ဝန်ကြီး သူရဦးအောင်ကို၏ ဧည့်နိုင်ငံသား အသုံးနှုန်း ရုပ်သိမ်းပေးရန် UNC ပါတီ မှ သမ္မတထံစာပို့

ဧပြီ ၃၊ ၂၀၁၆
M-Media
မိုးစက်
.
ရန်ကုန်။ ။ ဧပြီလ ၂ ရက်နေ့ညပိုင်း VOA ရုပ်သံဌာနတွင် သာသနာရေး နှင့် ယဉ်ကျေးမှု ဝန်ကြီး သူရဦးအောင်ကိုက “ဧည့်နိုင်ငံသား အများစု ကိုးကွယ်သော အစ္စလာမ်ဘာသာ” ဟုသုံးစွဲခဲ့ခြင်းအပေါ် ရုပ်သိမ်းဖြေရှင်းပေးရန်အတွက် အမျိုးသားညီညွတ်ရေးကွန်ဂရက်ဌာနချုပ် သမ္မတဦးထင်ကျော်ထံသို့ တောင်းဆိုလိုက်ခြင်းဖြစ်ပါတယ်။
.
အဆိုပါ “ဧည့်နိုင်ငံသား အများစု ကိုးကွယ်သော အစ္စလာမ်ဘာသာ” ဟုဝန်ကြီးမှ သုံးနှုန်းခြင်းသည် ဝန်ကြီးတစ်ပါးအနေနှင့် ပေါ့တန်စွာ သုံးနှုန်းသွားခြင်းဖြစ်ပြီး စာရင်းဇယားအထောက်အထားမရှိဘဲ ရမ်းဆပြောခြင်း (သို့မဟုတ်) အမှုအမှတ်မဲ့ပြောဆိုဟန်ဖြင့် ဖျက်ရခက်ခဲစေရန် တမင်ပြောကြားသကဲ့သို့ ဖြစ်သောကြောင့် ခံစားရကြောင်း သမ္မတထံပေးပို့သောစာတွင် ရေးသားထားပါတယ်။
.
အမျိုးသားညီညွတ်ရေးကွန်ဂရက်ဌာနချုပ်မှ အထွေထွေအတွင်းရေးမှူးဖြစ်သူ ဦးထွန်းဝင်းက “NLD အစိုးရ အာဏာရပြီး သုံးရက်မြောက်အကြာမှာ ဒီလိုစကားမျိုးကြားရတော့ ကျွန်တော်တို့တွေ အရမ်းခံစားရပါတယ်။ သမ္မတကြီးကို သူ့လူကို သူထိန်းစေချင်တဲ့ အတွက်ကြောင့် သမ္မတထံကို အခုလို တင်ပြခြင်းဖြစ်ပါတယ်” လို့ M-Media ကိုရှင်းလင်းပြောကြားပါတယ်။
.
စစ်အစိုးရမတိုင်ခင်မှာရော ခုစစ်အစိုးရပြီးတော့ရော မြန်မာမွတ်စလင်တွေက ဘေးဖယ်ခံနေရပြီး NLD ရဲ့ ဆောင်ပုဒ် အတိုင်း ပြောင်းလဲချိန်တန်ပီဆိုတဲ့စကားဟာ တကယ်ကို လက်တွေ့လုပ်ဆောင်ရန် လိုသေးကြောင်း ၎င်းကထပ်လောင်းပြောကြားခဲ့ပါတယ်။
.
ထို့ကြောင့် ဝန်ကြီးသူရဦးအောင်ကို ပြောကြားခဲ့သည့် အဆိုပါစကားသည် NLD ၏မူဝါဒဟု မယုံကြည် လက်မခံနိုင်သည့် အလျောက် သမ္မတကြီးအနေဖြင့် သမ္မတကြီးဦးဆောင်သော အစိုးရအဖွဲ့၏ သဘောထား မဟုတ်ကြောင်းကို ရှင်းလင်းပေးရန်အတွက် သမ္မတသစ် ဦးထင်ကျော်ထံကို ဧပြီလ ၃ ရက်နေ့မှာ တောင်းဆိုလိုက်ခြင်း ဖြစ်ပါတယ်။
.
VOA နှင့် ပြုလုပ်ခဲ့သည့် အင်တာဗျုးတွင် ယခင် အစိုးရများ အုပ်ချူပ်စဉ် ကာလ အချိန်တွင် မြန်မာနိုင်ငံအတွင်း အခြားဘာသာဝင်များကို ဖိနှိပ်ခြင်း ခွဲခြားဆက်ဆံမှုများနှင့် ပတ်သတ်ပြီး မေးမြန်းရာတွင် သူရဦးအောင်ကိုမှ “ဧည့်နိုင်ငံသား အများစုကိုးကွယ်သော အစ္စလာမ်ဘာသာ၊ ဟိန္ဒူဘာသာ အပါအဝင် အခြားဘာသာဝင်တွေအပေါ်မှာတော့ ထူးပြီးတော့ ဖိနှိပ်ချုပ်ချယ်တာမျိုး မရှိခဲ့ပါဘူး” လို့ ပြောဆိုခဲ့ခြင်းလည်း ဖြစ်ပါတယ်။