ဆိုရှယ်မီဒီယာတွင် သတင်းများ အခမဲ့ရနေမှုက သတင်းဌာနများအတွက် စိန်ခေါ်မှုဖြစ်လာ

ဇွန် ၁၅၊ ၂၀၁၆
M-Media

– အွန်လိုင်းအသုံးပြုသူများအကြား သတင်းရယူသည့် ရင်းမြစ်များတွင် ဆိုရှယ်မီဒီယာများက ထိပ်တန်း၌ ရှိလာခဲ့ပြီး ထိုကဲ့သို့ သတင်းများကို အခမဲ့ ရရှိလာမှုများက အရည်အသွေးပြည့်မီသည့် သတင်းဌာနများအတွက် စိန်ခေါ်မှု ဖြစ်လာခဲ့သည်ဟု Reuters သတင်းဌာနမှ ဂျာနယ်လစ်ပညာရပ်ဆိုင်ရာ လေ့လာမှုအသင်း (RISJ) ၏ လေ့လာမှုတစ်ခုအရ သိရသည်။

Facebook နှင့် အခြားသော ဆိုရှယ်မီဒီယာများမှ သတင်းရယူကြသူ အရေအတွက်မှာ အွန်လိုင်းသုံးစွဲသူပမာဏ၏ ထက်ဝက်ကျော်ရှိနေပြီး ၎င်းတို့မှာ သတင်းများအတွက် ငွေကြေးမသုံးစွဲလိုကြခြင်း၊ ကြော်ငြာများကို ပိတ်ထားသည့် နည်းလမ်းကို အသုံးပြုခြင်း စသည်တို့က သတင်းဌာနများ၏ အကျိုးအမြတ်ကို ထိခိုက်စေသည်ဟု RISJ မှ ထုတ်ပြန်ခဲ့သည့် စာတမ်းတွင် ဖော်ပြထားသည်။

ဆိုရှယ်မီဒီယာများတွင် သတင်းများကို အခမဲ့ဖြန့်ဝေခြင်းက သုံးစွဲသူအများအပြားထံသို့ ရောက်ရှိသော်လည်း သတင်းဌာနများအနေဖြင့် ပရိတ်သတ်များ၏ အသိအမှတ်ပြုမှု၊ ပရိတ်သတ်များနှင့် ဆက်သွယ်မှုတို့တွင် အခက်အခဲများလည်း ရှိလာခဲ့သည်။

Facebook မှာ အွန်လိုင်းသတင်းများ စီးဆင်းရာ အဓိက ဆိုရှယ်မီဒီယာတစ်ခု ဖြစ်နေပြီး အွန်လိုင်းအသုံးပြုသူ ၄၄ ရာခိုင်နှုန်းက Facebook ကို သတင်းရင်းမြစ်အဖြစ် အသုံးပြုနေကြသည်။ You Tube က ၁၉ ရာခိုင်နှုန်းဖြင့် ဒုတိယလိုက်နေပြီး Twitter ကမူ ၁၀ ရာခိုင်နှုန်းဖြင့် တတိယ လိုက်နေသည်။

Ref: Channelnewsaisa