ဇီကာကိုတိုက်ဖျက်မယ့် ခြင်ဖမ်းစက်ကို ဘရာဇီးလ်တီထွင်

ဧပြီ ၂၃၊ ၂၀၁၆
M-Media

– ဇီကာဗိုင်းရပ်စ်အန္တရာယ်ကို တိုက်ဖျက်ဖို့ အားထုတ်မှုတစ်ခုအနေနဲ့ ခြင်တွေကို မျှားခေါ်ပြီး သတ်ပစ်နိုင်တဲ့ ခြင်ဖမ်းစက် ဘုတ်ပြားတစ်မျိုးကို အောင်မြင်စွာ တီထွင်နိုင်ခဲ့တယ်လို့ ဘရာဇီးကုမ္ပဏီနှစ်ခုက ဗုဒ္ဓ္ဓဟူးနေ့မှာ ကြေငြာခဲ့ပါတယ်။

အဆိုပါဘုတ်ပြားကနေ လူတွေအသက်ရှုထုတ်တဲ့အခါ ထွက်ရှိတဲ့ ကာဗွန်ဒိုင်အောက်ဆိုက်နဲ့ လူ့ချွေးအနံ့နဲ့ဆင်တူတဲ့ လက်တစ်အက်ဆစ်ဒြပ်နှောတစ်မျိုးကို ထုတ်လွှတ်ပေးကာ ခြင်တွေကို မျှားခေါ်တာဖြစ်ပါတယ်။

ဒီစက်ကို တီထွင်သူတွေက ပြုလုပ်နည်းအသေးစိတ်ကို အခမဲ့ဖြန့်ချီခဲ့ပြီး ကမ္ဘာတစ်ဝှမ်းက လူတွေကိုလည်း ဒီအတိုင်းပြုလုပ်သွားဖို့လည်း တိုက်တွန်းခဲ့ပါတယ်။ ဒါပေမယ့် ကျွမ်းကျင်သူတစ်ဦးကတော့ လူအများအပြားရှိနေနိုင်တဲ့ နေရာတွေကသာ အင်းဆက်တွေရောက်လာဖို့ ဆွဲဆောင်နိုင်တဲ့နေရာဖြစ်တယ်လို့ ပြောကြားခဲ့ပါတယ်။

အဲဒီခြင်ဖမ်းဆက်ကို တီထွင်ခဲ့တဲ့ Posterscope နဲ့ NBS ကုမ္ပဏီတွေက သူတို့ရဲ့အားထုတ်မှုဟာ ခြင်ကတစ်ဆင့်ကူးစက်တဲ့ ဇီကာဗိုင်းရပ်စ်ကို တိုက်ဖျက်ဖို့ ကူညီပေးနိုင်တယ်လို့ ယုံကြည်နေပါတယ်။ ဘုတ်ပြားပေါ်က ထုတ်လွှတ်ပေးတဲ့ အနံ့ဟာ ၂.၅ ကီလိုမီတာအကွာက အင်းဆက်တွေကို ဆွဲဆောင်နိုင်တယ်လို့လည်း သူတို့က ပြောကြားခဲ့ပါတယ်။

“အထူးသဖြင့် အခုလိုကိရိယာမျိုးဟာ သွေးစုပ်တဲ့ခြင်အမတွေကိုသာ ဆွဲဆောင်သတ်ပစ်နိုင်ပါတယ်။ ခြင်အမတွေသာ လူတွေကို ကိုက်တာပါ” လို့ ဆော့သ်ဟမ်တန်တက္ကသိုလ်က အင်းဆက်ထိန်းချုပ်ရေးပညာရှင် ခရစ် ဂျက်ဆန်က ပြောကြားခဲ့ပါတယ်။

ဒါပေမယ့် အဲဒီခြင်ဖမ်းစက်ကို လူများတဲ့နေရာတွေမှာ ထားမယ်ဆိုရင်တော့ အလုပ်ဖြစ်မှာမဟုတ်ဘူးလို့လည်း ၎င်းက ထည့်သွင်းပြောကြားခဲ့ပါတယ်။

“ကျွန်တော်နည်းနည်းစိုးရိမ်နေတာ ရှိပါတယ်။ တကယ်လို့ အဲ့ဒါဟာ လူတွေနဲ့ ထိတွေ့နိုင်ခြေများတဲ့ လူနေမှုသိပ်သည်းတဲ့ နေရာမျိုးမဟုတ်ရင်တော့ ကိစ္စမရှိပါဘူး။ နို့မို့ဆိုရင်တော့ ဗိုက်ဆာနေတဲ့ ခြင်တွေအတွက် လူသားတွေက စားကျက်တွေ ဖြစ်သွားပါလိမ့်မယ်”

Ref: IINA