ဆော်ဒီတွင် ၄ လအတွင်း အစ္စလာမ်ကိုလက်ခံသူ အမျိုးသမီး ၄၀၀ အထိ ရှိခဲ့

ဧပြီ ၁၅၊ ၂၀၁၆
M-Media

– ပြီးခဲ့သည့် ၄ လအတွင်း ဆော်ဒီအာရေဗျ၌ အစ္စလာမ်သာသနာကို သက်ဝင်ယုံကြည်ခဲ့သည့် အမျိုးသမီးအရေအတွက်မှာ ၄၀၀ အထိ ရောက်ရှိခဲ့သည်ဟု မိုဟာမက် ဘင် ဆာအွဒ် အစ္စလာမ့်မစ် တက္ကသိုလ်ရှိ ကျောင်းသားများ လေ့လာရေးစင်တာမှ လက်ထောက် အထွေထွေအတွင်းရေးမှူး ဇိုင်နဘ် ဘင်တီ အဘ်ဒူလာ အလ်-ရာဂ်ျဟီက ပြောကြားလိုက်သည်။

ယနေ့တွင် ရီယာ့ဒ်၌ ပြုလုပ်ခဲ့သည့် သစ်လွင်မွတ်စလင်အမျိးသမီးများ ကြိုဆိုပွဲအခမ်းအနားတွင် ထိုကဲ့သို့ ပြောကြားလိုက်ခြင်းဖြစ်ပြီး ဘုရားသခင်၏ သတင်းစကားကို ပြန့်နှံ့အောင် ဆောင်ရွက်ရာတွင် တစ်ဦးချင်းစီနှင့် လူ့အဖွဲ့အစည်းတွင် ရှိနေသည့် တာဝန်ဝတ္တရားများကို သူမ၏ မိန့်ခွန်းတွင် အဓိကထား ပြောကြားခဲ့သည်။

ထို့ပြင် မကောင်းမှုဒုစရိုက်များကို အစ္စလာမ့်ဓမ္မအသိဖြင့် ရှောင်ရှားနိုင်ရေးကိုလည်း အလ်-ရာဂ်ျဟီက မီးမောင်းထိုးပြခဲ့သည်။ ထိုကြိုဆိုပွဲအခမ်းအနားကို ကုရ်အာန်ကျမ်းတော်မြတ်အား ရွတ်ဖတ်၍ ဖွင့်လှစ်ခဲ့ပြီး သစ်လွင်မွတ်စလင်များအား လက်ဆောင်များလည်း ဝေငှခဲ့သည်။

သစ်လွင်မွတ်စလင်တစ်ဦဖြစ်သူ လော်နာက သူမအနေဖြင့် အစ္စလာမ်အား သက်ဝင်ယုံကြည်ခဲ့ပုံကို ပရိတ်သတ်များအား ပြောပြခဲ့သည်။

“အစ္စလာမ်ကို လက်မခံခင်အချိန်တုန်းက ကျွန်မဟာ ကက်သလစ်ဘုရားကျောင်းက ဆရာမတစ်ယောက်ပါ။ နောက်ပိုင်းမှာ ပိုမိုကောင်းမွန်တဲ့ဘ၀ကို ရဖို့အတွက် ဆော်ဒီအာရေဗျမှာ အလုပ်လာလုပ်ခဲ့ပါတယ်။ တစ်နေ့မှာ ကျွန်မရဲ့ အလုပ်ရှင်က စာကြည့်စင်တစ်ခုကို ရှင်းဖို့ပြောလို့ ရှင်းနေရင်း ကုရ်အာန်ကျမ်းတော်မြတ် ဘာသာပြန်ကို တွေ့ခဲ့ပါတယ်။ အလုပ်ရှင်ကို ဖတ်လို့ရမလားလို့ မေးတဲ့အခါမှာ သူက ကြည်ကြည်ဖြူဖြူပဲ ခွင့်ပြုခဲ့ပါတယ်” ဟု လော်နာက ဆိုသည်။

ထို့သို့ ကုရ်အာန်ကျမ်းတော်မြတ်ကို ဖတ်ရှုလေ့လာပြီးနောက်ပိုင်းတွင် အစ္စလာမ်သာသနာအား လက်ခံရန်အတွက် သူမအနေဖြင့် စိတ်အားထက်သန်လာခဲ့သည်။

“နောက်ပိုင်း အစ္စလာမ်ကို ပြောင်းလဲသက်ဝင်ချင်တဲ့ ကျွန်မရဲ့ ဆန္ဒကို အလုပ်ရှင်ကို ပြောခဲ့ပါတယ်။ သူက ကျွန်မကို တရားဟောဆရာတစ်ဦးစီ ခေါ်သွားပြီး၊ တရားဟောဆရာက ရှာဟာဒသ် (အစ္စလာမ်ကို သက်ဝင်ယုံကြည်သည့်အခါ ရွတ်ဖတ်ရသည့် သက်သေခံချက်) ကို သင်ပေးခဲ့ပါတယ်။ ဒီနေ့မှာတော့ ကျွန်မဟာ မွတ်စလင်တစ်ယောက်ဖြစ်ရတာကို ဂုဏ်ယူနေမိပါပြီ”

Ref: Arabnews