နှစ် ၁၀၀ သက်တမ်းရှိ ကုရ်အာန်မိတ္တူကို တူရကီတွင် ကန်ဒေါ်လာ ၈ သောင်းနီးပါးဖြင့် လေလံတင်နိုင်

ဧပြီ ၂၁၊ ၂၀၁၆
M-Media

– အော်တိုမန်အင်ပါယာ သက်တမ်းကုန်ဆုံးချိန်ဖြစ်တဲ့ လွန်ခဲ့တဲ့ နှစ်ပေါင်း ၁၀၀ ကျော်က ရေးသားခဲ့တဲ့ ကုရ်အာန်ကျမ်းတော်မြတ် မိတ္တူမှန်တစ်အုပ်ကို တူရကီနိုင်ငံ အစ္စတန်ဘူလ်မြို့မှာ လေလံတင်ရောင်းချခဲ့ရာ ဒေါ်လာ ၈၀၀၀၀ နီးပါးနဲ့ ရရှိခဲ့တယ်လို့ သိရပါတယ်။

အဲဒီလေလံပွဲကို အစ္စတန်ဘူလ်မြို့တွင်းက ဟိုတယ်တစ်ခုမှာ ကျင်းပခဲ့တာဖြစ်ပြီး အော်တိုမန်အင်ပါယာခေတ်က သရုပ်ဖော်ပုံများ၊ ပန်းချီကားတွေနဲ့ လက်ရေးမူပေါင်းများစွာကို လေလံတင်ခဲ့တာ ဖြစ်ပါတယ်။

ဒေါ်လာ ၈ သောင်းနီးပါးရခဲ့တဲ့ အဲဒီ ကုရ်အာန်ကျမ်းတော်မြတ်ကို အဲ့ဒီခေတ်မှာ အထင်ရှားဆုံး လက်ရေးလက်သားအလှ ပညာရှင်တွေထဲက တစ်ဦးဖြစ်တဲ့ ဟာစန် ဆဘ်ရီက ရေးသားခဲ့တာ ဖြစ်ပါတယ်။ အာရဗီလက်ရေးလှ အမျိုးအစားတစ်မျိုးဖြစ်တဲ့ ‘ဇူလူသ်’စာလုံးနဲ့ ရေးသားခဲ့တာဖြစ်ပြီး ၂၄ ကာရက်ရှိတဲ့ ရွှေနဲ့ အုပ်ထားတာ ဖြစ်ပါတယ်။

တူရကီနိုင်ငံ တည်ထောင်စဉ်အတွင်းက နာမည်ကြီးလက်ရေးလှပညာရှင်တစ်ဦးဖြစ်တဲ့ အဟ်မဒ် ကာမီလ် အက်ဒစ်က ‘ဇူလူသ်’စာလုံးအမျိုးအစားနဲ့ ရေးသားခဲ့တဲ့ ဆုတောင်းစာကားချပ်တစ်ခုကို ကန်ဒေါ်လာ ၁၄၀၀၀ နီးပါးနဲ့ ရောင်းချနိုင်ခဲ့ပါတယ်။

ဆူလ်တန် အဘ်ဒူလ် ဟာမစ် ၂ လက်ထက်က ရွှေရည်သားအုပ်ထားတဲ့ ကြွေခွက်တစ်စုံလည်း လေလံတင်တဲ့အထဲမှာ ပါဝင်ခဲ့ပါတယ်။

Ref: IINA