အမေရိကန် ကက်သလစ်ဘုန်းကြီးများ လိင်စော်ကားမှုအတွက် တိုင်ကြားမှု မြင့်တက်

မေ ၂၁၊ ၂၀၁၆
M-Media

– အမေရိကန် ကက်သလစ်ခရစ်ယာန်အသင်းတော်မှ ဘုန်းတော်ကြီးများ၏ လိင်ပိုင်းဆိုင်ရာ စော်ကားမှုအတွက် တိုင်ကြားမှုမှာ ပြီးခဲ့သည့်နှစ်တွင် သိသိသာသာ တိုးလာသည်ဟု အမေရိကန် ကက်သလစ် ဂိုဏ်းအုပ်ဘုန်းတော်ကြီးများ၏ နှစ်ပတ်လည်ညီလာခံတွင် တင်သွင်းသည့် အစီရင်ခံစာအရ သိရသည်။

အဆိုပါစာရင်းတွင် ဘုန်းတော်ကြီးများ၏ လိင်ပိုင်းဆိုင်ရာ စော်ကားခံရသည်ဟု သတင်းပို့ တိုင်ကြားသူများမှာ ၂၀၁၄ ခုနှစ် ဇူလိုင်လ ၁ ရက်နေ့မှ ၂၀၁၅ ခုနှစ် ဇွန်လ ၃၀ ရက်နေ့အထိ ၈၃၈ ဦး ရှိခဲ့ပြီး ခရစ်ယာန်ဘုန်းကြီး၊ ဘုရားကျောင်းတာဝန်ခံ သို့မဟုတ် ဘာသာရေးအသင်းအဖွဲ့မှ အဖွဲ့ဝင်များက ၎င်းတို့ အရွယ်မရောက်သေးသည့်အချိန်တွင် လိင်ပိုင်းဆိုင်ရာ စော်ကားခဲ့ခြင်းဖြစ်သည်ဟု ပြောကြားခဲ့ကြသည်။

ပြီးခဲ့သည့်တစ်နှစ်အရင်ကမူ တိုင်ကြားမှုအရေအတွက်မှာ ၆၂၀ ရှိပြီး ပြီးခဲ့သည့်နှစ်တွင် ၃၅ ရာခိုင်နှုန်း မြင့်တက်လာခြင်းဖြစ်သည်။ တိုင်ကြားမှုမှ အများစုမှာ ၁၉၆၀၊ ၇၀ နှင့် ၈၀ ပြည့်နှစ်များက ဖြစ်ပွားခဲ့သည့် ကိစ္စများဖြစ်ပြီး ၂၆ ခုသာ မကြာသေးမီက ဖြစ်ပွားခဲ့ခြင်းဖြစ်သည်။

ထို့ပြင် စာရင်းအင်းစုဆောင်းမှုကာလအတွင်း လိင်ပိုင်းဆိုင်ရာစော်ကားမှုနှင့် ဆက်စပ်သည့် ကိစ္စများအတွက် ဖြေရှင်းပေးရမှုများ၊ ဥပဒေရေးရာ ငွေကြေးကုန်ကျမှုနှင့် အခြားသောကုန်ကျမှုများမှာ ကန်ဒေါ်လာ ၁၅၃ သန်း ရှိသည်ဟုလည်း အဆိုပါ အစီရင်ခံစာတွင် ဖော်ပြထားသည်။

အမေရိကန်တွင် ခရစ်ယာန်ဘုန်းကြီးများ၏ လိင်ပိုင်းဆိုင်ရာ စော်ကားမှုနှင့် ထိုကိစ္စများအား စနစ်တကျ ဖုံးကွယ်ထားမှုများကို ၂၀၀၂ ခုနှစ်တွင် အမေရိကန်မီဒီယာများက ဖွင့်ချခဲ့သည်။

၁၉၅၀ မှ ၂၀၁၁ ခုနှစ်အတွင်း အရွယ်မရောက်သေးသူ ကလေးငယ် ၁၆၉၀၀ ဦးအား ကက်သလစ်ဘုန်းတော်ကြီး ၆၉၀၀ နီးပါးက လိင်ပိုင်းဆိုင်ရာ စော်ကားမှုများ ပြုလုပ်ခဲ့သည်ဟု စွပ်စွဲခံခဲ့ရကြောင်း အမေရိကန် ကက်သလစ်ဂိုဏ်းအုပ်ဘုန်းတော်ကြီးများ ညီလာခံ၏ စာရင်းတွင် ဖော်ပြထားသည်။

Ref: Press TV