လူ ၁၀ ဦးကို အသက်စွန့်ကယ်တင်ခဲ့သည့် အီဂျစ်နိုင်ငံသား၏ ကျန်ရစ်သူ မိသားစုကို ဆော်ဒီက ဂုဏ်ပြု

မတ် ၅၊ ၂၀၁၆
M-Media

– ဒီဇင်ဘာလက ဂျာဇန်ပြည်နယ် ဆေးရုံတစ်ခု မီးလောင်မှုအတွင်း လူ ၁၀ ဦးကို အသက်စွန့် ကယ်ဆယ်ခဲ့တဲ့ အာဇာနည်တစ်ဦးရဲ့ ကျန်ရစ်သူမိသားစုကို ဆော်ဒီအစိုးရက ဂုဏ်ပြုဆုကြေး ရီယဲလ် ၁ သန်း ပေးအပ်ခဲ့တယ်လို့ သိရပါတယ်။

ကွယ်လွန်သွားသူဟာ အီဂျစ်နိုင်ငံသား အီဘရာဟင် အဘ်ဒူလ် အဇီးဇ် အလ်-ကူလာလီဖြစ်ပြီး ဇနီးသည်နဲ့ ကလေး ၃ ယောက် ကျန်ရစ်ခဲ့ကာ သူ့ရဲ့ စွန့်လွှတ်အနစ်နာခံမှုကို ဂုဏ်ပြုတဲ့အနေနဲ့ ကျန်ရစ်သူမိသားစုကို ဒီလို ထောက်ပံ့ခဲ့တာ ဖြစ်တယ်လို့ ဆော်ဒီ ကျန်းမာရေးဝန်ကြီးဌာန ဒုတိယ၀န်ကြီး ဟာမဒ် အလ်-ဒူဝေလီယာက ပြောကြားခဲ့ပါတယ်။

အဲဒီ ဂျာဇန်ဆေးရုံ မီးလောင်မှုအတွင်းမှာ လူ ၂၄ ဦး သေဆုံးခဲ့ပြီး ၁၂၃ ဦး ထိခိုက်ဒဏ်ရာ ရရှိခဲ့ပါတယ်။ ဒီဂုဏ်ပြုဆုကြေး ချီးမြှင့်ပွဲအခမ်းအနားကို အီဂျစ်နိုင်ငံဆိုင်ရာ ဆော်ဒီအာရေဗျသံအမတ်ကြီးရဲ့ ကိုင်ရိုမြို့နေအိမ်မှာ ဗုဒ္ဓဟူးနေ့က ကျင်းပပြုလုပ်ခဲ့တာ ဖြစ်ပါတယ်။

သူတစ်ပါးရဲ့ အသက်အိုးအိမ်စည်းစိမ်ကို ကယ်ဆယ်ရာမှာ စွန့်လွှတ်အနစ်နာခံမှု၊ ကိုယ်ကျိုးစွန့်မှုတွေအတွက် အလ်-ကူလာလီက အကောင်းဆုံး စံနမူနာဖြစ်တယ်လို့လည်း အလ်-ဒူဝေလီယာက ထည့်သွင်းပြောကြားခဲ့ပါတယ်။ ကျန်ရစ်သူဇနီးသည်နဲ့ ကလေးငယ်တွေ ယခုနှစ်ဟဂ်ျဘုရားဖူးခရီးစဉ် လာရောက်နိုင်အောင်လည်း ဆော်ဒီအစိုးရက စီစဉ်းပေးဖို့ ရှိနေပါတယ်။

Ref: Arab News