အမေရိကန်စစ်တပ်က နိုင်ငံ ၁၅ ခုတွင် အကြမ်းဖက်တိုက်ဖျက်ရေး ဆောင်ရွက်နေ

ဇွန် ၁၆၊ ၂၀၁၆
M-Media

– မိမိတို့စစ်တပ်ဟာ နိုင်ငံပေါင်း ၁၅ နိုင်ငံမှာ အကြမ်းဖက်တိုက်ဖျက်ရေး လုပ်ငန်းတွေကို ဆောင်ရွက်နေတယ်လို့ အမေရိကန်သမ္မတ ဘာရက်အိုဘားမားက အခုတစ်ပတ်အစောပိုင်း အထက်လွှတ်တော်ကို တင်ပြတဲ့ နှစ်ပတ်လည် ကြေငြာချက်မှာ ပြောဆိုလိုက်ပါတယ်။

အဲဒီကြေငြာချက်မှာ ‘အကြမ်းဖက်မှုစစ်ပွဲ’ လို့ ခေါ်တဲ့ အမေရိကန်ရဲ့ အကြမ်းဖက်တိုက်ဖျက်ရေး မဟာဗျူဟာကိုလည်း ဖော်ပြခဲ့ပြီး အဲဒီစစ်ပွဲဟာ အချိန်သတ်မှတ်ချက်မရှိဘူးလို့ ဆိုပါတယ်။

“အမေရိကန်ပြည်ထောင်စုကို ခြိမ်းခြောက်နေတဲ့ အကြမ်းဖက်သမားတွေကို တန်ပြန်တိုက်ခိုက်ရေးအတွက် လိုအပ်တဲ့ အမေရိကန်လက်နက်ကိုင်တပ်ဖွဲ့တွေကို တပ်ဖြန့်ချထားမယ့် ကြာချိန် ဒါမှမဟုတ် တိကျတဲ့ကာလတစ်ခုကို သိဖို့ မဖြစ်နိုင်ပါဘူး” လို့ အိုဘားမားက ပြောကြားခဲ့ပါတယ်။

၎င်းအနေနဲ့ စစ်ဆင်ရေးတွေကို ဥပဒေ၊ ပြီးတော့ အထက်လွှတ်တော်ကိုတင်ပြစရာမလိုပဲ သမ္မတလုပ်ပိုင်ခွင့်နဲ့ ဆောင်ရွက်နိုင်တဲ့ အခွင့်အာဏာတို့နဲ့အညီ အမိန့်ပေးခဲ့တာဖြစ်တယ်လို့လည်း အိုဘားမားက ထောက်ပြပြောဆိုခဲ့ပါတယ်။

အိုဘားမားဟာ အာဖဂန်၊ အီရတ်၊ ဆီးရီးယား၊ တူရကီ၊ ဆိုမာလီယာ၊ ယီမင်၊ ဒီဘောက်တီ၊ လစ်ဗျား၊ ကျူးဘား၊ နိုင်ဂျာ၊ ကင်မရွန်း၊ ဗဟိုအာဖရိကပြည်သူ့သမ္မတနိုင်ငံ၊ အီဂျစ်၊ ဂျော်ဒန်နဲ့ ကိုဆိုဗို စတဲ့နိုင်ငံတွေမှာထားရှိတဲ့ အမေရိကန်တပ်ဖွဲ့တွေကို တိကျတဲ့လုပ်ငန်းဆောင်တာများနဲ့အတူ တာဝန်ပေးအပ်ထားတာ ဖြစ်ပါတယ်။

အမေရိကန်ရဲ့ အကြမ်းဖက်တိုက်ဖျက်ရေး မဟာဗျူဟာမှာ အမေရိကန်အပေါ် ပြုလုပ်နိုင်တဲ့ တိုက်ခိုက်မှုတွေကို တားဆီးရေး၊ တိုင်းပြည်လုံခြုံရေးနဲ့ အကြမ်းဖက်အုပ်စုတွေရဲ့ ခြိမ်းခြောက်မှုကို ကိုင်တွယ်ဆောင်ရွက်ရေး ကိစ္စတွေဟာ အဓိကရည်မှန်းချက်တွေဖြစ်ပြီး အိုဘားမားကတော့ အမေရိကန်တပ်ဖွဲ့တွေဟာ သူတို့ ရောက်ရှိနေတဲ့နိုင်ငံတွေမှာ ဒီရည်ရွယ်ချက်တွေကို အကောင်အထည်ဖော်နေတယ်လို့ ထည့်သွင်းပြောကြားခဲ့ပါတယ်။

Ref; Presstv