လက်စတာ၏ ပရီးမီးယားလိဂ်ချန်ပီယံဖြစ်နိုင်ခွင့်ကို နည်းပြရာနီယေးရီ ပထမဆုံးဝန်ခံ

မတ် ၂၀၊ ၂၀၁၆
M-Media

– ခရစ္စတယ်ပဲလေ့စ်အား အနိုင်ရရှိခဲ့ပြီးနောက် မိမိတို့အသင်းမှာ ပရီးမီးယားလိဂ်ဖလားကို ရရှိနိုင်သည်ဟု လက်စတာနည်းပြ ကလော်ဒီယို ရာနီယေးရီက ၀န်ခံပြောကြားလိုက်သည်။

ယမန်နေ့က ကစားခဲ့သည့် ထိုပွဲတွင် လက်စတာမှာ မဟ်ရက်ဇ်၏ တစ်လုံးတည်းသောဂိုးဖြင့် အနိုင်ရရှိခဲ့ပြီး ဒုတိယနေရာမှ စပါးအသင်းအား တစ်ပွဲပို ၈ မှတ်ဖြတ်ကာ ဇယားကို ဆက်လက်ဦးဆောင်နေသည်။ ရာသီတစ်လျှောက်လုံး ခြေစွမ်းကောင်းများ ပြသခဲ့သော်လည်း ဖလားရနိုင်မည့် အခွင့်အရေးနှင့်ပတ်သက်၍ အမြဲတမ်းပယ်ချခဲ့သည့် ရာနီယေးရီကမူ အသင်း၏ ဖလားရနိုင်ချေအား ပထမဆုံး ၀န်ခံခဲ့သည်။

လက်စတာအနေဖြင့် စပါးထက်အရင် ကစားခဲ့ရခြင်းက အားသာချက်ရှိခဲ့လားဟု မေးမြန်းရာ “ဒါက အရေးကြီးလား မကြီးဘူးလားဆိုတာ ကျွန်တော် မသိပါဘူး။ အရာအားလုံး ကျွန်တော်တို့လက်ထဲမှာပါ။ ကျွန်တော်တို့ ဆက်လက် တွန်းအားပေးသွားရပါမယ်။ အခြားအရာတွေကတော့ အရေးမကြီးပါဘူး။ ဘယ်သူမှ ကျွန်တော်တို့ကို မကူညီကြပါဘူး။ ကျွန်တော်တို့ ကိုယ့်အလုပ် ကိုယ်လုပ်ရမယ်။ တစ်သင်းသင်းက ကျွန်တော်တို့ကို ကျော်တက်သွားလည်း ကိစ္စမရှိပါဘူး။ သူတို့က ချန်ပီယံပဲပေါ့။ ကျွန်တော်တို့က ဆက်လက်တိုက်ပွဲဝင်သွားမှာပါ။ (ဖလားမရလည်း) ကျွန်တော်တို့ ဒီရာသီအတွက် ကျေနပ်ပါတယ်။ ရာသီအစကို ကျွန်တော်မှတ်မိပါတယ်” ဟု ရာနီယေးရီက ပွဲအပြီးတွင် ပြန်လည်ဖြေကြားခဲ့သည်။

Ref: Goal