“အပြောင်းအလဲထဲက ပညာရေး”

စက်တင်ဘာ၊ ၆ ၊ ၂၀၁၂

M-Media

ကျော်ဆန်း (Eduzone)

တစ်ခါတုန်းကပေါ့ ……

ဆရာအလုပ်ဆိုတာ လူရိုသေ၊ ရှင်ရိုသေအလုပ်ဖြစ်ခဲ့ဖူးတယ်။ ရွာဦးကျောင်းဆရာတော်ပြီးရင် ဆရာ/ဆရာမတွေရဲ့နေရာဖြစ်ခဲ့တယ်။ ကလေးတွေသာမက ကလေးမိဘတွေကိုတောင် ဆိုဆုံးမနိုင်တဲ့ အနေအထားမှာရှိတယ်။

ဆရာ/ဆရာမဆိုတာလည်း ပညာပြည့်ဝ နှလုံးလှခဲ့ကြသူတွေများတယ်။ အခုတော့ ဒီအလုပ်က မျှော်လင့်ချက်မဲ့တဲ့ အလုပ်ဖြစ်နေပြီ။ ဘယ်အလုပ်မှ မရတဲ့အဆုံး ဘယ်တက္ကသိုလ်မှ သွားဖို့အဆင်မပြေတဲ့အခါ ၀င်လုပ်ရမယ့်အလုပ်ဖြစ်နေပြီ။ မိဘတွေက သမီးတွေကို အဝေးမလွှတ်ချင်လို့ ၀င်လုပ်ခိုင်းတဲ့ အလုပ်ဖြစ်နေပြီ။ မျှော်လင့်ချက်ကြီးကြီးရှိတဲ့ လူငယ်လူရွယ်တွေ စိတ်မ၀င်စားတဲ့အလုပ်ဖြစ်နေပြီ။ လူတွေကလည်း ဆရာ/ဆရာမ ဆိုရင် အယုံအကြည်မရှိချင်ကြတော့ဘူး။ အရည်အချင်းမရှိတဲ့သူတွေ၊ ကလေးတွေဆီက ငွေရချင်နေတဲ့သူတွေလို့ပဲ မြင်လာနေကြတယ်။ ပြည်သူ့ကောင်းကျိုးအတွက် ဘာမှထူးထွေပြီး လုပ်ပေးနိုင်မယ့်သူတွေမဟုတ်လို့ ခံယူကြပုံရတယ်။

ဒါတွေကိုပြောင်းလဲပစ်ရလိမ့်မယ်။ ဆရာ/ဆရာမတွေအကျိုးအတွက်သာမဟုတ် တိုင်းပြည်အကျိုးအတွက်ပါ မျှော်လင့်ရင် ဒီအခြေအနေတွေကို ပြောင်းကို ပြောင်းလဲပစ် ရလိမ့်မယ်။ နိုင်ငံတစ်နိုင်ငံရဲ့ အတက်အကျ အပြောင်းအလဲတွေကို ဆရာ/ဆရာမတွေက ဖန်တီးနေတယ်။ တိုင်းပြည်ကို ဆရာ/ဆရာမတွေက ပုံဖော်နေတယ်ဆိုတဲ့အချက်ကို ယုံကြည်ကြတယ်ဆိုရင်ပေါ့။ (မယုံရင်လည်း ကမ္ဘာ့သမိုင်းကို ပြန်လည်သုံးသပ်ပါလို့ ပြောရလိမ့်မယ်။)

ဒီတော့ နိုင်ငံတည်ဆောက်ဖို့ လူ့ဘောင်တစ်ရပ်စည်ပင်ဖြစ်ထွန်းဖို့ဆိုရင် အရည်အသွေးမြင့် ဆရာ/ဆရာမတွေ မွေးထုတ်ဖို့ လိုလိမ့်မယ်။ ဆရာအလုပ်ကို မျှော်လင့်ချက်ရှိတဲ့ အလုပ်၊ တိုင်းပြည်အတွက် အဖိုးတန်တဲံအလုပ်ဆိုတဲ့ ယုံကြည်မှုမျိုးရအောင် တည်ဆောက်ကြရလိမ့်မယ်။

