Facebook ၏ အခမဲ့ဝန်ဆောင်မှုများကို အိန္ဒိယ ပိတ်ပင်

ဖေဖော်ဝါရီ ၉၊ ၂၀၁၆
M-Media

– အိန္ဒိယရှိ ဆင်းရဲသောပြည်သူများ အခမဲ့ အသုံးပြုနိုင်ရေးအတွက် Facebook မှ စီစဉ်ပေးထားသည့် ၀န်ဆောင်မှုများနှင့် ၀ဘ်ဆိုက်များကို အိန္ဒိယအာဏာပိုင်များက ပိတ်ပစ်လိုက်သည်ဟု သိရသည်။

အိန္ဒိယစည်းကမ်းထိန်းသိမ်းရေး အာဏာပိုင်အဖွဲ့က ယမန်နေ့က ပိတ်ပင်လိုက်ခြင်းဖြစ်ပြီး ဆက်သွယ်ရေး အော်ပရေတာများအကြား သာတူညီမျှဖြစ်ရေး စည်းမျဉ်းစည်းကမ်းများကြောင့် ဖြစ်သည်ဟု ပြောကြားခဲ့သည်။ ထိုသို့ ဆောင်ရွက်လိုက်ခြင်းက ကမ္ဘာတစ်ဝှမ်းရှိ လူသန်းထောင်နှင့်ချီအား အခမဲ့ အင်တာနက်အသုံးပြုခွင့် ရရှိရေးအတွက် ဆောင်ရွက်နေသည့် Facebook ပိုင်ရှင် မာ့ခ်ဇူကာဘာ့ဂ်အတွက် အဓိကထိုးနှက်ချက် ဖြစ်ခဲ့သည်။

ဇူကာဘာ့ဂ်၏ အခမဲ့ အင်တာနက်အစီအစဉ်တွင် အိန္ဒိယနိုင်ငံလည်း ပါဝင်ပြီး အိန္ဒိယရှိ ဆက်သွယ်ရေးကုမ္ပဏီများကမူ ထိုအစီအစဉ်အား ပြင်းပြင်းထန်ထန် ဝေဖန်မှုများ ပြုလုပ်ခဲ့ကာ အိန္ဒိယအစိုးရကိုလည်း ဖိအားပေးခဲ့သည်။

ယခုပိတ်ပင်လိုက်သည့် ၀န်ဆောင်မှုမှာ Free Basics ဟု ခေါ်ဆိုပြီး ထိုစနစ်အရ အင်တာနက်စာမျက်နှာအချို့ကို အခမဲ့ အသုံးပြုနိုင်မည်ဖြစ်ပြီး အချို့သော ဒေတာများ Download ဆွဲရာတွင်လည်း ငွေကြေးကုန်ကျမည်မဟုတ်ပေ။

ဝေဖန်သူများကမူ Free Basics အစီအစဉ်မှာ အင်တာနက်အသုံးပြုသူများက Facebook နှင့် ၎င်းတို့မိတ်ဖက်များ၏ ၀န်ဆောင်မှုများကိုသာ အသုံးပြုစေရန် လမ်းကြောင်းပေးသကဲ့သို့ ဖြစ်နေပြီး အခြားသော အင်တာနက်ဝန်ဆောင်မှုကုမ္ပဏီများကို ထိခိုက်စေသည်ဟု ပြောကြားခဲ့သည်။

Ref: Aljazeera