ပြောစကားကို ချက်ခြင်းဘာသာပြန်ဆိုပေးနိုင်မည့် ဖုန်ဆော့ဖ်ဝဲတစ်ခုကို မော်ရိုကန်တစ်ဦး တီထွင်

ဧပြီ ၁၉၊ ၂၀၁၆
M-Media

– တစ်ယောက်နဲ့ တစ်ယောက်ဖုန်းပြောဆိုတဲ့အခါ မိမိပြောသမျှစကားတွေကို တခြားဘာသာစကားတစ်ခုဆီ ချက်ခြင်း တိုက်ရိုက်ဘာသာပြန်ဆိုပေးနိုင်မယ့် ဖုန်းဆော့ဖ်ဝဲတစ်ခုကို မော်ရိုကိုနိုင်ငံသားတစ်ဦးက တီထွင်လိုက်တယ်လို့ သိရပါတယ်။

တီထွင်ခဲ့သူကတော့ တာဟာရ် တာအီဖြစ်ပြီး သုံးနှစ်ကြာအချိန်ယူခဲ့ရကာ ပြင်သစ်နဲ့ ကမ္ဘာလုံးဆိုင်ရာ မူပိုင်ခွင့်အဖွဲ့ချုပ်မှာ မူပိုင်ခွင့်တင်ထားတယ်လို့ ဆိုပါတယ်။ အဲဒီဆော့ဖ်ဝဲ အမည်နဲ့ ထွက်ရှိမယ့်နေ့ရက်ကိုတော့ မသိရှိရသေးပါဘူး။

တီထွင်သူ တာအီရဲ့ မကြာမီကပြုလုပ်ခဲ့တဲ့ သတင်းစာရှင်းလင်းပွဲမှာတော့ အဆိုပါဆော့ဖ်ဝဲအသစ်က ဖုန်းပြောစဉ်အတွင်းမှာ တိုက်ရိုက်ဘာသာပြန်နိုင်သလို၊ ဖုန်းပြောဆိုမှုပြီးတဲ့နောက်ပိုင်း အသံသွင်းထားတဲ့ ဘာသာပြန်ကိုလည်း နားထောင်နိုင်ကာ မိုဘိုင်းဆက်သွယ်ရေး အနာဂတ်မျိုးဆက်သစ်ဆီ ခေါ်ဆောင်သွားမယ့် ဆော့ဖ်ဝဲတစ်ခုဖြစ်တယ်လို့ ပြောကြားခဲ့ပါတယ်။

ဖုန်းမပြောခင်ဆော့ဖ်ဝဲကိုဖွင့်ထားဖို့လိုအပ်ပြီး မိမိဘာသာပြန်ဆိုချင်တဲ့ ဘာသာစကားကို ရွေးချယ်ပေးထားရမှာ ဖြစ်ပါတယ်။ ဘာသာပြန်အသံဖမ်းထားနိုင်ဖို့ အာရဗီဘာသာစကားအပါအ၀င် ဘာသာစကားအမျိုးပေါင်း ၁၀၀ ကျော် ထည့်သွင်းထားတဲ့ အသံအဘိဓာန်တစ်ခုလည်း အဲဒီဆော့ဖ်ဝဲမှာ ပါဝင်ပါတယ်။

တာအီက ဒီဆော့ဖ်ဝဲဟာ ကျန်းမာရေး၊ ပညာရေး၊ ခရီးသွားလာရေး၊ နိုင်ငံရေးကဏ္ဍတွေနဲ့ တခြားကဏ္ဍအသီးသီးက အလုပ်လုပ်သူတွေအတွက် အထောက်အကူဖြစ်စေမယ်လို့ မျှော်လင့်ထားကြောင်း ပြောကြားခဲ့ပါတယ်။

တာအီဟာ မရာကတ်အနီး အက်ဆ်ဖီမြို့ဇာတိဖြစ်ပြီး ၁၉၈၄ ခုနှစ်က သတင်းအချက်အလက် သိပ္ပံဆိုင်ရာ အင်ဂျင်နီယာဒီပလိုမာဘွဲ့ ရရှိထားသူ ဖြစ်ပါတယ်။

Ref: IINA