ဆီးရီးယားမှ ရှေးဟောင်းမြို့တစ်ခုကို IS လက်မှ ပြန်သိမ်းနိုင်တော့မည်

မတ် ၂၄၊ ၂၀၁၆
M-Media

– ကမ္ဘာ့သမိုင်းအမွေအနှစ် နေရာအဖြစ် သတ်မှတ်ထားသည့် ဆီးရီးယားနိုင်ငံမှ ရှေးဟောင်း ပါလ်မိုင်ရာမြို့အား ဆီးရီးယားအစိုးရတပ်များက IS လက်အတွင်းမှ ပြန်လည် သိမ်းယူနိုင်တော့မည်ဟု ဆီးရီးယား လူ့အခွင့်အရေးဆိုင်ရာ စောင့်ကြည့်အဖွဲ့က ယမန်နေ့တွင် ပြောကြားလိုက်သည်။

ရုရှား၏ လေကြောင်းမှ ကူညီပေးမှုဖြင့် ဆီးရီးယားစစ်တပ်နှင့် လက်ဘနွန်ပြည်သူ့စစ်များက ပြီးခဲ့သည့် ၂ ပတ်အရင်ကတည်းက ထိုးစစ်ဆင်နေကြခြင်းဖြစ်ပြီး မြို့နှင့် ၃ ကီလိုမီတာသာ ကွာဝေးတော့သည်ဟု နိုင်ငံပိုင် Ikhbariya TV က ဖော်ပြသည်။

“ဘုရားသခင်အလိုတော်နဲ့ နောက်ထပ်နာရီအနည်းငယ်အတွင်းမှာပဲ မြို့တွင်းကိုဝင်ကာ မြို့ကို သိမ်းနိုင်တော့မှာပါ” ဟု အရာရှိတစ်ဦးက အဆိုပါတီဗီသို့ ပြောကြားခဲ့သည်။

အဆိုပါ ပါလ်မိုင်ရာ ရှေးဟောင်းမြို့မှာ ၂၀၁၅ ခုနှစ် မေလကတည်းက IS ၏ လက်အတွင်းသို့ ကျရောက်ခဲ့ခြင်းဖြစ်သည်။ ထို့နောက် သြဂုတ်လတွင် ထိုမြို့အတွင်းမှ ရှေးဟောင်း အမွေအနှစ်များကို ဖျက်ဆီးခဲ့ကြပြီး နှစ်ပေါင်း ၂၀၀၀ ကျော် သက်တမ်းရှိသည့် Bel ဘုရားကျောင်းလည်း ပါဝင်ခဲ့သည်။

Ref: Aljazeera