နေးမာမှာ မက်ဆီ၏ အမွေစားအမွေခံဖြစ်မည်ဟု ဘရာဇီးလ်ဂန္တ၀င် ရော်နယ်ဒိုပြော

ဖေဖော်ဝါရီ ၂၀၊ ၂၀၁၆
M-Media

– ဘာစီလိုနာတိုက်စစ်မှူး နေးမာမှာ မက်ဆီ၏ အမွေစားအမွေခံ ဖြစ်လိမ့်မည်ဟု ဘရာဇီး ဂန္တ၀င်ကစားသမား ရော်နယ်ဒိုက ပြောကြားလိုက်သည်။

အသက် ၂၄ နှစ်အရွယ် နေးမာမှာ ၂၀၁၃ ခုနှစ်က ဆန်းတို့စ်မှ ဘာစီလိုနာသို့ ရောက်ရှိခဲ့ပြီးနောက် ဥရောပတွင် အငြင်းပွားဖွယ်မရှိသော ထိပ်တန်းကစားသမားတစ်ဦး ဖြစ်လာခဲ့သည်။ ထို့ပြင် ၂၀၁၅ ခုနှစ် ကမ္ဘာ့အကောင်းဆုံး ဘောလုံးသမားဆု Ballon d’Or ၏ ဇကာတင်စာရင်းတွင် မက်ဆီ၊ ရော်နယ်ဒိုတို့နှင့်အတူ ပါဝင်နိုင်ခဲ့သည်။ တစ်နိုင်ငံတည်းသား ရော်နယ်ဒိုကမူ နေးမာအား ချီးကျူးခဲ့သည်။

“ကျွန်တော် နေးမာကို တော်တော်လေးကြိုက်ပါတယ်။ ပထမပိုင်းမှာ ပတ်ဝန်းကျင်အသစ်နဲ့ အသားကျဖို့ သူ နည်းနည်းတော့ ခက်ခဲခဲ့ပါတယ်။ ဒါပေမယ့် သူ အောင်မြင်လာတော့မယ်ဆိုတာ ကျွန်တော်သိပါတယ်။ မက်ဆီရဲ့ အမွေအစားအမွေခံဖြစ်မလားဆိုရင်တော့ – ဟုတ်ပါတယ်။ သူဖြစ်လာမှာပါ။ မက်ဆီလို ပြောစရာမရှိတဲ့ ကစားသမားတစ်ယောက်ဖြစ်ဖို့ လိုအပ်တာအားလုံး သူ့မှာ ရှိနေပါတယ်” ဟု ရော်နယ်ဒိုက ပြောကြားခဲ့သည်။

ထို့ပြင် တစ်ချိန်က ရီးယဲလ်အသင်းဖော်ဖြစ်ခဲ့သည့် ဇီဒိန်းမှာ ရီးယဲလ်အား ချန်ပီယံလိဂ် အောင်ပွဲသို့ ခေါ်ဆောင်နိုင်မည်ဟု ယုံကြည်ကြောင်း ၎င်းက ထပ်လောင်းပြောကြားခဲ့သည်။

Ref: Goal