သာသနာရေး ဝန်ကြီး သူရ ဦးအောင်ကိုအား မြန်မာမွတ်စလင် အစည်းအရုံး ပြင်းထန်စွာ ကန့်ကွက်

ဧပြီ ၃ ၊ ၂၀၁၆
M-Media
သီဟ

ဧပြီလ ၂ရက်၊ ၂၀၁၆ VOA ညနေပိုင်းအစီအစဉ် အင်တာဗျူးတွင် NLD အစိုးရအဖွဲ့ သာသနာရေးဝန်ကြီး သူရဦးအောင်ကိုမှ မြန်မာနိုင်ငံရှိ အစ္စလာမ် ဘာသာနှင့် ဟိန္ဒူဘာသာ ကိုးကွယ်သူ အများစုမှာ ဧည့်နိုင်ငံသားများ ဖြစ်သည်ဟု အဓိပ္ပါယ် သက်ရောက်သည့် အသုံးအနှုန်းများဖြင့် ပြန်လည် ဖြေကြားခဲ့ပါတယ်။ အဆိုပါ ဧည့်နိုင်ငံသား အသုံးအနှုန်းကြောင့် မြန်မာနိုင်ငံသား အစ္စလာမ်ဘာသာဝင်များအကြား ကန့်ကွက်ဆန့်ကျင်များ ဖြစ်ပေါ်လျက်ရှိပါတယ်။ သူရဦးအောင်ကိုရဲ့ ပြောကြားချက်ကို မြန်မာမွတ်စလင် အစည်းအရုံး မှ ပြင်းထန်စွာကန့်ကွက်တဲ့ ကြေညာချက် တစောင်ကို ဒီကနေ့ ထုတ်ပြန်လိုက်ပါတယ်။ ကြေညာချက် အပြည့်အစုံမှာ အောက်ပါအတိုင်းဖြစ်ပါတယ်။

သာသနာရေးဝန်ကြီး သူရဦးအောင်ကို၏ အစ္စလာမ်သာသနာနှင့် နိုင်ငံသားမွတ်စလင်များအပေါ် သဘောထားကို ပြင်းထန်စွာ ကန့်ကွက်ခြင်း

NLD အစိုးရအဖွဲ့ သာသနာရေးဝန်ကြီး သူရဦးအောင်ကိုက ဧပြီလ ၂ရက်၊ ၂၀၁၆ VOA ညနေပိုင်းအစီအစဉ် အင်တာဗျူးတွင် “ဧည့်နိုင်ငံသားအများစု ကိုးကွယ်သော အစ္စလာမ်ဘာသာ”ဟု သုံးစွဲသွားသည်ကို ဝမ်းနည်းတုန်လှုပ်စွာ ကြားသိရပါသည်။

အစ္စလာမ်သာသနာသည် ၁၉၄၇၊ ၁၉၇၄နှင့် ၂၀၀၈ဖွဲ့စည်းပုံအားလုံးတွင် နိုင်ငံသားများကိုးကွယ်သော သာသနာဖြစ်သည်ဟု အစဉ်တစိုက် အသိအမှတ်ပြု ဂုဏ်ပေးဖော်ပြထားခြင်းခံရသော သာသနာလည်းဖြစ်သည်။ ပုဂံခေတ်မတိုင်ခင်ကတည်းက မြန်မာပြည်တွင် တည်ရှိခဲ့သော သာသနာလည်းဖြစ်သည်။ ဧည့်နိုင်ငံသားအများစု(သို့မဟုတ်) အနည်းစုက ကိုးကွယ်သော သာသနာဟု မည်သည့်နိုင်ငံတော် ဖွဲ့စည်းပုံ၊ မည်သည့်သမိုင်း မှတ်တမ်းတွင်မှ ရေးထိုးထားခြင်းလည်း လုံးဝ မရှိပါ။

ထို့ပြင် ဗုဒ္ဓသာသနာ၊ အစ္စလာမ်သာသနာ၊ ခရစ်ယာန်သာသနာနှင့် ဟိန္ဒူသာသနာတို့အားလုံးသည် နိုင်ငံရပ်ခြားမှ သာသနာချည်းသာဖြစ်ကြပါသည်။ ပြည်တွင်းဖြစ်က နတ်ကိုးကွယ်မှုသာ ရှိပါသည်။

သို့သော် သာသနာတိုင်းသည် လူသားတိုင်းအတွက် ဖြစ်သဖြင့် သာသနာတွင် နယ်နိမိတ်၊ နိုင်ငံ၊ လူမျိုး၊ အသားအရောင်၊ ဆင်းရဲ၊ ချမ်းသာ၊ ခွဲခြားမှု မရှိပါ။ အိမ်ရှင်သာသနာ၊ ဧည့်သည်သာသနာဟူ၍လည်း ယဉ်ကျေးသော မည်သည့်ကမ္ဘာ့လူသားများမှ သုံးစွဲခြင်း၊ အပိုင်စီးခြင်း၊ ခွဲခြားခြင်းမျိုးလည်း မလုပ်ခဲ့ကြပါ။

စစ်အစိုးရအဆက်ဆက် ကမ္ဘာသိ၊ မြန်မာသိ ပြင်းထန်သော ဘာသာရေးအရ ခွဲခြားဖိနှိပ်မှုများကိုလည်း သူရဦးအောင်ကိုက မရှိခဲ့ပါဟု ပြောခဲ့ခြင်းသည်လည်း အင်မတန် စိတ်ပျက်စရာကောင်းနေပါသည်။

ယခုကဲ့သို့ သူရဦးအောင်ကို၏ တာဝန်မဲ့ပြောကြားချက်များကို ပြင်းထန်စွာ ကန့်ကွက်ပါသည်။

NLDသည် ဘာသာစုံ၊ လူမျိုးစုံ နိုင်ငံသားအားလုံးက ဒီမိုကရေစီရေး၊ လူ့အခွင့်အရေး၊ တရားမျှတရေး၊ တန်းတူညီမျှရေးတို့ အတွက် မျှော်လင့်အားကိုးတကြီးဖြင့် တခဲနက်ရွေးချယ် တင်မြှောက်ခံရသော၊ တာဝန်ရှိ၊ တာဝန်ကြီးသည့် ပါတီကြီးဖြစ်ပါသည်။

NLDက ယုံကြည်စိတ်ချစွာဖြင့် သာသနာရေးဝန်ကြီးအဖြစ် တာဝန်ပေးထားသော သူရဦးအောင်ကို၏ သဘောထားသည်၊ နိုင်ငံသား၊ တိုင်းရင်းသား မွတ်စလင်များနှင့် အစ္စလာမ်သာသနာအပေါ် ထင်ဟပ်သော NLDပါတီ၏ သဘောထား မဟုတ်ပါက တရားဝင်ရှင်းလင်းချက် ထုတ်ပြန်ပေးပါရန်လည်း လေးစားစွာ တောင်းဆိုပါသည်။

မြန်မာမွတ်စလင် အစည်းအရုံး
ဧပြီလ ၂၊ ၂၀၁၆