ခရစ်ယာန်များကို အကြမ်းဖက်များလက်မှ ကာကွယ်ရင်း သေဆုံးခဲ့သူ မွတ်စလင်ကျောင်းဆရာကို ကင်ညာက အမြင့်ဆုံးသူရဘွဲ့ ချီးမြှင့်

ဧပြီ ၂၊ ၂၀၁၆
M-Media

– ဘတ်စ်ကားတစ်စီးကို အစ္စလာမ့်မစ်စစ်သွေးကြွအဖွဲ့တစ်ခုက စီးနင်းမှုအတွင်း ခရစ်ယာန်တွေကို ကာကွယ်ရင်း အသက်ဆုံးရှုံးခဲ့ရတဲ့ ကျောင်းဆရာတစ်ဦးကို ကင်ညာနိုင်ငံက နိုင်ငံရဲ့ အမြင့်ဆုံးသူရဘွဲ့ချီးမြှင့်ကာ ဂုဏ်ပြုလိုက်ပါတယ်။

အဲဒီကျောင်းဆရာကတော့ ဆာလာဟ် ဖာရာဆိုသူဖြစ်ပြီး ဒီဇင်ဘာလအတွင်းက ကင်ညာနိုင်ငံမြောက်ပိုင်းမှာ ဖြစ်ပွားခဲ့ အဲဒီအဖြစ်အပျက်အတွင်း သေနတ်နဲ့ ပစ်သတ်ခံရကာ နောက်ပိုင်း အဲဒီဒဏ်ရာကြောင့်ပဲ အသက်ဆုံးရှုံးသွားရတာ ဖြစ်ပါတယ်။

စစ်သွေးကြွတွေဟာ မွတ်စလင်တွေနဲ့ ခရစ်ယာန်တွေကို ခွဲထိုင်ခိုင်းဖို့ ပြောကြားခဲ့ပေမယ့် ဖာရာအပါအ၀င် ကားပေါ်မှာ ပါလာခဲ့တဲ့ မွတ်စလင်တွေက အဲဒီလိုလုပ်ဖို့ ငြင်းဆန်ခဲ့ပြီး ‘သတ်ချင်ရင် ငါတို့အကုန်လုံးကိုသတ်’ လို့ ပြောခဲ့ကြတာပါ။

ကင်ညာသမ္မတ အူဟူရူ ကန်ညက်တာက ဖာရာရဲ့ သူရသတ္တိအတွက် Order Of The Grand Warrior ဘွဲ့ကို အပ်နှင်းခဲ့ပါတယ်။ ဒီဘွဲ့ထူးဟာ ကင်ညာနိုင်ငံရဲ့ အမြင့်ဆုံးဂုဏ်ပြုမှုဖြစ်ပြီး တိုင်းပြည်အတွက် သူမတူအောင် စွမ်းဆောင်ပေးနိုင်တဲ့သူကို သမ္မတက ချီးမြှင့်တာဖြစ်ပါတယ်။

အရင်တိုက်ခိုက်မှုတွေမှာ ဆိုမာလီအခြေစိုက် အလ်-ရှာဘတ်စစ်သွေးကြွတွေဟာ မွတ်စလင်တွေကိုချန်ကာ ခရစ်ယာန်တွေကို သတ်ပစ်လေ့ရှိတာကြောင့် ဒီဇင်ဘာက အဲဒီအဖြစ်အပျက်မှာတော့ မွတ်စလင်တွေက ဒီအခွင့်အရေး မပေးခဲ့ပါဘူး။

ကင်ညာတို့၏ ဂုဏ်ယူရမည့် စည်းလုံးမှု

ဖာရာကို ဒီလိုဘွဲ့ထူး ချီးမြှင့်မယ်ဆိုတာကို မစ္စတာ ကန်ညက်တာက နိုင်ငံတော်အခြေပြမိန့်ခွန်းမှာ ထည်သွင်းကြေငြာခဲ့တာဖြစ်ပြီး အကြမ်းဖက်ဝါဒရဲ့သွေးခွဲမှုကို ကင်ညာပြည်သူတွေက လက်မခံတဲ့အတွက် ဂုဏ်ယူမိတယ်လို့ ပြောကြားခဲ့ပါတယ်။

