ရုရှားတပ်များ ဆီးရီးယားမှ ဆုတ်ခွာမည်

မတ် ၁၅၊ ၂၀၁၆
M-Media

– မိမိတို့၏ ရည်မှန်းချက် အောင်မြင်ခဲ့ပြီဖြစ်သောကြောင့် ဆီးရီးယားတွင်ရှိနေသည့် တပ်များကို မတ်လ ၁၅ ရက်နေ့တွင် စတင်ဆုတ်ခွာရန် ရုရှားသမ္မတ ဗလာဒီမီယာ ပူတင်က ကာကွယ်ရေးဝန်ကြီး ဆာဂျီ ရှီဂူအား အမိန့်ပေးခဲ့သည်ဟု သိရသည်။

“ကာကွယ်ရေးဝန်ကြီးဌာနအတွက် သတ်မှတ်ထားတဲ့ ရည်မှန်းချက်တွေဟာ ယေဘူယျအားဖြင့် အောင်မြင်ပြီးဆုံးသွားပြီလို့ ကျွန်တော် ယူဆပါတယ်။ ဒါ့ကြောင့် ဆီးရီးယားပိုင်နက်ထဲက ကျွန်တော်တို့ရဲ့ အဓိကတပ်တွေကို မနက်ဖြန်မှာ စတင် ဆုတ်ခွာဖို့ အမိန့်ပေးခဲ့တာ ဖြစ်ပါတယ်” ဟု ပူတင်က ရှီဂူ၊ နိုင်ငံခြားရေးဝန်ကြီးတို့နှင့် ယမန်နေ့ အစည်းအဝေးအပြီးတွင် ပြောကြားခဲ့သည်။

သို့သော်လည်း အပစ်ရပ်ရေး သဘောတူညီချက်များကို စောင့်ကြည့်လေ့လာရန်အတွက် တာတွစ်ဆိပ်ကမ်းနှင့် ခမေမင် လေတပ်အခြေစိုက်စခန်းတွင် စစ်သားအနည်းကို ဆက်လက်ထားရှိသွားမည် ဖြစ်သည်။

ရုရှားမှာ ဆီးရီးယားအစိုးရ၏ မေတ္တာရပ်ခံမှုကြောင့် ဆီးရီးယားတွင် လေကြောင်းမှ ပါဝင်တိုက်ခိုက်ခဲ့ခြင်းဖြစ်ပြီး၊ ရုရှားအစိုးရက မိမိတို့မှာ IS အကြမ်းဖက်သမားများကို ပစ်မှတ်ထားတိုက်ခိုက်ခဲ့ခြင်းဖြစ်သည်ဟု ဆိုသည်။ သို့သော်လည်း အမရိကန်နှင့် မဟာမိတ်များကမူ ရုရှားမှာ ၎င်းတို့ကျောထောက်နောက်ခံပြုထားသည့် သူပုန်များအား တိုက်ခိုက်ခဲ့သည်ဟု စွပ်စွဲခဲ့သည်။

ပူတင်ကမူ မိမိတို့မှာ တပ်ဖွဲ့မှာ သေးငယ်သော်လည်း အချိန်ကာလအနည်းငယ်အတွင်း ထိထိရောက်ရောက် ဆောင်ရွက်နိုင်ခဲ့ပြီး ထိုဆောင်ရွက်မှုများကြောင့် ငြိမ်းချမ်းရေးလုပ်ငန်း စတင်ရန် ဖြစ်လာခဲ့ကြောင်း၊ မိမိတို့လေတပ်၏ အကူအညီဖြင့် ဆီးရီးယားအစိုးရမှာ နိုင်ငံတကာ အကြမ်းဖက်ဝါဒကို တိုက်ဖျက်ရေးနှင့် အပစ်ရပ်ရေးလုပ်ငန်းတို့တွင် အခြေအနေများကို ပြောင်းလဲနိုင်ခဲ့ကြောင်း ထည့်သွင်းပြောကြားခဲ့သည်။

Ref: RT