လူမျိုး/ဘာသာ မခွဲဘဲ ကူညီပေးသွားမယ်လို့ မြန်မာသံအမတ်ကြီး(မလေးရှား) ပြော

ဇွန် ၅ ၊ ၂၀၁၆
M-Media
အောင်သူရ
ဓါတ်ပုံ- KL CJ

မလေးရှားနိုင်ငံရောက် မြန်မာနိုင်ငံသားများအကျိုး ကာကွယ်စောင့်ရှောက်သည့်လုပ်ငန်းများ ပိုမိုထိရောက်စွာ ဆောင်ရွက်နိုင်ရေးအတွက် အလုပ်သမားများ စောင့်ရှောက်ရေးကော်မတီတစ်ရပ် ဖွဲ့စည်းမည့်ကိစ္စနှင့်ပတ်သက်၍ ညှိနှိုင်းအစည်းအဝေးတစ်ရပ်ကို ၅-၆-၂၀၁၆ ရက်၊ တနင်္ဂနွေနေ့၊ နေ့လည် ၁း၀၀ နာရီအချိန်တွင် မြန်မာသံရုံး၊ ကွာလာလမ်ပူမြို့၌ ကျင်းပပြုလုပ်ခဲ့ပါသည်။
.
အဆိုပါ ညှိုနှိုင်းအစည်းအဝေးသို့ ဖိတ်ကြားထားသော မလေးရှားနိုင်ငံတဝှမ်း ရှိ ပရဟိတ အသင်းအဖွဲ့ ပေါင်းစုံမှ ကိုယ်စားလှယ်များ တက်ရောက်ခဲ့ကြကြောင်း သိရှိရပါသည်။
.
ညှိနှိုင်းအစည်းအဝေးတွင် မလေးရှားနိုင်ငံဆိုင်ရာ မြန်မာသံအမတ်ကြီး ဦးဇော်မြင့်မှ အလုပ်သမားများ စောင့်ရှောက်ရေးကော်မတီ တစ်ရပ် ဖွဲ့စည်းမည့် ကိစ္စ အတွက် ပရဟိတ လူမှုအဖွဲ့အစည်းများ ထံမှာ အကြံဥာဏ်များရရှိလို၍ ယခုကဲ့သို့ တွေ့ဆုံရခြင်းဖြစ်ကြောင်း ပြောကြား ခဲ့သည်။ အဆိုပါကော်မတီတွင် သံအမတ်ကြီးမှ နာယက အဖြစ်ဆောင်ရွက်ပြီး နယ်မြေဒေသအလိုက် ပရဟိတ အဖွဲ့အစည်းများကိုလည်း ထည့်သွင်းဖွဲ့စည်းသွားမှာဖြစ်ကြောင်း ပြောကြားခဲ့တယ်လို့ သိရှိရပါသည်။
.
တွေ့ဆုံပွဲ အတွက် မူလဖိတ်ကြားသည့် စာရင်းတွင် မပါရှိ၍ ဝေဖန်မှုများ ထွက်ပေါ်လာပြီး နောက်ပိုင်း ဖိတ်ကြားခံရသည့် မြန်မာနိုင်ငံသား အစ္စလာမ်ဘာသာဝင် လူမှုရေး အဖွဲ့အစည်းများအနက်မှ စလရန်း နာရေး ကူညီမှုအသင်း ကိုယ်စားပြု တင်ရောက်လာသည့် ဦးမောင်မောင် (ရွှေကရဝိတ်)အား ဖိတ်ခေါ်ပြီး အကြံပြု စကားပြောခွင့်ပြုခဲ့တာကို တွေ့ရပါသည်။
.
ဦးမောင်မောင်(ရွှေကရဝိတ်)မှ မြန်မာနိုင်ငံတွင် ယခုအခါ အမျိုးသားရင်ကြားစေ့ရေး လုပ်ဆောင်နေတဲ့အချိန်မှာ မလေးရှားနိုင်ငံရောက် မြန်မာနိုင်ငံသား အကြား မြန်မာသံအမတ်ကြီး၏ ဦးဆောင်မှုဖြင့် စံပြအနေဖြင့် ဆောင်ရွက်ဖို့ အကြံပြုပါကြောင်း၊ အဆိုပါ လုပ်ငန်းစဉ်ကို ပြည်တွင်းအထိ သယ်ဆောင်သွားဖို့ ၊ ယခုအချိန်အခါတွင် မြန်မာနိုင်ငံသား မွတ်စလင်မ်များကိ မြန်မာသံရုံး (မလေးရှား) မှ ပစ်ပယ်ထားသည့်ဟု ခံစားရပါကြောင်း၊ မြန်မာသံရုံး(မလေးရှား) မှ လိုအပ်သည်များရှိလျှင် မြန်မာနိုင်ငံသား မွတ်စလင်မ်များကို ခေါ်ယူတာဝန်ပေးနိုင်ကြောင်း၊ မြန်မာနိုင်ငံသား မွတ်စလင်မ်များ အနေဖြင့်လည်း မိမိတို့ လိုအပ်ချက်များအတွက် မြန်မာသံရုံး(မလေးရှား) ကို အကူအညီ တောင်းခံခွင့်ပေးဖို့ ဆွေးနွေးတင်ပြခဲ့ကြောင်း သိရပါသည်။
.
တက်ရောက်လာတဲ့ အခြားသော တိုင်းရင်းသား ကိုယ်စားပြု အဖွဲ့အသီးသီး၊ ပရဟိတ အဖွဲ့အသီးသီးမှ ကိုယ်စားလှယ်များမှ ၄င်းတို့ အမြင်များကို ဆွေးနွေးတင်ပြခဲ့ကြတယ်လို့ သိရပါသည်။
.
ဆွေးနွေးချက်များကို မလေးရှားနိုင်ငံဆိုင်ရာ မြန်မာ သံအမတ်ကြီး ဦးဇော်မြင့်မှ ပြန်လည်ဆွေးနွေးပြောကြားရာတွင် ၄င်းနှင့်အတူ မြန်မာသံရုံး (မလေးရှား)မှ သံရုံးအဖွဲ့ဝင်များအနေဖြင့် လူမျိုး/ဘာသာ ခွဲခြားမှုမရှိပါကြောင်း၊  ဝန်ထမ်း အင်အားနည်းပါးပြီး လုပ်ငန်း အများအပြားဆောင်ရွက်ရ၍ အားနည်းချက်များကို ခွင့်လွှတ်နားလည်ပေးဖို့ ပြောကြားပြိး ယခုဖွဲ့စည်းဆောင်ရွက်မည့်  မြန်မာ အလုပ်သမားများ စောင့်ရှောက်ရေးကော်မတီ ၏ လုပ်ငန်းဖြစ်သော အကူအညီပေးရေးကိစ္စ များတွင် လူမျိုး/ဘာသာ မခွဲခြားဘဲ မြန်မာနိုင်ငံသားအားလုံး ပူးပေါင်းပါဝင်ဖို့၊ သက်ဆိုင်ရာအဖွဲ့အစည်းများနှင့်လည်း သီးခြားတွေ့ဆုံသွားဖို့ ရှိကြောင်း ၊ လိုအပ်သည့် အကူအညီများအတွက် မြန်မာသံရုံး(မလေးရှား) သို့ ဆက်သွယ် အကူအညီတောင်းနိုင်ကြောင်း၊ နိုင်ငံကူး လက်မှတ်များကိုလည်း အမြန်ဆုံး ထုတ်ပေးနိုင်ရန် သက်ဆိုင်ရာသို့ တင်ပြပေးသွားမယ်လို့ ပြောကြားခဲ့ပါသည်။