တက္ကသိုလ်ဝင်တန်းမှာ အမှတ်ကောင်းကောင်းနဲ့အောင်တဲ့သူတွေ ပညာရေးတက္ကသိုလ်လျှောက်ထားချင်လာအောင် ဆွဲဆောင်ရလိမ့်မယ်။ လိုအပ်တဲ့ဖြည့်ဆည်းမှု၊ ထောက်ပံ့မှုတွေပေးရမယ်။ ပညာရေးတက္ကသိုလ်တွေကို ကျောင်းသားတိုင်းလျှောက်ထားချင်ကြတဲ့တက္ကသိုလ်တွေဖြစ်အောင် အဆင့်မြင့်တင်ပေးရမယ်။

တက္ကသိုလ်ကနေ အမှတ်ကောင်းကောင်းနဲ့ အောင်မြင်ကြသူတွေလည်း ဆရာဖြစ်သင်တန်းတွေ တက်ချင်လာအောင် ဆွဲဆောင်ရမယ်။ ဆရာအလုပ်ဆိုတာ ထိပ်တန်း အရည်အချင်းရှိသူတွေရဲ့အလုပ်ဖြစ်အောင် ဖန်တီးကြရမယ်။

ပညာရေးအဆင့်အတန်း ကမ္ဘာ့ထိပ်တန်းရှိတဲ့ ဖင်လန်နိုင်ငံမှာ အတော်ဆုံးကျောင်းသားတွေရဲ့ ၁၀% လောက်ပဲ ဆရာဖြစ်သင်တန်းလျှောက်ထားနိုင်တယ်။ ဒီထဲကမှ ၅%လောက်ပဲ အထူးကျွမ်းကျင်တဲ့ ဆရာ/ဆရာမတွေအဖြစ်မွေးထုတ်ပေးနိုင်တယ်။ အထက်တန်းဆင့်မှာသင်ဖို့ဆိုရင် မဟာဘွဲ့ပြီးထားတဲ့သူတွေဖြစ်ရတယ်။ ဒီလိုလေ့ကျင့်ပေးခဲ့လို့လဲ ဥရောပရဲ့ ထိပ်တန်း၊ ကမ္ဘာ့ထိပ်တန်းအဆင့်ကို ရောက်နိုင်တာဖြစ်တယ်။

မြန်မာနိုင်ငံအနေနဲ့လည်း ဖင်လန်၊ ဂျပန်၊ တောင်ကိုရီးယား စတဲ့ ပညာရေးကောင်းတဲ့နိုင်ငံတွေ၊ ထိုငး၊ မလေးရှား၊ စင်္ကာပူတို့လို အာဆီယံနိုင်ငံတွေကနေ အတုယူနိုင်ရင်ကောင်းမယ်။

တက္ကသိုလ်အမှတ်ကောင်းရခဲ့တဲ့သူတွေကို ပညာရေး(၁)နှစ်သင်တန်းပေးပြီးရင် မက်လုံးရှိတဲ့လစာမျိုးနဲ့ အစိုးရကျောင်းတွေမှာ တိုက်ရိုက်ခန့်ထားနိုင်ရင် ဆရာလိုအပ်ချက်လျော့ချနိုင်မယ်။ အရည်အချင်းရှိတဲ့ ဆရာ/ဆရာမတွေ ရလာနိုင်မယ်။ ဘွဲ့အလိုက် လစာပေးတဲ့စနစ် ကျင့်သုံးနိုင်ရန်ကောင်းမယ်။ ဘွဲ့၊ ဒီပလိုမာ၊ မဟာဘွဲ့၊ ဒေါက်တာဘွဲ့တွေအတွက် သီးခြားခံစားခွင့်တွေပေးရမယ်။ ဘယ်အဆင့်မှာပဲဝင်လုပ်လုပ် ဘွဲ့အလိုက်ခံစားခွင့်ပေးမယ်ဆိုရင် ပညာရေးလောကအတွက် ကြီးမားတဲ့ အပြောင်းအလဲတစ်ခုတော့ ဖြစ်လာမယ်လို့ ယုံကြည်မိကြောင်းပါ . . . ။