အိန္ဒိယတွင် အမျိုးသားတစ်ဦးက မိသားစုဝင် ၁၄ ဦးကို သတ်ဖြတ်

ဖေဖော်ဝါရီ ၂၈၊ ၂၀၁၆
M-Media

– အိန္ဒိယနိုင်ငံရှိ အမျိုးသားတစ်ဦးမှာ ကလေးငယ် ၇ ဦးအပါအ၀င် ၎င်း၏ မိသားစုဝင် ၁၄ ဦးကို သတ်ဖြတ်ကာ ၎င်းကိုယ်တိုင်လည်း မိမိကိုယ်ကို သတ်သေသွားခဲ့သည်ဟု သိရသည်။

မွမ်ဘိုင်းမြို့မှ ၃၂ ကီလိုမီတာအကွာတွင်ရှိသည့် သိန်းမြို့တွင် စနေနေ့ညပိုင်းက ဖြစ်ပွားခဲ့ခြင်းဖြစ်ပြီ မိသားစုဝင်များ၏ တွေ့ဆုံပွဲတစ်ခုတွင် ထိုကဲ့သို့ သတ်ဖြတ်ခဲ့ခြင်းဖြစ်သည်။

“လူသတ်သမားဖြစ်တဲ့ ဟက်စ်နင် အန်ဝါရ် ၀ါရီကာဟာ သူ့ရဲ့ မိဘတွေအပါအ၀င် မိသားစုဝင်အားလုံးကို သတ်ဖြတ်ပြီးနောက်ပိုင်း သူ့ကိုယ်သူ ကြိုးဆွဲချ သေခဲ့ပါတယ်” ဟု ရဲတပ်ဖွဲ့ ပြောရေးဆိုခွင့်ရှိသူ ဂါဂျာနန် လက်စ်မန် ကဘ်ဒူလီက ပြောကြားခဲ့သည်။

ထိုအဖြစ်အပျက်တွင် ၀ါရီကာ၏ ညီမတစ်ဦးသာ အသက်ရှင်ခဲ့ပြီး၊ သန်ခေါင်ကျော်အချိန်တွင် သူမ၏ အကူအညီတောင်းသံကို ပတ်ဝန်းကျင်က ကြားပြီးနောက် ရဲတပ်ဖွဲ့သို့ အကြောင်းကြားခဲ့ခြင်းဖြစ်သည်။ သူမကိုမူ ဆေးရုံသို့ ပို့ဆောင်ခဲ့ကြသည်။

“ဒီတိုခိုက်မှုအတွင်းမှာ တစ်ဦးတည်းလွတ်မြောက်သူဖြစ်တဲ့ သူမဟာ ဆေးရုံမှာ တော်တော်လေး ကြောက်ရွံ့နေတဲ့အနေအထား ဖြစ်နေတာကြောင့် ကျွန်တော်တို့ စကားပြောလို့ မရသေးပါဘူး” ဟု ကဘ်ဒူလီက ထည့်သွင်းပြောကြားခဲ့သည်။

အသက် ၃၅ နှစ်အရွယ်ရှီ ၀ါရီကာမှာ ၎င်း၏ မိသားစုဝင်များ၏ အစားအစာထဲတွင် အိပ်ဆေးခတ်ခဲ့ခြင်းဖြစ်သည်ဟု ဒေသတွင်းမီဒီယာများက ဖော်ပြခဲ့သည်။ သို့သော်လည်း Indian Express သတင်းစာကမူ အားလုံးအိပ်နေသည့်အချိန်တွင် ဓားဖြင့်ထိုးသတ်ခဲ့ခြင်းဖြစ်သည်ဟု ဖော်ပြခဲ့သည်။

ရဲတပ်ဖွဲ့ကမူ လူသတ်သမားမှာ အိမ်ရှိတံခါးများအားလုံးကို ပိတ်ခဲ့ပြီးနောက် မိသားစုဝင်များ အိပ်သည့်အချိန်တွင် ၀င်ရောက်သတ်ဖြတ်ခဲ့ပြီး အသုံးပြုခဲ့သောဓားကို ၎င်း၏ အလောင်းအနီးတွင် တွေ့ရှိခဲ့ရသည်ဟု ပြောကြားခဲ့သည်။

Ref: Aljazeera