နျူလက်နက်များနှင့် စစ်တပ်ကို အသင့်ဖြစ်နေစေရန် မြောက်ကိုရီးယား အမိန့်ပေးထား

မတ် ၅၊ ၂၀၁၆
M-Media

– မြောက်ကိုးရီးယားခေါင်းဆောင် ကင်ဂျုံအန်က ရန်သူတွေရဲ့ ခြိမ်းခြောက်မှု ကြီးထွားလာတဲ့အတွက် နျူကလီးယား လက်နက်တွေကို အချိန်မရွေး တိုက်ခိုက်နိုင်ဖို့၊ စစ်တပ်ကိုလည်း တိုက်ခိုက်ရန် အသင့်အနေအထားရှိနေဖို့ ယမန်နေ့မှာ အမိန့်ပေးလိုက်တယ်လို့ သိရပါတယ်။

ကိုးရီးယားကျွန်းဆွယ်မှာ တင်းမာမှု မြင့်တက်လာတဲ့အတွက် မြောက်ကိုးရီးယားကို အပြင်းအထန်ဆုံး အရေးယူပိတ်ဆို့ဖို့ အမေရိကန်ရဲ့ တောင်းဆိုမှုကို ကုလသမဂ္ဂက အတည်ပြုလိုက်ပြီး နောက်တစ်ရက်မှာ အဆိုပါကြေငြာချက် ထွက်ပေါ်လာခဲ့တာ ဖြစ်ပါတယ်။

ဘယ်အချိန်မဆို ပစ်လွှတ်နိုင်ဖို့အတွက် နျူကလီးယားထိပ်ဖူးတွေကို အသင့်ပြင်ထားရမယ်လို့ ကင်က အမိန့်ပေးခဲ့ကြောင်း မြောက်ကိုရီးယားနိုင်ငံပိုင် KNCA သတင်းဌာနက ယမန်နေ့မှာ ဖော်ပြခဲ့ပါတယ်။ အသစ်ထုတ်လုပ်လိုက်တဲ့ ဒုံးကျည်တွေ အသုံးပြုပြီး စစ်ရေးလေ့ကျင့်မှုကို ကြီးကြပ်နေချိန်မှာ မြောက်ကိုရီးယားခေါင်းဆောင်က ဒီလို အမိန့်ပေးခဲ့တာလည်း ဖြစ်ပါတယ်။

အမေရိကန်နဲ့ တောင်ကိုးရီးယားတို့ ပူးတွဲစစ်ရေးလေ့ကျင့်မှု ပြုလုပ်ပြီး မကြာခင်မှာပဲ အရေးယူပိတ်ဆို့မှုတွေ ထပ်မံပြဌာန်းလိုက်တာကြောင့် အန္တရာယ်အလွန်များလာတယ်လို့လည်း သူက ထည့်သွင်းပြောကြားခဲ့ပါတယ်။

အဲဒီ အရေးယူပိတ်ဆို့မှုတွေကို တုံ့ပြန်တဲ့အနေနဲ့ တောင်ကိုးရီးယားကမ်းရိုးတန်းနဲ့ ၁၅၀ ကီလိုမီတာအကွာ (မိုင်၉၀ခန့်) ကို မြောက်ကိုးရီးယားက ကြာသာပတေးနေ့မှာ ဒုံးကျည်အမြောက်များ ပစ်လွှတ်ခဲ့ပါတယ်။

“တကယ်လို့ မြောက်ကိုးရီးယားက ရန်စပစ်ခတ်မှုတွေ လုပ်လာမယ်ဆိုရင်တော့ ပြန်လည်ပေးဆပ်ရမယ်ဆိုတာ သိရှိစေဖို့ ပြင်းထန်တဲ့အနေအထားနဲ့ တုံ့ပြန်သွားမှာ ဖြစ်ပါတယ်၊ ကျွန်မတို့နိုင်ငံကို ကာကွယ်ဖို့အတွက် စိတ်ပိုင်းဖြတ်ထားပြီးသားပါ” လို့ တောင်ကိုးရီးယားသမ္မတ ပတ်ဂျုံဟေးက မြောက်ကိုရီးယားရဲ့ လုပ်ရပ်တွေနဲ့ပတ်သက်ပြီး ယမန်နေ့မှာ တုံ့ပြန်ပြောဆိုခဲ့ပါတယ်။

မြောက်ကိုရီးယားရဲ့ ခြိမ်းခြောက်မှုတွေကို တုန့်ပြန်ဖို့ အဆင့်မြင့်အမေရိကန်ဒုံးကျည်စနစ် THAAD ကို တောင်ကိုရီးယားမှာ ဖြန့်ကျက်ချထားရေး တောင်ကိုးရီးယားနဲ့ အမေရိကန်တို့က ယမန်နေ့မှာ ဆွေးနွေးခဲ့ကြပါတယ်။ အဆိုပါ THAAD စနစ်နဲ့အတူ ချထားမယ့် X-Band ရေဒါစနစ်က ကိုးရီးယားကို ကျော်ပြီး မိမိတို့နိုင်ငံထဲ ၀င်လာမှာကို စိုးရိမ်တယ်လို့ တရုတ်က ပြောကြားထားပါတယ်။

Ref: Presstv