၂၀၀၂ ပဋိပက္ခတွင် မွတ်စလင်များအား သတ်ဖြတ်သူများကို အပြစ်ရှိကြောင်း အိန္ဒိယဆုံးဖြတ်

ဇွန် ၃၊ ၂၀၁၆
M-Media

– ၂၀၀၂ ခုနှစ်က ဂူဂျာရတ်ပြည်နယ်၌ ဖြစ်ပွားခဲ့သော ဘာသာရေးပဋိပက္ခတွင် မွတ်စလင် ၆၉ ဦးအား သတ်ဖြတ်မှုအတွက် လူ ၂၄ ဦးကို အိန္ဒိယတရားရုံးက ယမန်နေ့တွင် အပြစ်ရှိကြောင်း ဆုံးဖြတ်ခဲ့သည်ဟု သိရသည်။

ထိုပဋိပက္ခအတွင်း အဟ်မဒ်ဒါဘတ်မြို့ရှိ Gulbarg Society လူနေအိမ်ယာတွင် ခိုလှုံနေသည့် မွတ်စလင်များအား ဟိန္ဒူလူအုပ်စုကြီးက ၀င်ရောက်ကာ တိုက်ခိုက်ခဲ့ခြင်းဖြစ်ပြီး မွတ်စလင် ၆၉ ဦးကို မီးရှို့၍လည်းကောင်း၊ ခေါင်းဖြတ်၍လည်းကောင်း သတ်ဖြတ်ခဲ့ခြင်းဖြစ်သည်။

ထိုအမှုတွင် ပါဝင်သူ ၂၄ ဦးကို ထိုကဲ့သို့ အပြစ်ရှိကြောင်း ဆုံးဖြတ်ခဲ့သော်လည်း အခြား ၃၆ ဦးကိုမူ သက်သေမခိုင်မာဟုဆိုကာ တရားသူကြီး ပီဘီ ဒီဆိုင်းက တရားသေလွှတ်ပေးခဲ့သည်။ အပြစ်ရှိသူများအား ဇွန်လ ၆ ရက်နေ့တွင် ပြစ်ဒဏ်ချမှတ်မည်ဖြစ်သည်။

သတ်ဖြတ်ခံရသူများအတွက် လိုက်ပါဆောင်ရွက်ပေးနေသော ရှေ့နေ တီစတာ စတာလ်ဗဒ်ကမူ ဆုံးဖြတ်ချက်တွင် ရှုပ်ထွေးမှုများ ရှိနေသည်ဟု ပြောကြားခဲ့သည်။

“ထွက်လာတဲ့ ရလဒ်အတွက် ကျွန်မတို့ အပြည့်အ၀ မကျေနပ်ပါဘူး။ တိုက်ခိုက်သတ်ဖြတ်မှုမှာ အဓိကပါဝင်သူတွေကို တရားမစွဲခဲ့တဲ့အပြင် ရဲအရာရှိ ကေဂျီ အာရ်ဒါကိုလည်း တရားသေလွှတ်ပေးလိုက်ပါတယ်။ ဒီဆုံးဖြတ်ချက်အတွက် ကျွန်မတို့ သေချာပေါက် အယူခံဝင်သွားမှာပါ” ဟု စတာလ်ဗဒ်က ပြောကြားခဲ့သည်။

ရဲအရာရှိ ကေဂျီ အာရ်ဒါမှာ ဟိန္ဒူလူအုပ်စုကြီး လူနေအိမ်ယာထဲသို့ ၀င်ရောက်မှုအား တားမြစ်ခဲ့ခြင်းမရှိဟု လွတ်မြောက်လာသူများက စွပ်စွဲထားပြီး တရားရုံးချုပ်မှ ဖွဲ့စည်းပေးခဲ့သည့် အထူးစုံစမ်းစစ်ဆေးရေးအဖွဲ့က ၎င်းအား ၂၀၀၂ ခုနှစ်တွင် ဖမ်းဆီးခဲ့ခြင်းဖြစ်သည်။

တရားသေလွတ်မြောက်သွားသူများတွင် ထိုသတ်ဖြတ်မှုအတွင်း အဓိက ပါဝင်သူတစ်ဦးဖြစ်သူဟု ယူဆခံရသော BJP ပါတီဝင် စည်ပင်သာယာရေးအရာရှိ ဘီပင် ပါတေးလ်လည်း ပါဝင်သည်။ တရားလိုရှေ့နေများကမူ အပြစ်ရှိသူအားလုံးအား ထောင်ဒဏ်တစ်သက်တစ်ကျွန်း ချမှတ်ရန် တောင်းဆိုထားသည်။

Ref: Aljazeera