည်။ သို့သော်လည်း ဆော်ဒီကာကွယ်ရေးဝန်ကြီးက ထိုကဲ့သို့ ဖြစ်မည်မဟုတ်ဟု ဆိုသည်။

“(စစ်ဖြစ်ပွားဖို့ဆိုတာဟာ) ကျွန်တော်တို့ လုံးဝ မစဉ်းစားတဲ့အရာပါ။ ဒါမျိုးဖြစ်လာဖို့ တွန်းပို့နေတဲ့သူတွေဟာ စိတ်ထားမမှန်သူတွေပါပဲ” ဟု ဆလ်မန်က ထည့်သွင်းပြောကြားခဲ့သည်။

ဆွေးနွေးရန် အဆင်သင့်ရှိနေ

အီရန်သမ္မတ ဟာဆန်ရူဟာနီကလည်း ဆော်ဒီနှင့် သံတမန်ရေးရာတင်းမာမှု လျော့ပါးရေးအတွက် ဆွေးနွေးရန် အဆင်သင့်ရှိနေသည်ဟု ဗုဒ္ဓဟူးနေ့က ပြောကြားခဲ့သည်။

“ကျွန်တော်တို့ဟာ ဒေသတွင်းက နိုင်ငံအားလုံးနဲ့ ရင်းနှီးချစ်ခင်မှု၊ ညီရင်းအကိုဖြစ်မှုနဲ့ ကောင်းမွန်တဲ့ဆက်ဆံရေးကို လိုချင်ပါတယ်” ဟု ရူဟာနီက ဆိုသည်။ ထို့ပြင် ဆော်ဒီအနေဖြင့် သံတမန်ဆက်ဆံရေး ဖြတ်တောက်မှုကို ပြန်စဉ်းစားရန်အတွက် ဆော်သြခဲ့ပြီး IS အား ဘုံရန်သူအဖြစ် သဘောထားကာ တိုက်ခိုက်မှုတွင် အပြုသဘောဆောင်သည့် ကူညီမှုများကို ပေးရန်အတွက်လည်း တိုက်တွန်းခဲ့သည်။

ရူဟာနီမှာ တီဟီရန်ရှိ ဆော်ဒီသံရုံးအား တိုက်ခိုက်မှုတွင် ပါဝင်သူများကို ဖမ်းဆီး၊ အရေးယူ၊ အပြစ်ပေးရန် အတွက်လည်း တရားရေးဌာနကို အမိန့်ပေးထားသည်။

“တိုက်ခိုက်တဲ့သူတွေဟာ ရာဇ၀တ်ကောင်တွေဖြစ်ပြီး သူတို့ရဲ့ တရားမဲ့တဲ့ ဒီလုပ်ရပ်၊ အစ္စလာမ့်ရဲ့ သွန်သင်မှုနဲ့ မကိုက်ညီတဲ့ ဒီလုပ်ရပ်ဟာ အီရန်ရဲ့ နိုင်ငံတကာ ဂုဏ်သိက္ခာကို ထိခိုက်စေပါတယ်” ဟူ ရူဟာနီက ထည့်သွင်းပြောကြားခဲ့သည်။

Ref: RT, IINA