FWA မှ ရွေးချယ်သည့် အကောင်းဆုံး ကစားသမားဆုကို ဗာဒီရရှိ

မေ ၂၊ ၂၀၁၆
M-Media

– ပရီးမီးယားလိဂ်ချန်ပီယံဖြစ်ရန် လက်တစ်ကမ်းအလိုတွင်ရှိနေသည့် လက်စတာစီးတီးအသင်း၏ တိုက်စစ်မျူး ဂျာမီ ဗာဒီမှာ ဘောလုံးအားကစားကလောင်ရှင်များအသင်း FWA မှ ရွေးချယ်ချီးမြှင့်သော ၂၀၁၅-၁၆ ဘောလုံးရာသီ အကောင်းဆုံး ကစားသမားဆုကို ရရှိခဲ့သည်ဟု သိရသည်။

အဆိုပါဆုကို ယနေ့တွင် ကြေငြာခဲ့ခြင်းဖြစ်ပြီး အင်္ဂလန်တိုက်စစ်မှူး ဗာဒီမှာ PFA ၏ တစ်နှစ်တာအကောင်းဆုံး ကစားသမားဆုကို ပူပူနွေးနွေး ရရှိထားသည့် အသင်းဖော် ရီယာ့ဒ် မဟ်ရက်ဇ်နှင့် အန်ဂိုလို ကန်တီတို့ကို ကျော်ဖြတ်ကာ ရရှိခဲ့ခြင်းဖြစ်သည်။ ဗာဒီမှာ ယခုနှစ်တွင် လက်စတာအတွက် ၂၂ ဂိုး သွင်းယူပေးထားသည်။

“ဒီလို ဂုဏ်သိက္ခာကြီးမားတဲ့ဆုကို ရရှိတဲ့အတွက်နဲ့ မယုံနိုင်လောက်အောင်ကောင်းတဲ့ ကစားသမားတွေ ပါဝင်ခဲ့တဲ့ ဒီဆုရဲ့ စာရင်းမှာ ပါဝင်ခွင့်ရတဲ့အတွက် အရမ်း ဂုဏ်ယူမိပါတယ်။ ဘောလုံးအားကစား ကလောင်ရှင်များအသင်းက အားလုံးနဲ့ မဲပေးခဲ့သူတိုင်းကို ကျေးဇူးတင်ပါတယ်။ အသင်းဖော်တွေကိုလည်း ကျေဇူးတင်ပါတယ်။ သူတို့ကြောင့်ပဲ ဒီလိုဆုမျိုးကို ကျွန်တော် ရရှိနိုင်တာပါ။ ဒီရာသီဟာ လက်စတာက ကျွန်တော်တို့အားလုံးအတွက် အံ့သြစရာကောင်းတဲ့ ရာသီပါပဲ။ ကျွန်တော်တို့ဟာ တစ်ဦးကောင်းမဟုတ်ဘဲ အသင်းလိုက်စားပုံကို အခြေခံထားတာပါ။ နည်းပြ၊ ၀န်ထမ်းအားလုံးနဲ့ ကျွန်တော့်ကို အားပေးကြတဲ့ ပရိတ်သတ်တွေကိုလည်း ကျေးဇူးတင်ပါတယ်” ဟု ဗာဒီက ဆုရရှိမှုနှင့်ပတ်သက်၍ ကျေဇူးတင်စကား ပြောကြားခဲ့သည်။

Ref: Goal