မုန်းဝန်း(တရုတ်) များက မုန်းဝန်း(ဗမာ)ဟု မှတ်ပုံတင်ထဲတွင်ထည့်သွင်းပေးဖို့တောင်းဆိုမှုကြောင့် ထည့်သွင်းပေးခဲ့ခြင်းသာဖြစ်ကြောင်း လ၀က၀န်ကြီးဆို

M-Media
မေလ ၅ ရက်၊ ၂၀၁၆

Photo: ၁၉၈၀ ဝန်းကျင်က တားမိုးညဲဒေသနေ မုန်းဝန်းလူမျိုးများ (mmtimes)

ရှမ်းပြည်မြောက်ပိုင်း တားမိုးညဲဒေသနေ ပြည်သူအချို့ကို လ၀က က မုန်းဝန်း(တရုတ်) လူမျိုးမှ မုန်းဝန်း(ဗမာ) တိုင်းရင်းသား လူမျိုး တစ်မျိုးအဖြစ် တရားဝင် အတည်ပြုပေးကြောင်း သိရှိရသဖြင့် မည်သည့် အကြောင်းများကြောင့် တရားဝင် အသိအမှတ် ပြုခဲ့ပါသနည်း၊ မြန်မာနိုင်ငံတွင် နေထိုင်ကြသော လူမျိုး တစ်မျိုးမျိုးက တိုင်းရင်းသား လူမျိုး တစ်မျိုးမျိုး အဖြစ် အမည် ပြောင်းလဲ သတ်မှတ်လိုပါက ဆောင်ရွက်ပေးနိုင်ခြင်း ရှိ၊ မရှိ၊ ရှိပါက မည်သည့် အကြောင်းချက်များဖြင့် သတ်မှတ် ဆောင်ရွက် အတည်ပြု ပေးနိုင်ပါမည်နည်း၊ လူမျိုးအမည် သတ်မှတ်ခြင်းနှင့် ပတ်သက်၍ နိုင်ငံတော် အစိုးရက မည်ကဲ့သို့ မူဝါဒ ချမှတ် ဆောင်ရွက် ထားပါသနည်း၊ မည်သည့် ဥပဒေ၊ မည်သည့် လုပ်ထုံး လုပ်နည်းများဖြင့် သတ်မှတ် ဆောင်ရွက်ပေးနိုင်သည်တို့ကို သိလိုခြင်းနှင့် စပ်လျဉ်းသည့် မေးခွန်းကို သီပေါ မဲဆန္ဒနယ်မှ ဦးစိုင်းသန့်စင်က ယနေ့ (မေ ၄ ရက်) ပြည်သူ့လွှတ်တော် အစည်းအဝေး၌ မေးမြန်းခဲ့သည်။

ဦးစိုင်းသန့်စင်၏ မေးမြန်းမှုကို အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အား ဦးစီးဌာန ပြည်ထောင်စု ၀န်ကြီး ဦးသိန်းဆွေက မှတ်ပုံတင်တွင် ကာယကံရှင်များ၏ တရားဝင်ပြောဆိုမှုအတိုင်း ရေးသွင်းခဲ့ခြင်းဖြစ်ကြောင်း၊ ထိုသို့ရေးသွင်းမှုကို တရားဝင်မသတ်မှတ်ကြောင်း၊ မုန်းဝန်း(တရုတ်) ၈ မျိုးရှိပြီး ထို ၈ မျိုးက သူတို့ကိုယ်သူတို့ သတ်မှတ်သည့်အမည်အပေါ်မူတည်၍ ကွဲပြားနေကြောင်း၊ မုန်းဝန်း ၈ မျိုးကိုပေါင်းပြီး မုန်းဝန်း(ဗမာ)ဟု ပြုလုပ်ပေးခဲ့ကြောင်း ဖြေကြားခဲ့ပါသည်။