အသင်းမှာ ကစားပုံကောင်းပြီး ရလဒ်ကောင်း မရခြင်းသာဖြစ်သည်ဟု မန်ယူနည်းပြပြော

မတ် ၁၂၊ ၂၀၁၆
M-Media

– မိမိအသင်း၏ ကစားပုံမှာ ပြောစရာမရှိဘဲ ရလဒ်ကောင်း ပျောက်ဆုံးခြင်းသာဖြစ်သည်ဟု မန်ယူနည်းပြ လူးဝစ်ဗန်ဂါးလ်က ပြောကြားလိုက်သည်။

မန်ယူမှာ ကြာသာပတေးနေ့က ကစားခဲ့သည့် ယူရိုပါလိဂ် ၁၆ သင်းအဆင့် ရှုံးထွက်ပွဲ ပထမကျော့တွင် လီဗာပူးလ်အသင်းအား ၂ ဂုိုး ဂိုးမရှိဖြင့် ရှုံးနိမ့်ခဲ့ပြီး ဗန်ဂါးလ်၏ ခံစစ်အသားပေး ကစားမှုအတွက် ဝေဖန်မှုများကို ခံခဲ့ရသည်။ သို့သော်လည်း ဗန်ဂါးလ်ကမူ အသင်း၏ကစားပုံအား ကာကွယ်ခဲ့ကာ အနိုင်ရလဒ်များ ပျောက်ဆုံးခြင်းဖြစ်သည်ဟု ဆိုသည်။

“ဟုတ်ကဲ့။ ကစားပုံက အလုပ်ဖြစ်တယ်လို့ ထင်ပါတယ်။ ဘာ့ကြောင့်လည်းဆိုတော့ ကျွန်တော်တို့ဟာ အခြေအနေအချိန်အခါကိုလိုက်ပြီး လုပ်ရတာမို့လို့ပါ။ တကယ်လို့ ကစားသမား များများစားစား မရှိတဲ့အချိန်မှာ ပြိုင်ပွဲ ၃ ခုလောက် ကစားရတာဟာ တော်တော်လေး ခက်ခဲပါတယ်။ ကစားပုံက အလုပ်ဖြစ်တယ်လို့ ကျွန်တော်ထင်ပါတယ်။ ဒါပေမယ့် ယူရိုပါနဲ့ FA ဖလားတို့မှာ ချန်ပီယံဖြစ်ရမယ်လို့ ထင်ထားတဲ့အချိန် လိုအပ်တဲ့ ရလဒ်ကောင်းကို မရတာပါ” ဟု သတင်းထောက်များအား ပြောကြားခဲ့သည်။

ယူရိုပါလိဂ်တွင် နောက်တစ်ဆင့်တက်ရန် မျှော်လင့်ချက်နည်းလာသောကြောင့် မန်ယူမှာ လာမည့်နှစ် ချန်ပီယံလိဂ်ဝင်ခွင့် ရရှိရန်အတွက် ပရီးမီးယားလိဂ်၌ အဆင့် ၄ အတွင်းဝင်ရန် လိုအပ်နေသည်။

Ref: Goal