ရာသီဥတုပြောင်းလဲမှုကို ထောက်လှမ်းနိုင်မည့် ဂြိုဟ်တုတစ်ခုကို နာဆာလွှတ်တင်

ဇန်န၀ါရီ ၁၈၊ ၂၀၁၆
M-Media

– ကမ္ဘာကြီးပူနွေးမှု မြင့်တက်လာခြင်းနှင့် နောက်ဆက်တွဲ ရာသီဥတုဆိုင်ရာ ပြဿနာများအား စောင့်ကြည့်ရန်အတွက် ဂြိုဟ်တုအသစ်တစ်ခုကို နာဆာက လွှတ်တင်လိုက်သည်ဟု သိရသည်။

Jason-3 ဟုအမည်ပေးထားသည့် ဂြိုဟ်တုဖြစ်ပြီး SpaceX Falcon 9 ဒုံးပျံဖြင့် အမေရိကန်ပြည်ထောင်စု ကယ်လီဖိုးနီးယားရှိ Vandenberg အာကာသစခန်းမှ ယမန်နေ့တွင် လွှတ်တင်ခဲ့ခြင်းဖြစ်သည်။ ကန်ဒေါ်လာ သန်း ၁၈၀ တန်ဖိုးရှိသည့် အဆိုပါ ဂြိုဟ်တုမှာ ကမ္ဘာမြေမှ ကီလိုမီတာ ၁၃၀၀ အကွာအဝေးတွင် လည်ပတ်ကာ ရာသီဥတု ပြောင်းလဲမှုနှင့် ကမ္ဘာကြီး ပူနွေးလာမှုတွင် သမုဒ္ဒရာ၏ အခန်းကဏ္ဍနှင့် သက်ဆိုင်သည့် အချက်အလက်များကို စောင့်ကြည့်ပေးပို့သွားမည်ဖြစ်သည်။

ကမ္ဘာကြီးပူနွေးလာမှုကြောင့် ရေခဲပြင်များနှင့် ရေခဲတောင်များမှာ အရည်ပျော်ကြကာ ပင်လယ်ရေမျက်နှာပြင်များကို မြင့်တက်စေပြီး ရေရှည် စောင့်ကြည့်တိုင်းတာရန် လိုအပ်နေသည်။

Jason-3 ဂြိုဟ်တုမှာ တစ်စက္ကန့်ကို ၆ ကီလိုမီတာနှုန်းဖြင့် သွားနိုင်ပြီး ၁၀ ရက်ကြာတိုင်း ကမ္ဘာကြီး၏ နေရာတိုင်း၏ အချက်လက်အလက်များကို ပေးပို့နိုင်မည်ဖြစ်သည်။ ထိုဂြိုဟ်တုမှာ အယ်နီညိုအခြေအနေကိုလည်း စောင့်ကြည့်နိုင်မည်ဖြစ်သည်။

Ref : Aljazeera