စင်ကာပူမွတ်စလင်များ ဟဂ်ျဘုရားဖူးခွဲတမ်း ပိုမိုရရှိရန် ၀န်ကြီးချုပ်က ဆော်ဒီသို့ စာပို့တောင်းဆို

ဖေဖော်ဝါရီ ၁၂၊ ၂၀၁၆
M-Media

– လာမည့်ဟဂ်ျရာသီတွင် စင်ကာပူနိုင်ငံမှ အစ္စလာမ်ဘာသာဝင်များ ဟဂ်ျခွဲတမ်း ပိုမိုရရှိရေးအတွက် စင်ကာပူဝန်ကြီးချုပ် လီရှန်လွန်းက ဆော်ဒီဘုရင် ဆလ်မန် ဘင် အဘ်ဒူလ် အဇစ် အလ် ဆာအွဒ်ထံ စာရေးတောင်းဆိုလိုက်သည်ဟု သိရသည်။

အဆိုပါစာကို စင်ကာပူ ဆက်သွယ်ရေးနှင့် သတင်းအချက်အလက်ဝန်ကြီးဖြစ်ပြီး အစ္စလာမ့်ရေးရာ ကိစ္စများကို တာဝန်ယူထားသူ ယာကွဘ်အီဘရာဟင်က ဆော်ဒီ ဟဂ်ျရေးရာဝန်ကြီး ဒေါက်တာ ဘန်ဒါ မိုဟာမက် ဟဂ်ျဂျာရ်ကို ယမန်နေ့တွေ့ဆုံမှုအတွင်း ပေးအပ်ခဲ့ခြင်းဖြစ်သည်။

လက်ရှိအချိန်တွက် စင်ကာပူနိုင်ငံအတွက် ဟဂျက်ခွဲတမ်းမှာ ၆၈၀ ဖြစ်ပြီး ၀န်ကြီးချုပ်က ၈၀၀ အထိ တိုးမြှင့်တောင်းဆိုခဲ့ခြင်းဖြစ်သည်။ ဟဂ်ျခွဲတမ်းကို အိုအိုင်စီအဖွဲ့၏ ၁၉၈၇ ခုနှစ် ညီလာခံတွင် ဆုံးဖြတ်ခဲ့ခြင်းဖြစ်ကာ စင်ကာပူအတွက် ပေးထားသည့် ခွဲတမ်းမှာ ထိုအချိန်က နိုင်ငံအတွင်းရှိ အစ္စလာမ်ဘာသာဝင်ဦးရေ၏ ၀.၁ ရာခိုင်နှုန်း ပမာဏ ဖြစ်သည်ဟု ထိုစာတွင် ရေးသားထားသည်။

လီရှန်လွန်းကမူ ထိုအချိန်မှစ၍ စင်ကာပူနိုင်ငံရှိ အစ္စလာမ်ဘာသာဝင်လူဦးရေမှာ ၂၀ ရာခိုင်နှုန်း တိုးလာခဲ့ပြီး ယခုအချိန်တွင် နိုင်ငံလူဦးရေ ၅.၅၄ သန်းတွင် အစ္စလာမ်ဘာသာကို သက်ဝင်ယုံကြည်သူ ၈ သိန်းခန့် ရှိနေပြီဟု ဆိုသည်။

သို့သော်လည်း ဆော်ဒီ၏ ဟဂ်ျခွဲတမ်းက မပြောင်းလဲသောကြောင့် OIC ၏ ခွဲတမ်းဖော်မြူလာအတိုင်း တိုးမြှင့်ပေးရန် တောင်းဆိုခြင်းဖြစ်သည်ဟု ၀န်ကြီးချုပ်က ဖော်ပြထားသည်။ ထိုကဲ့သို့ ခွဲတမ်းတိုးမြှင့်ပေးခြင်းအပြင် ယခုနှစ် ဟဂ်ျရာသီတွင် နောက်ထပ် လူ ၂၀၀ ကို သီးသန့်ထပ်မံခွင့်ပြုရန်လည်း ဆော်ဒီဘုရင်အား လီက ပုဂ္ဂိုလ်ရေးအရ မေတ္တာရပ်ခံခဲ့သည်။

“ဒီလို သီးသန့်ထပ်မံခွင့်ပြုတာကို စင်ကာပူမွတ်စလင်လူ့အဖွဲ့အစည်းက ကြိုဆိုကြမှာဖြစ်ပြီး တော်တော်လေးလည်း ပီတိဖြစ်ကြပါလိ့မ်မယ်” ဟု လီရှန်လွန်းက ထိုစာတွင် ရေးသားဖော်ပြခဲ့သည်။

ယာကွဘ်မှာ ဆော်ဒီအာရေဗျတွင် ဖေဖော်ဝါရီ ၁၀ ရက်နေ့မှ ၁၂ ရက်နေ့အထိ ပြုလုပ်သည့် နှစ်ပတ်လည် ဟဂ်ျဝန်ကြီးများအစည်းဝေး၌ စင်ကာပူကိုယ်စားလှယ်အဖွဲ့ကို ခေါင်းဆောင်ကာ တက်ရောက်နေသည်။

Ref: themalaysianinsider