ရ၀မ်ဒါပြည်တွင်းစစ်နှင့် လူမျိုးတုန်းသတ်ဖြတ်မှုတွင် အစ္စရေးလက်ချက်မကင်း

ဧပြီ ၁၆၊ ၂၀၁၆
M-Media

– ၁၉၉၀ ပြည့်နှစ်တွေက ရ၀မ်ဒါနိုင်ငံမှာဖြစ်ပွားခဲ့တဲ့ ပြည်တွင်းစစ်နဲ့ လူမျိုးတုန်းသတ်ဖြတ်မှုအတွင်းမှာ အစ္စရေးက လက်နက်တင်ပို့ခဲ့မှုနဲ့ပတ်သက်တဲ့ အထောက်အထားတွေကို ထုတ်ပြန်ဖို့ တောင်းဆိုချက်ကို အစ္စရေး တရားရုံးချုပ်က ပယ်ချလိုက်ပါတယ်။

လွန်ခဲ့တဲ့ ၂ နှစ်က ပရော်ဖက်ဆာ ယာအီရ် အူရွန်နဲ့ ရှေ့နေ အီတေး မက်တို့က သတင်းအချက်အလက် လွတ်လပ်ခွင့်အရ ၁၉၉၀ ခုနှစ်ကနေ ၁၉၉၅ ခုနှစ်အထိ ဖြစ်ပွားခဲ့တဲ့ ရ၀မ်ဒါ ပြည်တွင်းစစ်မှာ အစ္စရေးရဲ့ လက်နက်တင်ပို့မှုအတွက် စာရွက်စာတမ်းတွေကို အများပြည်သူသိအောင် ထုတ်ပြန်ဖို့ အစ္စရေး ကာကွယ်ရေးဝန်ကြီးဌာနကို တောင်းဆိုခဲ့တာပါ။

၁၉၉၄ ခုနှစ်မှာဖြစ်ပွားခဲ့တဲ့ ရက် ၁၀၀ လူမျိုးတုန်းသတ်ဖြတ်မှုမှာ လူပေါင်း ၈ သိန်းကနေ ၁ သန်းအထိ သေဆုံးခဲ့ကြပြီး အများစုကတော့ တွတ်ဆီလူမျိုးတွေ ဖြစ်ကြပါတယ်။ အဲဒီလူမျိုးတုန်းသတ်ဖြတ်မှုမှာ အစ္စရေးလုပ် ၅.၅၆ မမ ကျည်ဆံတွေ၊ ရိုင်ဖယ်တွေ၊ လက်ပစ်ဗုံးတွေ အသုံးပြုခဲ့တယ်လို့ စွပ်စွဲခံထားရပါတယ်။

ဒါပေမယ့် ဒီကိစ္စနဲ့ပတ်သက်တဲ့ အသေးစိတ်အချက်အလက်တွေကတော့ ထွက်လာခဲ့ခြင်းမရှိပဲ ယာအီရ် အူရွန်နဲ့ အီတေး မက်တို့ရဲ့ တောင်းဆိုချက်ကိုလည်း အစ္စရေး ကာကွယ်ရေးဝန်ကြီးဌာနနဲ့ တဲလ်အဗီး ခရိုင်တရားရုံးတို့က ငြင်းပယ်ခဲ့ပြီး ဒီလို အထောက်အထားတွေ ထုတ်ပြန်လိုက်ရင် အစ္စရေးရဲ့ လုံခြုံရေးနဲ့ နိုင်ငံတကာ ဆက်ဆံရေးတွေကို ထိခိုက်သွားနိုင်တယ်လို့ ပြောကြားခဲ့ပါတယ်။

အစ္စရေး တရားရုံးချုပ်ကလည်း ရ၀မ်ဒါလူမျိုးတုန်းသတ်ဖြတ်မှုမှာ အစ္စရေးက လက်နက်တွေတင်ပို့ခဲ့တဲ့ အသေးစိတ် အချက်အလက်ကို ထုတ်ပြန်ဖို့ကိစ္စကို ပယ်ချခဲ့ပါတယ်။

မစ္စတာ မက်ကတော့ ဒီဆုံးဖြတ်ချက်ဟာ မှားယွင်းပြီး အကျင့်ပျက်တဲ့ ဆုံးဖြတ်ချက်မျိုးဖြစ်ကာ ကြားနာမှုအတွင်းမှာလည်း အစ္စရေးက ရ၀မ်ဒါလူမျိုးတုန်းသတ်ဖြတ်မှုအတွင်း လက်နက်တွေ တင်ပို့ခဲ့တယ်ဆိုတာကို မငြင်းခဲ့ဘူးလို့ ထောက်ပြခဲ့ပါတယ်။ နောက်ပြီး မိမိအနေနဲ့ ဒီကိစ္စအဖြစ်မှန် ပေါ်ထွက်လာဖို့အတွက် ဆက်လက်တိုက်ပွဲဝင်သွားမယ်လို့ ထည့်သွင်းပြောကြားခဲ့ပါတယ်။

Ref: Independent