လာလီဂါတွင် လက်စတာလိုအသင်းမျိုး မပေါ်နိုင်ဟု ဘာကာနည်းပြ ပြော

မတ် ၁၂၊ ၂၀၁၆
M-Media

– ပရီးမီးယားလိဂ်တွင် လက်စတာစီးတီးအသင်း၏ စွမ်းဆောင်မှုမျိုးကို လာလီဂါရှိ ကလပ်များက လုပ်ဆောင်နိုင်မည်မဟုတ်ဟု ဘာစီလိုနာနည်းပြ လူးဝစ် အန်းရစ်က ပြောကြားလိုက်သည်။

ကလော်ဒီယို ရာနီရေးရီ၏ လက်စတာမှာ တန်းမဆင်းရရေးအတွက်သာ ရုန်းကန်ရမည်ဟု ရာသီအစက ခန့်မှန်းထားကြသော်လည်း ၉ ပွဲကစားရန် ကျန်ရှိသည့် လက်ရှိအချိန်တွင် ဒုတိယနေရာမှ စပါးအား ၅ မှတ်ဖြတ်၍ ပရီးမီးယားလိဂ်ဇယားကို ဦးဆောင်ထားသည်။

လွန်ခဲ့သည့် ၁၁ နှစ်တာကာလတွင်း အက်သလက်တီကို၊ ဘာစီလိုနာနှင့် ရီးယဲလ်မက်ဒရစ်အသင်းတို့သာ စိုးမိုးထားသည့် လာလီဂါတွင်မူ ထိုကဲ့သို့ ဖြစ်လာနိုင်ဖွယ်မရှိဟု ဘာစီလိုနာနည်းပြက ယူဆနေသည်။

“လာလီဂါမှာ ဒီလိုဖြစ်မလားဆိုတာတော့ ကျွန်တော် မပြောတတ်ပါဘူး။ အသင်းကြီးတွေ ဆိုးဆိုးဝါးဝါးဖြစ်တာမျိုးက ဖြစ်ခဲပါတယ်။ ကျွန်တော်တို့ဟာ အသင်းကြီး ၃ သင်းအကြောင်း ပြောနေတာပါ။ လွန်ခဲ့တဲ့ ၄ နှစ်လောက်ကစပြီး အက်သလက်တီကိုက ဒီအသင်းကြီးစာရင်းထဲမှာ ပါဝင်ခဲ့ပါတယ်။ ဒီသုံးသင်းက (လက်ရှိ ပရီးမီးယားလိဂ်က အသင်းကြီးတွေလို) ဖြစ်သွားနိုင်ပါတယ်။ ဒါပေမယ့် ဖြစ်နိုင်ချေကတော့ တော်တော်နည်းပါတယ်။ အသင်းကြီးတွေက ထိပ်ဆုံးနေရာနဲ့ ဝေးသွားတာမျိုးက ပုံမှန်မဟုတ်ပါဘူး။ အင်္ဂလန်မှာဖြစ်နေတာကတော့ တော်တော်လေး ကြုံတောင့်ကြုံခဲ အနေအထားပါပဲ” ဟု အန်းရစ်က ပြောကြားခဲ့သည်။

Ref: Goal