မြို့ပြများတွင် လေထုညစ်ညမ်းမှု မြင့်တက်လာသည်ဟု WHO သတိပေး

မေ ၁၇၊ ၂၀၁၆
M-Media

– ၀င်ငွေနိမ့်ပါးတဲ့ ဒါမှမဟုတ်၊ အလယ်အလတ်ရှိတဲ့ နိုင်ငံတွေက မြို့ကြီးပြကြီးတွေမှာ နေထိုင်သူ ၉၈ ရာခိုင်နှုန်းခန့်ဟာ အလွန်အမင်းလေထုညစ်ညမ်းမှုဒဏ်နဲ့ ရင်ဆိုင်နေရတယ်လို့ ကမ္ဘာ့ကျန်းမာရေးအဖွဲ့ချုပ် (WHO) က ပြီးခဲ့တဲ့ တစ်ပတ်မှာ ထုတ်ပြန်ကြေငြာလိုက်ပါတယ်။

အဲဒီကြေငြာချက်မှာ မြို့ပြနေပြည်သူ ၅ ဦးမှာ လေးဦးဟာ WHO ရဲ့ လေထုအရည်အသွေး လမ်းညွှန်ချက်တွေနဲ့ ကိုက်ညီမှုမရှိတဲ့ မြို့တွေမှာ နေထိုင်နေရပြီး၊ ၀င်ငွေမြင့်မားတဲ့ နိုင်ငံတွေက လူဦးရေ ၅၆ ရာခိုင်နှုန်းဟာလည်း လေထုညစ်ညမ်းမှုဒဏ်ကို ခံစားနေရတယ်လို့ ဆိုပါတယ်။

လေထုညစ်ညမ်းမှုကို လျော့ချရေး တစ်ချို့ဒေသတွေမှာ တိုးတက်မှုအချို့ ရှိခဲ့ပေမယ့် ကမ္ဘာလုံးဆိုင်ရာ မြို့ပြလေထုညစ်ညမ်းမှုအဆင့်ဟာ ၈ ရာခိုင်နှုန်းလောက် ပိုများခဲ့ကာ၊ လေထုအရည်အသွေး ဆိုးရွားတဲ့အတွက် လေဖြတ်ရောဂါ၊ နှလုံးရောဂါ၊ အဆုတ်ကင်ဆာနဲ့ အသက်ရှုလမ်းကြောင်းဆိုင်ရာ ရောဂါတွေ ဖြစ်နိုင်ချေများတယ်လို့လည်း WHO က သတိပေးခဲ့ပါတယ်။

Ref: IINA