မန်ယူမှာ အာဆင်နယ်ကဲ့သို့ အဆင့် ၄ ဖြင့်ကျေနပ်ရသည့် အသင်းမျိုး မဖြစ်သင့်ဟု စခိုးလ်ပြော

မတ် ၁၁၊ ၂၀၁၆
M-Media

– မန်ယူအသင်းနေဖြင့် အာဆင်နယ်ကဲ့သို့ နှစ်တိုင်း ချန်ပီယံလိဂ် ၀င်ခွင့်နေရာရယူကာ အောင်ပွဲခံရသည့်အသင်းမျိုး မဖြစ်သင့်ဟု ကွင်းလယ်လူဟောင်း ပေါလ်စခိုးလ်က ပြောကြားလိုက်သည်။

ယနေ့မနက် ယူရိုပါလိဂ် ၁၆ သင်းအဆင့်ရှုံးထွက်ပွဲ ပထမကျော့အဖြစ် လီဗာပူးလ်အသင်းနှင့် ယှဉ်ပြိုင်ကစားခဲ့ရာ မန်ယူမှာ ၂ ဂိုး ပြတ်ဖြင့်ရှုံးနိမ့်ခဲ့ပြီးနောက် ယူရိုပါလိဂ်မှတစ်ဆင့် လာမည့်နှစ် ချန်ပီယံလိဂ်သို့ ၀င်ရောက်ခွင့်မှာ မသေချာတော့ပေ။ ပရီးမီးယားလိဂ်တွင်လည်း မန်ယူမှာ တစ်ပွဲပိုကစားထားကာ စတုတ္ထနေရာမှ မန်စီးတီးအသင်းနှင့် ၃ မှ တ်အကွာ အဆင့် ၆ နေရာတွင် ရှိနေသည်။

စခိုးလ်ကမူ မန်ယူအနေဖြင့် ချန်ပီယံလိဂ်ကို ရရှိရန်ရည်ရွယ်ချက် အမြဲတမ်းရှိသင့်သည်ဟု ဆိုသည်။

“မန်ယူဟာ ရာသီတိုင်း ပရီးမီးယားလိဂ်နဲ့ ချန်ပီယံလိဂ်ကို ရရှိဖို့အတွက် ယှဉ်ပြိုင်တာမျိုး ဖြစ်သင့်ပါတယ်။ သူတို့ဟာ ပေါင် သန်း ၃၀၀ လောက်သုံးခဲ့ပြီး၊ အဆင့် ၆ နေရာ ရောက်နေပါတယ်။ ချန်ပီယံလိဂ်ကိုလည်း လက်ပြနှုတ်ဆက်ခဲ့ရပြီး ယူရိုပါနဲ့ပဲ ကျေနပ်ခဲ့ရပါတယ်။ သူတို့ဟာ ဘာစီလိုနာ၊ ရီးယဲလ်မက်ဒရစ်၊ ဘိုင်ယန်မြူးနစ်တို့လို အသင်းမျိုးနဲ့ ယှဉ်ပြိုင်သင့်တာပါ။ နောက်ဆိုရင် အာဆင်နယ်လို အဆင့် ၄ ရရုံ၊ FA ဖလား အနိုင်ရရုံလောက်နဲ့ ကျေနပ်ရမယ့်ပုံစံမျိုး ကျွန်တော် မြင်နေပါတယ်။ အဆင့် ၄ ရလို့ အာဆင်နယ်အသင်းသားတွေ ကွင်းထဲမှာ ခုန်ပေါက်တာမျိုး ခင်ဗျားတို့ မြင်ဖူးကြမှာပါ။ မန်ယူက ဒါမျိုးဖြစ်လို့ မရပါဘူး” ဟု စခိုးလ်က ပြောကြားခဲ့သည်။

Ref: Goal