ချန်ပီယံလိဂ်ဗိုလ်လုပွဲရောက် ရီးယဲလ်အသင်းမှ ဖွင့်ဟသံများ

မေ ၅၊ ၂၀၁၆
M-Media

– ဒီနေ့မနက်မှာ ဘာနေဗျူးမှာ ကစားခဲ့တဲ့ ရီးယဲလ်မက်ဒရစ်နဲ့ မန်စီးတီးတို့ရဲ့ ချန်ပီယံလိဂ်ဆီးမီးဖိုင်နယ် ဒုတိယအကျော့မှာ ဖာနန်ဒိုရဲ့ ကိုယ့်ဂိုးကိုသွင်းမှုနဲ့အတူ ရီးယဲလ်က နှစ်ကျော့ပေါင်း ၁ ဂိုး မရှိနဲ့ အနိုင်ရရှိခဲ့ပြီး နောက်ဆုံး ဗိုလ်လုပွဲကို တက်ရောက်နိုင်ခဲ့ပါတယ်။

၂၀၁၄ ခုနှစ် ဗိုလ်လုပွဲမှာ မြို့ခံပြိုက်ဘက်အက်သလက်တီကိုကို အချိန်ပိုသွင်းဂိုးတွေနဲ့ ၄ ဂိုး ၁ ဂိုးနဲ့ အနိုင်ရကာ ၁၀ ကြိမ်မြောက် ဥရောပဘောလုံးဘုရင်ဖြစ်ခဲ့တဲ့ ရီးယဲလ်ဟာ ဒီနှစ်ဗိုလ်လုပွဲမှာလည်း ဆီမီးဖိုင်နယ်မှာ နာမည်ကြီး ဘိုင်ယန်မြူးနစ်ကို ဖြုတ်ချခဲ့တဲ့ အက်သလက်တီကိုနဲ့ ထပ်မံတွေ့ဆုံရမှာပါ။

ဒီနေ့မနက်နိုင်ပွဲကြောင့် ၁၁ ကြိမ်မြောက် ချန်ပီယံလိဂ်ဖလား ပိုင်ဆိုင်ခွင့်အတွက် လက်တစ်ကမ်းအလိုရောက်နေတဲ့ ရီးယဲလ်နည်းပြ၊ အဓိက ကစားသမားတွေရဲ့ ဖွင့်ဟသံများကို စုစည်းဖော်ပြလိုက်ပါတယ်။

“ဒီပွဲဟာ ခက်ခဲမယ်ဆိုတာ ကျွန်တော်တို့သိပါတယ်။ ဒါပေမယ့် နောက်ဆုံးမှာတော့ ဗိုလ်လုပွဲကို ရောက်ခဲ့ပါပြီ။ ကစားသမားတွေအားလုံးရဲ့ အားထုတ်မှုအတွက် ကျွန်တော် ကျေနပ်ပါတယ်။ ဘာနေဗျူးပရိတ်သတ်ကတော့ အမြဲတမ်း ပြောစရာမလိုပါဘူး။ သူတို့ရဲ့အားပေးမှုဟာ ဒီလိုခက်ခဲတဲ့ ပွဲရဲ့ အစကနေအဆုံးအထိ အကူအညီဖြစ်စေခဲ့ပါတယ်။ နောက်ဆုံးဗိုလ်ပွဲဟာ ၅၀-၅၀ ပါပဲ။ ကျွန်တော်တို့ ဖိုင်နယ်ရောက်ရုံပဲရှိနေပြီး ဗိုလ်မစွဲသေးပါဘူး” (နည်းပြ ဇီဒိန်း)

“ဖိုင်နယ်ရောက်တဲ့အတွက် ကျွန်တော်တို့ ပျော်ရွှင်မိပြီး ဒါဟာ ထူးခြားမှုတစ်ခုပါပဲ။ ခက်ခဲတယ်။ ဒါပေမယ့် မန်စီးတီးထက် ကျွန်တော်တို့ ပိုကောင်းပါတယ်။ အခွင့်ရေးတွေ အများကြီးဖန်တီးနိုင်ခဲ့ပြီး ပိုပြီး အားထည့်ကစားနိုင်ခဲ့ပါတယ်။ ဂိုးရပြီးတော့ မန်စီးတီးက တင်ကစားတော့မယ်ဆိုတာ ကျွန်တော်တို့ သိပါတယ်။ ဒါပေမယ့် ပွဲကို ထိန်းချုပ်နိုင်ခဲ့ပါတယ်” (ရော်နယ်ဒို)

“ဘယ်သူပဲဂိုးသွင်းသွင်း၊ ကိုယ့်ဂိုးကိုယ်သွင်းတာပဲဖြစ်ဖြစ် ကိစ္စမရှိပါဘူး။ အဓိကက ကျွန်တော်တို့ ချန်ပီယံလိဂ်မှာ ဗိုလ်စွဲခွင့် ရခဲ့ပါပြီ။ ကျွန်တော်တို့ ပွဲကို ဖြတ်နိုင်ဖို့ နီးစပ်ခဲ့ပေမယ့် အပိုင်အခွင့်အရေးတော့ မရခဲ့ပါဘူး။ ရီးယဲလ်ကို ကျွန်တော်ရောက်လာတဲ့ ရည်ရွယ်ချက်က ချန်ပီယံလိဂ်ဖလား ရဖို့ပါ။ တစ်ကြိမ် ကျွန်တော်ရပြီးပြီ။ အခုတော့ နောက်တစ်ကြိမ်ထပ်ရဖို့ အခွင့်အရေး ရှိနေပါပြီ” (ဂါရက် ဘေးလ်)

“အခုတော့ ကျွန်တော်တို့ ဖိုင်နယ်ရောက်သွားပြီ။ ခက်တော့ခက်ခဲမှာပါ။ ဒါပေမယ့် အသင်းရဲ့ လုပ်အားနဲ့ စုစည်းညီညွတ်မှုဟာ ၃ နှစ်အတွင်း ချန်ပီယံ ၂ ကြိမ်ဖြစ်နိုင်တဲ့အစွမ်း ရှိနေပါတယ်။ အသင်းနဲ့ ပရိတ်သတ်တွေဟာ အရာအားလုံးနဲ့ ထိုက်တန်ပါတယ်။ ကျွန်တော်တို့ရဲ့ ၁၂ ယောက်မြောက်ကစားသမားအဖြစ် တာဝန်ကျေခဲ့တဲ့ ပရိတ်သတ်တွေကိုလည်း ကျွန်တော်တို့ ကျေးဇူးတင်ပါတယ်။ ချန်ပီယံလိဂ်ဖိုင်နယ်မှာတော့ ကျွန်တော်တို့ ရေကုန်ရေခန်း ကြိုးစားသွားမှာပါ” (လူကာ မိုဒရစ်)

Ref: Goal