” NLD အစိုးရမှာ ဘာသာရေးခွဲခြားတာ လုံးဝ မရှိဘူး” လို့ ရှေ့နေကြီး ဦးကိုနီပြော

ဧပြီ ၂၀ ၊ ၂၀၁၆
M-Media
သီဟ

၂၀၁၅ ရွေးကောက်ပွဲတွင်အနိုင်ရ ရှိပြိး တရားရေး မဏ္ဍိုင်၊ အုပ်ချူပ်ရေး မဏ္ဍိုင်တို့မှာ လုပ်ပိုင်ခွင့် အများစု ရရှိထားတဲ့ NLD အစိုးရ အနေနဲ့ ဘာသာရေး ခွဲခြားတာ လုံးဝ မရှိဘူးလို့ NLD ရဲ့ ဥပဒေ အကြံပေး တရားလွှတ်တော် ရှေ့နေကြီး ဦးကိုနီက BBC နဲ့ တွေ့ဆုံ မေးမြန်းခန်း တရပ်မှာ ပြောကြားလိုက်ပါတယ်။

ဒေါ်အောင်ဆန်းစုကြည် ဦးဆောင်တဲ့ NLD အစိုးရ တက်လာပြီး  အမှုစစ်ဆေးဆဲ နိုင်ငံရေး အကျဉ်းသား တွေနဲ့ ပြစ်ဒဏ် ချမှတ်ပြီးသား နိုင်ငံရေး အကျဉ်းသားတွေကို အစိုးရသစ်က လွှတ်ပေးခဲ့ပါတယ်။

ဒါပေမဲ့ တချို့သူတွေ လွတ်မလာသေးဘဲ ကျန်ရစ်နေကြပါတယ်။ အဲသလို ကျန်တာဟာ ဥပဒေကြောင်းအရ အခက်အခဲရှိလို့လား။

အမျိုးသားဒီမိုကရေစီ အဖွဲ့ချုပ်ရဲ့ ဥပဒေ အကြံပေး ဦးကိုနီကို BBC က ဆက်သွယ် မေးမြန်းခဲ့တာဖြစ်ပါတယ်။

BBC သတင်းထောက်က မန္တလေး အခြေစိုက် သင့်မြတ်လိုသူများ ဘာသာပေါင်းစုံ  ပရဟိတ အဖွဲ့မှ ကိုဇော်ဇော်လတ်နှင့် မပွင့်ဖြူလတ်တို့ မလွတ်မြောက်သေးတဲ့ အကြောင်းမေးမြန်းခဲ့ရမှာတော့ ဦးကိုနီက အောက်ပါအတိုင်း ဖြေကြားခဲ့တာ ဖြစ်ပါတယ်။

“သူတို့ကတော့ ပြစ်ဒဏ်ကျခံသွားရပြီ ဖြစ်တဲ့အတွက် ၂၀၄(က) အရ အချိန်မရွေးလွှတ်ပေးလို့ ရသွားပြီ ၊ သမ္မတ ရဲ့ လုပ်ပိုင်ခွင့်ထဲကို ရောက်သွားပြီ ၊ အမှုရုပ်သိမ်းစရာ မလိုတော့ဘူး။ ဒါတွေဟာ နောက်တသုတ်မှာမှ ပါလာလိမ့်မယ်လို့ တူပါတယ်။ စီစစ်ဆဲ လို့ ကျနော်ယူဆတယ်။ တချို့တော်တော်များများက တော့ အွန်လိုင်းမှာ ပြောနေကြတယ်။ မွတ်စလင်မို့လို့ ဆိုပြီး .. ဒါတော့ လုံးဝ မဟုတ်ဘူးလို့ ကျနော်ပြောရဲပါတယ်။ ဘာဖြစ်လို့လဲ ဆိုတော့ ဒီ NLD အစိုးရမှာ ဘာသာရေး ခွဲခြားတာ လုံးဝ မရှိဘူး။ အဲဒါတော့ ကျနော်ကိုယ်တိုင် မွတ်စလင်မ် တယောက် ၊ ကျနော်ကိုယ်တိုင် ပါတီမှာ ထဲထဲ ဝင်ဝင်လုပ်နေတဲ့ အတွက် ကျနော်သိပါတယ်။ ”