ထိုင်းနိုင်ငံတွင် မားစ်ရောဂါကူးစက်နေသူအား ဒုတိယအကြိမ်တွေ့ရှိ

ဇန်န၀ါရီ ၂၅၊ ၂၀၁၆
M-Media

– နိုင်ငံအတွင်း မားစ် (MERS) ရောဂါ ဖြစ်ပွားမှုကို ဒုတိယအကြိမ်မြောက် တွေ့ခဲ့ရတယ်လို့ ထိုင်းနိုင်ငံ ပြည်သူ့ကျန်းမာရေးဝန်ကြီးဌာနက ယမန်နေ့မှာ သတင်းထုတ်ပြန်လိုက်ပါတယ်။

ဘန်ကောက်ကိုခရီးထွက်လာတဲ့ အိုမန်လူမျိုး အသက် ၇၁ နှစ်အရွယ် အဘိုးအိုတစ်ဦးမှာ အဲဒီရောဂါကို တွေ့ခဲ့ရတာဖြစ်တယ်လို့ ၀န်ကြီး ပီယာဆာခို ဆာခိုဆတ္တရာဒွန်က သတင်းစာရှင်းလင်းပွဲမှာ ပြောကြားခဲ့ပါတယ်။

“ဟိုတယ်သွားဖို့ တက္ကစီငှားပြီးတဲ့နောက်မှာ ဆေးရုံခေါ်သွားပြီး သူ့ကို ဗိုင်းရပ်ပိုးရှိ၊ မရှိ စစ်ဆေးကြည့်လိုက်တဲ့အခါမှာ မားစ် ဗိုင်းရပ်ပိုးကို တွေ့ရှိခဲ့တာ ဖြစ်ပါတယ်။ ဒီရောဂါကို အချိန်မီတွေ့ရှိခဲ့တာဖြစ်လို့ ပြည်သူတွေအနေနဲ့ ဘာမှကြောက်စရာမရှိပါဘူး” လို့ ၀န်ကြီးက ပြောခဲ့ပါတယ်။

အဲဒီအဘိုးအိုနဲ့အတူ ပါလာတဲ့ သားဖြစ်သူအပါအ၀င် အခြားသော ၃၇ ယောက်လောက်ကိုလည်း ဗိုင်းရပ်စ်ရှိ၊ မရှိ ထိုင်းနိုင်ငံက စောင့်ကြည့်နေပါတယ်။ ထိုင်းနိုင်ငံရဲ့ ပထမဆုံး မားစ်ရောဂါကို ပြီးခဲ့တဲ့နှစ်က အိုမန်နိုင်ငံမှ ရောက်လာတဲ့ စီးပွားရေးလုပ်ငန်းရှင်တစ်ဦးမှာ တွေ့ရှိခဲ့တာပါ။

မားစ်ရောဂါဟာ ၂၀၀၃ ခုနှစ်အတွင်း တရုတ်ပြည်မှာ အသေအပျောက်များစေခဲ့တဲ့ ပြင်းထန်သောအသက်ရှုလမ်းကြောင်းရောဂါ (SARS) ကိုဖြစ်စေတဲ့ ကော်ရိုနာဗိုင်းရပ်စ်မျိုးနွယ်ဝင်မှတဆင့် ဖြစ်ပွားစေတာမျိုးပဲ ဖြစ်ပါတယ်။

မားစ်ရောဂါကို ၂၀၁၂ ခုနှစ်က ဆော်ဒီအာရေးဗီးယားမှာ ပထမဆုံး တွေ့ရှိခဲ့ခြင်းဖြစ်ပါတယ်။ ရောဂါအများစုဟာအရှေ့အလယ်ပိုင်း ဒေသတွေမှာ အဖြစ်များကြပါတယ်။

Ref: Reuters