ဇီကာဗိုင်းရပ်စ်မှာ အခြားဗိုင်းရပ်စ်များထက် အန္တရာယ်ပိုရှိဟု WHO ပြော

ဖေဖော်ဝါရီ ၂၆၊ ၂၀၁၆
M-Media

– မကြာသေးခင်က ပေါ်ပေါက်လာခဲ့တဲ့ ကူးစက်ဗိုင်းရပ်စ်တွေထက် အခု ခြင်ကပေါက်ဖွားတဲ့ ဇီကာဗိုင်းရပ်စ်က အန္တရာယ်ပိုကြီးတယ်လို့ ကမ္ဘာ့ကျန်းမာရေးအဖွဲ့ချုပ် (WHO) က ပြောဆိုလိုက်ပြီး ဇီကာ ကူးစက်မှုဟာလည်း ပိုဆိုးလာနိုင်တယ်လို့ သတိပေးခဲ့ပါတယ်။

WHO အကြီးအကဲ မာဂရတ် ချန်က ယခုဗိုင်းရပ်စ်ဟာ တကယ့်ကို ရင်ဆိုင်ဖို့ခက်ခဲတဲ့ စိန်ခေါ်မှုတစ်ရပ်ဖြစ်ပြီး နှိမ်နင်းဖို့လည်း ခက်ခဲနိုင်တဲ့အတွက် တစ်ကမ္ဘာလုံးအနေနဲ့ ကြိုတင်ပြင်ဆင်ထားဖို့လိုအပ်တယ်လို့ ပြောပါတယ်။

“တကယ့်ကို လှည့်ကွက်များတဲ့ ဗိုင်းရပ်စ်နဲ့ ကျွန်မတို့ ပက်သက်နေရတာပါ။ မသေချာမှုတွေလည်း အပြည့်ပါပဲ။ ဒါ့ကြောင့် မမျှော်လင့်တာတွေ ဖြစ်လာနိုင်တဲ့အတွက် ကြိုတင်ပြင်ဆင်ထားဖို့ လိုပါတယ်” ဟု ဇီကာပျံ့နှံ့ရာ ရင်းမြစ်ဖြစ်တဲ့ ဘရာဇီးလ်သို့ အချက်အလက်ရှာဖွေရေးခရီးစဉ်အဖြစ် သွားရောက်ပြီးတဲ့နောက် ရီယိုဒီဂျနေးမြို့မှာ ချန်က အခုလို ပြောကြားခဲ့တာဖြစ်ပါတယ်။

ဇီကာဗိုင်းရပ်စ်ကို တုံ့ပြန်မှုဟာ ပိုမကောင်းလာခင်မှာ ပိုဆိုးရွားသွားနိုင်တယ်လို့လည်း ချန်က သတိပေးခဲ့ပြီး ဇီကာကူးစက်မှုရှိနေကြောင်း သတင်းပေးပို့တဲ့နိုင်ငံတွေဟာ ၄၆ နိုင်ငံအထိ ရှိလာခဲ့ပြီလို့ သူမက ထည့်သွင်းပြောကြားခဲ့ပါတယ်။

ဇီကာဗိုင်းရပ်စ်ကို သယ်ဆောင်နိုင်တဲ့ aegypti ခြင်မျိုးဟာ နိုင်ငံပေါင်း ၁၃၀ လောက်မှာ ရှိတဲ့အတွက် ဗိုင်းရပ်စ်ပြန့်နှံ့မှုဟာ ပိုမို ဆိုးရွားနိုင်တဲ့အနေအထား ရှိနေပါတယ်။ ဗိုင်းရပ်စ်ကူးစက်ခံရတဲ့ ကိုယ်ဝန်ဆောင်အမျိုးသမီးတွေရဲ့ မွေးလာတဲ့ကလေးတွေမှာ ဦးခေါင်းသေးတဲ့ချို့ယွင်းချက် ပါလာနိုင်ပြီး မှတ်ဉာဏ်ကို ထိခိုက်စေနိုင်ပါတယ်။

လောလောဆယ်မှာတော့ ခြင်အကိုက်မခံရုံမှတစ်ပါး ဇီကာအတွက် ကုသနိုင်တဲ့ဆေး လုံးဝမရှိသေးပါဘူး။ ၎င်းဗိုင်းရပ်စ်ဟာ လက်တင်အမေရိက နိုင်ငံ ၂၀ ကျော်မှာ ပျံ့နှံ့ခဲ့ပြီး ဘရာဇီးကတော့ အဆိုးဆုံးပဲ ဖြစ်ပါတယ်။ ဘရာဇီးကျန်းမာရေးဌာနက ဦးခေါင်းသေးချို့ယွင်းချက်ပါလာတဲ့ ကလေး ၅၈၃ ယောက် ရှိပြီလို့ အတည်ပြုခဲ့ပါတယ်။ မွေးရာပါချို့ယွင်းမှုကြောင့် ခန့်မှန်းခြေ ကလေး ၁၂၀ ခန့် သေဆုံးခဲ့ပြီးဖြစ်တယ်လို့လည်း ကျန်းမာရေးဝန်ကြီးဌာနက ပြောပါတယ်။

ချန်က ဇီကာနဲ့ မွေးရာပါ ဦးခေါင်းသေးရောဂါတို့အကြား ဆက်စပ်မှုဟာ အခိုင်အမာရှိနေတယ်လို့ မပြောနိုင်ပေမယ့် ကြီးကြီးမားမား သံသယရှိနေပြီလို့ ဆိုပါတယ်။

Ref: Press TV