နိုင်ငံခြားအလုပ်သမားများအတွက် ဆော်ဒီက တယ်လီဖုန်းဆင်းမ်ကဒ်များ အခမဲ့ ဝေငှ

ဧပြီ ၁၊ ၂၀၁၆
M-Media

– နိုင်ငံခြားအလုပ်သမားတွေအပေါ် ဆော်ဒီနိုင်ငံရဲ့ ၀န်ဆောင်မှုအသစ် အစိတ်အပိုင်းအဖြစ် ဆော်ဒီအလုပ်သမားဝန်ကြီးဌာနကနေ ကြိုတင်ငွေပေး ဆင်းမ်ကဒ်တွေကို အခမဲ့ လိုက်လံဝေငှလျက်ရှိတယ်လို့ သိရပါတယ်။

လေဆိပ်က တာဝန်ရှိသူတွေဟာ ပြည်ပကရောက်လာကြတဲ့ အလုပ်သမားတွေကို ဆော်ဒီနိုင်ငံရဲ့ စည်းမျဉ်းစည်းကမ်းတွေနဲ့ ၎င်းတို့ရဲ့ ရပိုင်ခွင့်၊ တာဝန်များကို အကျဉ်းချုပ် ရှင်းပြပေးပြီး ဆင်းမ်ကဒ်များကို အခမဲ့ ဝေငှပေးနေတာ ဖြစ်ပါတယ်။

ဆော်ဒီဆက်သွယ်ရေးကုမ္ပဏီ (STC) နဲ့ လေဆိပ်အာဏာပိုင်တို့အကြား ပူးပေါင်းလုပ်ဆောင်ခဲ့တဲ့ အဲဒီဝန်ဆောင်မှုကို ပြီးခဲ့တဲ့ ရက်သတ္တပတ်က စတင်ခဲ့တာပါ။ အဲဒီ ၀န်ဆောင်မှုမှာ အလုပ်သမားတွေရဲ့ ရပိုင်ခွင့်၊ တာဝန်ဝတ္တရားတွေ၊ အခက်အခဲတစ်စုံတစ်ရာရှိခဲ့ရင် ၀န်ကြီးဌာနကနေ အကူအညီရယူနိုင်မယ့်နည်းလမ်း စတာတွေ ရေးသားထားတဲ့ လမ်းကမ်းစာစောင်တွေလည်း ဖြန့်ဝေခဲ့ပါတယ်။

ဆင်းမ်ကဒ်တွေကို နိုင်ငံခြားဘာသာစကားအများအပြားနဲ့ အသုံးပြုနိုင်အောင် စီစဉ်ထားပြီး အလုပ်သမားတွေကို သူတို့ရဲ့ လုပ်ငန်းတွေနဲ့ သူတို့ချစ်ခင်သူတွေဆီ ဆက်သွယ်နိုင်စေဖို့ ကူညီပေးမှာ ဖြစ်ပါတယ်။ အခုလိုစိတ်ကူးမျိုးဟာ အလုပ်သမားတွေကို နိုင်ငံတွင်းမှာ နေထိုင်စဉ်ကာလ လုံခြုံပြီး သက်တောင့်သက်သာရှိစေနိုင်ဖို့ ရည်ရွယ်တာဖြစ်တယ်လို့ ဆော်ဒီအလုပ်သမားဝန်ကြီးဌာနက ပြောပါတယ်။

အဆိုပါဆင်းမ်ကဒ်မှာ ပြည်တွင်းနဲ့ နိုင်ငံတကာကို ဖုန်းခေါ်ဆိုခြင်း၊ စာတိုပို့ခြင်းတို့အတွက် အခမဲ့မိနစ်များလည်း ပါဝင်ပါတယ်။ အလုပ်သမားတွေအနေနဲ့ အစိုးရဆီကနေ လိုအပ်တဲ့ မည်သည့်အကူအညီကိုမဆို တောင်းခံနိုင်ဖို့အတွက် စားသုံးသူဝန်ဆောင်မှုနံပါတ်ကို ထည့်သွင်းပေးထားပါတယ်။

ယခုအစီအစဉ်ကို လာမယ့်ရက်သတ္တပတ်တွေမှာ ဆော်ဒီရဲ့ အခြားသော နိုင်ငံတကာဝင်ပေါက်တွေမှာလည်း ၀န်ဆောင်မှုပေးသွားမယ်လို့ သိရပါတယ်။

Ref: IINA