အစ္စရေးလက်ချက်ကြောင့် သေဆုံးရသူ ပါလက်စတိုင်း ကလေးငယ်အရေအတွက် ၂၁၀၀ ခန့် ရှိနေ

ဇွန် ၂၊ ၂၀၁၆
M-Media

– ၂၀၀၀ ခုနှစ်ကစပြီး အစ္စရေးစစ်တပ်တွေရဲ့ လက်ချက်ကြောင့် ဒဏ်ရာအပြင်းအထန်ရရှိသူတွေနဲ့ အသက်ဆုံးရှုံးခဲ့ရတဲ့ ပါလက်စတိုင်းကလေးငယ်ပေါင်း ၂၁၀၀ နီးပါးရှိပြီလို့ ပါလက်စတိုင်းက တရားဝင်ထုတ်ပြန်မှုမှာ ဖော်ပြထားပါတယ်။

ပါလက်စတိုင်းပြန်ကြားရေးဝန်ကြီးဌာနက အင်္ဂါနေ့က ထုတ်ပြန်တဲ့ကြေညာချက်ထဲမှာ ဖော်ပြထားတာဖြစ်ပြီး ပြီးခဲ့တဲ့ ၁၆ နှစ်အတွင်း အစ္စရေးစစ်တပ်ရဲ့ တိုက်ခိုက်မှုကြောင့် ပါလက်စတိုင်းကလေးငယ်ပေါင်း ၁၃၀၀၀ နီးပါး ထိခိုက်ဒဏ်ရာရခဲ့တယ်လို့ ဆိုပါတယ်။ သေဆုံးသူ အရေအတွက် အတိအကျကတော့ ၂၀၇၉ ယောက် ဖြစ်ပါတယ်။

ဒါ့အပြင် ပါလက်စတိုင်းကလေးငယ် ၁၂၀၀၀ ၀န်းကျင်ခန့်ကိုလည်း အစ္စရေးက ဖမ်းဆီးထားပြီး လက်ရှိအစ္စရေးအကျဉ်းထောင်တွေမှာ အယောက် ၄၂၀ လောက်ကို အကျဉ်းချထားတယ်လို့လည်း ပါလက်စတိုင်း ပြန်ကြားရေးဝန်ကြီးဌာနက ဆိုပါတယ်။

အရှေ့ဂျေရုစလင်မှာပြုလုပ်တဲ့ အစ္စရေးရဲ့ ကျူးကျော်ဝင်ရောက်မှုအတွင်းမှာ ဖမ်းဆီးထားတဲ့ ပါလက်စတိုင်းအရပ်သား အရေအတွက်ကတော့ ၂ ဒါဇင်ကျော်လောက် ရှိနေပါတယ်။

Ref; Presstv