ဘတ်စ်ကားမှာ ခရီးသည် ၆၀ လောက် ပါဝင်ခဲ့ပြီး မြို့တော် နိုင်ရိုဘီကနေ မန်ဒီရာကို သွားနေစဉ်အတွင်း ဒီဇင်ဘာ ၂၀ ရက်နေ့မှာ ဆိုမာလီနယ်စပ် အလ်ဝက်ဆိုတဲ့ ရွာအနီး အလ်ရှာဘတ်တွေက စီးနင်းခဲ့တာဖြစ်ပါတယ်။

စစ်သွေးကြွတွေ တက်လာပြီ ကားပေါ်မှာရှိနေတဲ့ လူတွေအားလုံး ဆင်းခိုင်းတဲ့အချိန်မှာ မွတ်စလင်အမျိုးသမီးတွေဟာ သူတို့ရဲ့ပုဝါတွေကို ချွတ်ပြီး ခရစ်ယာန်အမျိုးသမီးတွေကို ခြုံပေးခဲ့ကြပါတယ်။

မန်ဒီရာမြို့နယ်လေးက မူလတန်းကျောင်းဆရာဖြစ်တဲ့ ဖာရာကတော့ မွတ်စလင်ခရီးသည်တွေဟာ သေနတ်သမားတွေကို ရင်ဆိုင်ခဲ့ကြတယ်လို့ ဆေးရုံတက်နေစဉ်အတွင်း ကင်ညာနေ့စဉ်ထုတ်သတင်းစာ Daily Nation ကို ပြောကြားခဲ့ပါတယ်။

“သတ်ချင်ရင် ငါတို့အားလုံးကိုသတ်၊ ဒါမမှဟုတ် ထွက်သွားလို့ ကျွန်တော်တို့ သူတို့ကို ပြန်ပြောခဲ့ပါတယ်”

အဲဒီလို အချေအတင်ဖြစ်နေတဲ့အချိန်မှာ လော်ရီကားတစ်စီးဟာ သူတို့နားကို ကပ်လာတာကြောင့် စစ်သွေးကြွတွေဟာ ခြုံခိုတိုက်ခိုက်ခဲ့ကြပြီး တာဝန်ချိန်မဟုတ်တဲ့ ရဲတစ်ယောက် သေဆုံးခဲ့ပါတယ်။

နောက်ပိုင်းမှာ မွတ်စလင်တွေဟာ ခရစ်ယာန်တွေနဲ့အတူရှိကာ ကာကွယ်ပေးတာကြောင့် စစ်သွေးကြွတွေက ခရစ်ယာန်တွေကိုသတ်ဖို့ လက်လျှော့ခဲ့ရပြီး ထွက်ခွာသွားခဲ့ကြပါတယ်။

အဲဒီအဖြစ်အပျက်မှာ ခရီးသည် ၂ ဦးအပါအ၀င် လူ ၃ ဦးသေဆုံးခဲ့ပြီး အနည်းဆုံး ၂ ဦး ဒဏ်ရာရရှိခဲ့ပါတယ်။ ဖာရာကတော့ အဲဒီအဖြစ်အပျက်ဖြစ်ပွားပြီး ၁ လအကြာ နိုင်ရိုဘီဆေးရုံးမှာ ခွဲစိတ်ကုသမှုလုပ်ရင်း အသက်ဆုံးရှုံးခဲ့ရတာဖြစ်ပါတယ်။

၂၀၁၁ ခုနှစ်မှာ ဆိုမာလီနိုင်ငံကို ကင်ညာတပ်တွေ ၀င်ရောက်တိုက်ခိုက်ခဲ့ပြီးတဲ့နောက်ပိုင်း အလ်ရှာဘတ်တွေဟာ ကင်ညာနိုင်ငံကို စစ်ကြေငြာခဲ့ပြီး မွတ်စလင်အများစုရှိရာ ကင်ညာနိုင်ငံ အရှေ့မြောက်ပိုင်းမှာ တိုက်ခိုက်မှုတွေ ပြုလုပ်ခဲ့ပါတယ်။

Ref: BBC