သြဇီမွတ်စလင်များ၏ အစ္စလာမ့်အသိပညာပေးအလုပ်ရုံဆွေးနွေးပွဲ အမြင်မှားမှုများကို ဖယ်ရှားနိုင်

မတ် ၂၊ ၂၀၁၆
M-Media

– အစ္စလာမ့်ရေးရာ သင်ကြားမှုတွေကို သိရှိဖို့နဲ့ အစ္စလာမ်အပေါ် အထင်မှားအမြင်မှား ဖြစ်မှုတွေကို ပပျောက်စေဖို့အတွက် သြစတေးလျ မွတ်စလင်တွေက အစ္စလာမ့်အသိပညာပေး အလုပ်ရုံဆွေးနွေးပွဲတစ်ခုကို ပြုလုပ်ခဲ့တာ ဖြစ်ပါတယ်။

နိုင်ငံအတွင်း ဒုတိယ လူဦးရေအထူထပ်ဆုံးမြို့ဖြစ်တဲ့ ကွင်စလန်းပြည်နယ် ဘွန်ဒါဘာ့ဂ်မှာ ပြုလုပ်ခဲ့တာဖြစ်ပြီး အစ္စလာမ်ဘာသာဝင်မဟုတ်သူ အမြောက်အများ တက်ရောက်ခဲ့ကြပါတယ်။

ဧည့်သည်တော်အဖြစ် တက်ရောက်ခဲ့ပြီး ဟောပြောပို့ချမှု ပြုလုပ်ခဲ့တဲ့ အစ္စလာမ့် ဓမ္မပညာရှင် အမျိုးသမီး ဟိုင်ဒီ ဆိုင်ရီက်ဘာဆန်က ဒီအလုပ်ရုံဆွေးနွေးပွဲ ရည်ရွယ်ချက်ဟာ တကယ့် စစ်မှန်တဲ့အစ္စလာမ်ဆိုတာ ဘာလဲဆိုတာကို ပြသဖို့နဲ့ ယူဆချက်အမှားတွေ၊ အမြင်မရှင်းတာတွေကို ဖယ်ရှားဖို့ဖြစ်တယ်လို့ ပြောကြားခဲ့ပါတယ်။

“IS လုပ်နေတာတွေက ကျွန်မနဲ့ မွတ်စလင်လူထုကြီးကို ကိုယ်စားမပြုပါဘူး” လို့ သူက ဆိုပါတယ်။

ဆွေးနွေးတင်ပြခဲ့ကြတဲ့ ခေါင်းစဉ်တွေထဲမှာ ကုရ်အာန်၊ စွန်နာ (တမန်တော် မုဟမ္မဒ်သခင်၏ ဓလေ့နှင့် သြ၀ါဒတော်)၊ ရှရီအာဥပဒေ၊ အစ္စလာမ်ကပြောသည့် အမျိုးသမီးများ အခန်းကဏ္ဍ၊ ဂျီဟတ်နဲ့ အကြမ်းဖက်ဝါဒအကြောင်းတွေလည်း ပါဝင်ပါတယ်။

ဆိုင်ရီက်ဘာဆန်က အကြမ်းဖက်ဝါဒပြဿနာဟာ လက်ရှိမှာ ထပ်တလဲလဲ ဖြေရှင်းနေရတဲ့ ပြဿနာဖြစ်နေပြီး အရှေ့ အလယ်ပိုင်းကလူတွေ၊ ဟီဂျဘ်ဝတ်ထားတဲ့ အမျိုးသမီးတွေဟာ အကြမ်းဖက်သမားတွေဖြစ်နိုင်တယ်ဆိုတဲ့ အမြင်မှားတွေကို ဖယ်ရှားဖို့ လိုအပ်နေတယ်လို့လည်း ထည့်သွင်းပြောကြားခဲ့ပါတယ်။

“အကြမ်းဖက်ဝါဒကို တိုက်ဖျက်ဖို့ဆိုရင်တော့ ကျွန်မတို့ကိုယ်တိုင်နဲ့ ကျွန်မတို့ ပတ်ဝန်းကျင်ကို အသိပညာပေးဖို့ပါပဲ။ စစ်မှန်တဲ့မွတ်စလင်ဟာ ဘယ်လိုလူမျိုးလဲဆိုတာ၊ ကျွန်မရဲ့ ဦးခေါင်းကို ဖုံးထားတာဟာ ဦးနှောက်ကို ဖုံးထားတာ မဟုတ်ဘူးဆိုတာ သိဖို့ပါပဲ”

အစ္စလာမ့်ရဲ့ ယုံကြည်ချက်နဲ့ သင်ကြားမှုတွေကို မီဒီယာတွေက ပုံဖျက်ဖော်ပြနေတာတွေနဲ့ ပတ်သက်လို့လည်း သူမက ထည့်သွင်း ပြောကြားခဲ့ကာ ဂျီဟတ်ဆိုတာ မကောင်းမှုဒုစရိုက်တွေကနေ ကျဉ်ရှောင်ဖို့ ရုန်းကန်ခြင်းကိုသာ ဆိုလိုပြီး၊ မွတ်စလင်မဟုတ်သူတွေအပေါ် ပြုလုပ်တဲ့ ဘာသာရေးစစ်ပွဲမျိုး မဟုတ်ဘူးလို့လည်း ဆိုင်ရီက်ဘာဆန်က ထည့်သွင်းပြောကြားခဲ့ပါတယ်။

အဲဒီအလုပ်ရုံဆွေးနွေးမှာ အစ္စလာမ်က အမျိုးသမီးတွေကို ဖိနှိပ်တယ်ဆိုတဲ့ ဒဏ္ဍာရီယုံတမ်းစကားတွေအကြောင်း အပါအ၀င် မွတ်စလင်တွေနဲ့ပတ်သက်တဲ့ ယိုးစွပ်ပြောဆိုမှုတွေကိုလည်း ဖြေရှင်းခဲ့ကြပါတယ်။

Ref: ABC