၃ရက်တာ ဆွေးနွေးမှုများဖြင့် နိုင်ငံလုံးဆိုင်ရာ လူငယ်တွေ့ဆုံဆွေးနွေးပွဲ ကျင်းပပြီးစီး

ဇွန် ၁၃ ၊ ၂၀၁၆
M-Media
သတင်း- သူရိန်
.
လူငယ်များ အနေဖြင့် မိမိတို့ ဒေသများရှိ လူငယ်များ၏ ပြဿနာများ စိန်ခေါ်မှုများနှင့် စိုးရိမ်မှုများကို ဖော်ထုတ် ဆွေးနွေးရန် ရည်ရွယ် ကျင်းပသည့် မြန်မာနိုင်ငံလုံးဆိုင်ရာ လူငယ် တွေ့ဆုံပွဲ တစ်ရပ်ကို စစ်ကိုင်းတိုင်းဒေသကြီး မုံရွာမြို့မှာ ကျင်းပခဲ့ပါတယ်။
.
နိုင်ငံလုံးဆိုင်ရာ လူငယ်တွေ့ဆုံပွဲ ကျင်းပရခြင်းနှင့် ပတ်သက်၍ အစီအစဉ်ရေးဆွဲရေး ကော်မတီမှ တာဝန်ခံ က ” အခုလက်ရှိ မြန်မာနိုင်ငံမှာ လူငယ်တွေ ပတ်သက်ပြီး ကြုံတွေ့နေရတာတွေရှိတယ်။ ရင်ဆိုင်နေရတဲ့ အခြေနေတွေရှိတယ်။ ဒါတွေကို လူငယ်တွေအားလုံး စုစည်းပြီးမှ ဖော်ထုတ်မယ်။ အဲ့ဒါတွေ ပြန်လည် ဖြေရှင်းဖို့ နည်းလမ်းတွေ ရှာကြမယ်” ဟု ပြောပါတယ်။
.
ဇွန်လ ၁၁ရက်နေ့မှ ၁၃ရက်နေ့အထိ ၃ရက်တာ အတွင်း မုံရွာမြို့ အားကစားသိပ္ပံ ဖူဆယ်ခန်းမမှာ ကျင်းပတဲ့ အဆိုပါ လူငယ်တွေ့ဆုံပွဲမှာ လူငယ်များနှင့် သက်ဆိုင်သော ကဏ္ဍခေါင်းစဉ် ၄ရပ်ကို ဆွေးနွေး ခဲ့ကြပါတယ်။
.
ခေါင်းစဉ် ၄ရပ်အဖြစ် ငြိမ်းချမ်းရေး၊ မူးယစ်ဆေးဝါး၊ သဘာဝပတ်ဝန်းကျင် ထိန်းသိမ်းကာကွယ်ရေး၊ လူအခွင့်အရေးနှင့် ဒီမိုကရေစီ စသည့် ကဏ္ဍများ ပါဝင်ပါသည်။

.
မြိတ်ခရိုင် ကျွန်းစုမြို့နယ်မှ တက်ရောက်လာသော ကိုရဲထက်အောင် ကတော့ ၎င်းတို့ ဒေသမှာ ကြုံတွေ့ရသည့် မူးယစ်ဆေးဝါး အန္တရာယ်ကို အဓိက ထားဆွေးနွေးခဲ့ကြောင်း ယခုလို ပြောပါတယ်။
.
” ကျွန်တော်တို့ ဒေသမှာ မူးယစ်ဆေးဝါး ပြဿနာတွေ အများကြီး ဖြစ်နေတဲ့အပေါ်မှာ ဘယ်လိုဖြေရှင်းရမလဲ ဆိုတဲ့ နည်းလမ်း တွေရယ် ကျွန်တော်တို့ဒေသရဲ့ အသံတွေကို လူငယ်ဖိုရမ်မှာ ပါသွားချင်လို့ ရွေးချယ်လိုက်တာပါ။ အဲ့နောက်ပိုင်းမှာ ဆိုးကျိုးတွေ ထိန်းချုပ်ဖို့အတွက် ဘာတွေ ဆက်လုပ်ကြမလဲဆိုတဲ့ Action Plan လေးကိုလည်း ဆွေးနွေးကြပါတယ်” ဟု ၎င်း ၏ အမြင်ကို မျှဝေပါတယ်။
.
အလားတူ ပဲခူးမြို့ Interfaith Youth Network မှ တက်ရောက်လာသော ကိုဆန်းညီညီဦးကလည်း ၎င်း ပါဝင် ဆွေးနွေးသည့် ငြိမ်းချမ်းရေး ကဏ္ဍနှင့် စပ်လျဉ်း၍ ” ငြိမ်းချမ်းရေးလို့ပြောရင် စစ်ကို အရင်ပြောတယ်။ စစ်ပွဲတွေ အမြန်ဆုံးရပ်ဖို့နဲ့ ၂၁ရာစုပင်လုံ စာချုပ်မှာ NCA လက်မှတ်မထိုးရသေးတဲ့ လက်နက်ကိုင်တွေ အများဆုံး ပါဝင်ဖို့ပေါ့နော်။ ၂၁ရာစု ပင်လုံမချုပ်ခင်နဲ့ လက်ရှိကြားမှာ လူငယ်တွေ အတွက် အခန်းကဏ္ဍတွေပေးဖို့ အတွက်ကို ကျွန်တော်တို့ တိုင်ပင်နေကြတယ်” ဟု ပြောပြပါတယ်။
.
တတိယအကြိမ်နိုင်ငံလုံးဆိုင်ရာ လူငယ်တွေ့ဆုံပွဲကြီးသို့ ဒေသအသီးသီးမှ လူငယ်ကိုယ်စားလှယ် ၄၅၀ကျော် ပါဝင်တက်ရောက်ဆွေးနွေးပြီး အဆိုပါ နိုင်ငံလုံးဆိုင်ရာ လူငယ်တွေ့ဆုံပွဲကို နှစ်နှစ် လျှင်တစ်ကြိမ် ကျင်းပရန် စီစဉ်ထားကြောင်း သိရသည်။ နောက်တစ်ကြိမ် တွေ့ဆုံပွဲကို ရှမ်းပြည်နယ်မှာ ကျင်းပရန် လျာထားကြောင်း သတင်းရရှိသည်။

.
ဓါတ်ပုံ- Myanmar Youth Forum FB Page #MYF2016