ဗလင်စီယာကို စာနာမိသည်ဟု ဘာကာနည်းပြပြော

ဖေဖော်ဝါရီ ၄၊ ၂၀၁၆
M-Media

– မိမိတို့နှင့် တွေ့ဆုံခဲ့သည့် ဗလင်စီယာအသင်း၏ ကံကြမ္မာအတွက် ၀မ်းနည်းမိပြီး အခက်အခဲများနှင့် ရင်ဆိုင်နေရသော နည်းပြ ဂယ်ရီ နဗီးလ်ကိုလည်း စာနာမိသည်ဟု ဘာကာနည်းပြ လူးဝစ်အန်းရစ်က ပြောကြားလိုက်သည်။

စပိန်ဘုရင့်ဖလား ဆီမီးဖိုင်နယ် ပထမအကျော့အဖြစ် ယမန်နေ့က ကစားခဲ့သည့် ဘာစီလိုနာနှင့် ဗလင်စီယာတို့ပွဲတွင် ဘာကာက ၇ ဂိုးပြတ်ဖြင့် အနိုင်ရရှိခဲ့ပြီး ဆွာရက်ဇ်က ၄ ဂိုးနှင့် မက်ဆီက ဟက်ထရစ် အသီးသီး သွင်းယူခဲ့ကြသည်။ ဗလင်စီယာအသင်းအား နည်းပြအဖြစ် တာဝန်ယူခဲ့သည့် မန်ယူကစားသမားဟောင်း ဂယ်ရီ နဗီးလ်မှာ ၁၄ ပွဲ ကိုင်တွယ်ပြီးချိန်တွင် ၄ ပွဲသာ အနိုင်ရရှိအောင် စွမ်းဆောင်ထားနိုင်သည်။

“ဗလင်စီယာဟာ တော်တော်လေးဆိုးရွားတဲ့ အခြေအနေကို ဖြတ်သန်းနေရပါတယ်။ ကျွန်တော်တို့လိုအသင်းမျိုးကို ယှဉ်ဖို့ဆိုတာ သိပ်မလွယ်ပါဘူး။ ဗလင်စီယာရဲ့ အခြေအနေကလည်း ကျေနပ်လောက်စရာ မဟုတ်ပါဘူး။ ပြိုင်ဘက်တွေ ဒီလိုအခြေအနေမျိုး ဖြစ်နေတာကို ကျွန်တော် မကြည့်ချင်ပါဘူး။ ကျွန်တော်တို့ဟာ ကိုယ့်အလုပ်ကိုယ် လုပ်နေကြတာပါ” ဟု အန်းရစ်က ပွဲအပြီးတွင် ပြောကြားခဲ့သည်။

ထို့ပြင် ဗလင်စီယာမှာ ထိုအခြေအနေမှ ရုန်းထွက်နိုင်လိမ့်မည်ဟု မျှော်လင့်ကြောင်း ထည့်သွင်းပြောကြားခဲ့သည်။ အသင်း၏ ရလဒ်များ ဆိုးရွားနေသော်လည်း ဂယ်ရီ နဗီးလ်ကမူ မိမိမှာ အသင်းမှ နှုတ်ထွက်မည်မဟုတ်ဟု ပြောကြားခဲ့သည်။

Ref: Goal