အန်ဂိုလာတွင် အဖျားရောဂါတစ်မျိုး လျင်မြန်စွာပြန့်နှံ့

ဖေဖော်ဝါရီ ၁၇၊ ၂၀၁၆
M-Media

– အာဖရိကတောင်ပိုင်း အန်ဂိုလာနိုင်ငံမှာ အ၀ါရောင် အဖျား (Yellow Fever) လို့ခေါ်တဲ့ ကူးစက်ရောဂါတစ်ခု ပြီးခဲ့တဲ့ သီတင်းပတ်တွေအတွင်း ပြန့်နှံ့ဖြစ်ပွားခဲ့တာကြောင့် ၅၁ ဦး သေဆုံးခဲ့တယ်လို အစိုးရက တရားဝင်ထုတ်ပြန်တဲ့ စာရင်းဇယားတွေအရ သိရပြီး ဒါဟာ နှစ်ပေါင်း ၃၀ အတွင်း ပထမဆုံး ပြန်လည် ဖြစ်ပွားခဲ့တာဖြစ်ပါတယ်။

အခုအချိန်မှာ ကူးစက်နေသူ ၂၄၁ ဦး ရှိတယ်လို့ အန်ဂိုလာ အမျိုးသား ပြည်သူ့ကျန်းမာရေးဒါရိုက်တာဖြစ်သူ Adelaide de Carvalho က ပြောဆိုခဲ့ပြီး လူဦးရေ ၁.၆ သန်းနီးပါးရှိတဲ့ မြို့တော်မှာ လူဦးရေ လေးသိန်းခွဲကျော်ကို ကာကွယ်ဆေးထိုးပေးထားပါတယ်လို့ ဆိုပါတယ်။

Yellow Fever အဓိကပြန့်ပွားတဲ့ ဗဟိုချက်ဟာ မြို့တော်လူယန်ဒါရဲ့ အရှေ့ဘက် ဗီယင်နာကျွန်းမှာ ဖြစ်ပြီး ရက်သတ္တပတ် ၆ ပတ်အတွင်း၂၉ ဦးသေဆုံးခဲ့ကာ ရောဂါဖြစ်ပွားမှု ၉၂ ခုလောက် တွေ့ခဲ့ရပါတယ်။

ခြင်တွေကတဆင့် ကူးစက်တဲ့ သွေးလွန်တုပ်ကွေးလိုမျိုး ဒီရောဂါကို သီးခြားကုသနိုင်တဲ့ ဆေးဝါး မရှိသေးပါဘူး။ ၎င်းရောဂါအမျိုးအစားကို အာဖရိကနဲ့ လက်တင်အမေရိက အမေဇုံသစ်တောရဲ့ အပူပိုင်းဒေသတွေမှာ အတွေ့ရများပါတယ်။

ရောဂါလက္ခဏာတွေကတော့ အပြင်းအထန်ခေါင်းကိုက်ခြင်း၊ အော့အန်ခြင်း၊ ခေါင်းမူးခြင်း၊ ညောင်းညာကိုက်ခဲခြင်းတို့ဖြစ်တယ်လို့ ကမ္ဘာ့ကျန်းမာရေးအဖွဲ့က ပြောပါတယ်။ ဒီရောဂါပိုးဟာ အချို့လူတွေမှာ အတွင်းအင်္ဂါတွေ အလုပ်မလုပ်တော့တာတို့၊ သေဆုံးစေတာတို့ ဖြစ်စေပါတယ်။

သန့်ရှင်းမှုမရှိတဲ့အနေအထားဟာ ခြင်တွေပေါက်ပွားဖို့အတွက် အထောက်အကူပေးပြီး ရောဂါပျံ့နှံ့မှုကို ပိုဆိုးစေပါတယ်။ အန်ဂိုလာကတော့ ဒီ Yellow Fever အတွက် ကာကွယ်ဆေးရနိုင်တဲ့ အာဖရိကက ဒေသအတွင်းမှာ ပါဝင်တာဖြစ်ပါတယ်။

Ref; Al jazeera