နိုင်ငံအတွင်းရှိ စားသောက်ဆိုင်များကို ဟာလာအသိအမှတ်ပြုလက်မှတ် ထုတ်ပေးရန် တောင်ကိုရီးယား စီစဉ်

ဧပြီ ၇၊ ၂၀၁၆
M-Media

– ခရီးသွားဧည့်သည်များကို ဟာလာအစားအသောက်များ ၀န်ဆောင်မှုပေးနိုင်ရန်အတွက် တောင်ကိုရီးယား ခရီးသွားလာရေးအဖွဲ့ KTO မှာ နိုင်ငံအတွင်းရှိ စားသောက်ဆိုင်များအား ဟာလာလ်အသိအမှတ်ပြုလက်မှတ် ထုတ်ပေးနိုင်ရေး ကြိုးပမ်းနေသည်ဟု သိရသည်။

စားသောက်ဆိုင်များ၏ အစားသောက် ချက်ပြုတ်တည့်ခင်းမှုကို အခြေခံ၍ သြဂုတ်လအတွင်း ဟာလာအသိအမှတ်ပြုလက်မှတ်များ ထုတ်ပေးရန် စီစဉ်နေခြင်းဖြစ်သည်။ အဆင့် ၅ ဆင့် သတ်မှတ်ထားသည့် အဆိုပါ အသိအမှတ်ပြုလက်မှတ်ကို ကိုရီးယားမွတ်စလင်အသင်းက ထုတ်ပေးသွားမည်ဖြစ်သည်။

KTO ကမူ နိုင်ငံအတွင်းရှိ စားသောက်ဆိုင် ၂၀၀ ခန့်ကို ဟာလာအသိအမှတ်ပြုလက်မှတ် ထုတ်ပေးရန် ရည်ရွယ်ထားပြီး ထိုအစီအစဉ်မှာ မြင့်တက်လာသော မွတ်စလင်ခရီးသွားများ၏ ဟာလာအစားအသောက် တောင်းဆိုမှုကို ဖြည့်ဆည်းပေးရန်လည်း ဖြစ်သည်။

ပြီးခဲ့သည့်နှစ်အတွင်းက တောင်ကိုရီးယားသို့ မွတ်စလင်ခရီးသွား ၇၄၀၀၀၀ ခန့် လာရောက်ခဲ့ပြီး ယခုနှစ်တွင် ၈ သိန်းကျော် လာရောက်မည်ဟု ခန့်မှန်းထားသည်။

ဟာလာဆိုသည်မှာ အသားများတွင် အစ္စလာမ့်နည်းကျ လှီးဖြတ်ထားမှုကို ရည်ညွှန်းပြီး အခြားသော အစားသောက်များတွင် သန့်ရှင်းမှု၊ ကျန်းမာရေးနှင့် ညီညွတ်မှုကို ရည်ညွှန်းသည်။

Ref: IINA