IS အကြမ်းဖက်အဖွဲ့က ကုရ်အာန်ကျမ်းစာတွင် ဗုံးများထည့်ကာ တိုက်ခိုက်

ဇွန် ၁၁၊ ၂၀၁၆
M-Media

– ဖာလူဂျာမြို့ ပြန်လည်ရရှိရေး အီရတ်စစ်တဲ့ရဲ့ ထိုးစစ်ဆင်မှုကို ချည့်နဲ့သွားစေဖို့ ကြိုးစားတဲ့ လှုပ်ရှားမှုတွေမှာ IS အကြမ်းဖက်အဖွဲ့ဟာ ကုရ်အာန်ကျမ်းတော်မြတ်တွေအတွင်း ဗုံးတွေထည့်ထားပြီး တိုက်ခိုက်ဖို့ ကြံစည်မှုတွေလည်း ပါဝင်တယ်လို့ အီရတ် နိုင်ငံခြားရေးဝန်ကြီး အီဘရာဟင် အလ်-ဂျာဖာရီက ပြောကြားလိုက်ပါတယ်။

al-Ghad al-Arabi ရုပ်သံနဲ့ အခုတစ်ပတ်အတွင်း ပြုလုပ်ခဲ့တဲ့ အင်တာဗျူးမှာ ၀န်ကြီးက ဒီလို ပြောကြားလိုက်တာဖြစ်ပြီး ဒီလိုလုပ်ရပ်ဟာ ကျမ်းတော်မြတ်ကို မလေးမစားပြုမူတာဖြစ်ကာ အစ္စလာမ်ရဲ့ သင်ကြားမှုနဲ့လည်း ဆန့်ကျင်နေတယ်လို့ ထည့်သွင်းပြောကြားခဲ့ပါတယ်။

“ဒီလိုယုတ်မာတဲ့ အပြုအမူတွေဟာ အကြမ်းဖက်သမားတွေဆီက မြို့ကိုပြန်လည်ရယူဖို့အတွက် အင်အားတိုးမြှင့်ပြီး တိုက်ခိုက်ဖို့ အီရတ်စစ်သားတွေကို ပိုလို့တောင် တွန်းအားပေးရာရောက်ပါတယ်” လို့ ဂျာဖာရီက ဆိုပါတယ်။

ဒီနှစ်အစောပိုင်းကလည်း အမေရိကန်စစ်တပ်ဗိုလ်မှူး စတီဗ်ဝါရင်က အကြမ်းဖက်သမားတွေအနေနဲ့ ရာမာဒီမြို့မှာတုန်းကလည်း ဒီလို ကုရ်အာန်ကျမ်းတော်မြတ်ထဲ ဗုံးတွေထည့် တိုက်ခိုက်ခဲ့တယ်လို့ ပြောကြားခဲ့ပါတယ်။

“ဒီလူတွေ တော်တော်ဆိုးပါတယ်၊ ရေခဲသေတ္တာတွေထဲမှာ ဗုံးတွေချန်ထားခဲ့မယ်။ ကုရ်အာန်ကျမ်းစာတွေထဲ ဗုံးတွေ ထည့်ထားမယ်၊ ဒါမျိုးတွေကို ရာမာဒီမှာတုန်းက အမြောက်အများ တွေ့ခဲ့ပြီးပါပြီ”

Ref: Presstv