ရခိုင်ပြည်နယ်ရေကြီးမှု သေဆုံးသူ ၆ ဦးရှိလာ

ဇွန် ၁၆၊ ၂၀၁၆
M-Media

– ရခိုင်ပြည်နယ်တောင်ပိုင်းတွင် ရေကြီးရေလျှံမှုများ ဖြစ်ပွားမှုကြောင့် သေဆုံး သူ ၆ ဦး ရှိလာခဲ့ပြီး သေဆုံးအရေအတွက်မှာ ထပ်မံမြင့်တက်လာနိုင်သည်ဟု ဒေသတွင်း အကူအညီပေးရေး အဖွဲ့များက ပြောကြားလိုက်သည်။

အဆိုပါ သေဆုံးသူ ၆ ဦးကို ဇွန်လ ၁၄ ရက်နေ့က တွေ့ရှိခဲ့ခြင်းဖြစ်ပြီး ၄ ဦးမှာ တောင်ကုတ်မြို့နယ်ရှိ အသက် ၁၁ နှစ်မှ ၁၄ နှစ်ကြား မိန်းကလေးငယ်များဖြစ်ကြကာ အခြား ၂ ဦးမှာ သံတွဲတွင်နေထိုင်ကြသူများ ဖြစ်သည်ဟု သံတွဲရှိ အကူအညီပေးရေးအဖွဲ့မှ အဖွဲ့ဝင်တစ်ဦးဖြစ်သူ ဦးမြင့်မိုးက ပြောကြားခဲ့သည်။

“မိသားစုဝင်တွေ ပျောက်နေတာမျိုး ရှိလားဆိုတာကို စစ်ဆေးဖို့ ကျွန်တော်တို့ လူတိုင်းကို သတိပေးထားပါတယ်။ အလောင်းတစ်ချို့ကိုတွေ့ပေမယ့် သေဆုံးတဲ့အရေအတွက် အတိအကျကိုတော့ ကျွန်တော်တို့ အတည်ပြုလို့ မရသေးပါဘူး” ဟု ၎င်းက ထပ်လောင်းပြောကြားခဲ့ပြီး သေဆုံးသူအရေအတွက်မှာ တိုးလာနိုင်သည်ဟု သတိပေးခဲ့သည်။

သံတွဲကြက်ခြေနီအသင်းကလည်း ထိုသတင်းကို အတည်ပြုခဲ့သည်။

ရခိုင်ပြည်နယ်တောင်ပိုင်းတွင် ပြီးခဲ့သည့် သီတင်းပတ်များအတွင်း မိုးသည်းထန်စွာရာသွန်းကာ ရေကြီးမှုများကြောင့် အနည်းဆုံး လူ ၇၀၀ ခန့် အိုးမဲ့အိမ်မဲ့ဖြစ်ခဲ့ရပြီး၊ အကူအညီများလည်း လိုအပ်နေသည်။ သံတွဲမြို့နယ် ရွှေလှေး ကျေးရွာမှ ကိုထွန်းသန့်ကျော်ကမူ ရေဘေးသင့်ဒေသများသို့ ၀န်ကြီး ၃ ဦး လာရောက် ကြည့်ရှုခဲ့ပြီးနောက် အစိုးရမှာ အကူအညီများကို ပေးပို့နေသော်လည်း လုံလောက်မှုမရှိဟု ပြောကြားခဲ့သည်။

လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာန၏ ကနဦး အချက်အလက်များအရ ရခိုင်ပြည်နယ်အတွင်း ရေကြီးရေလျှံမှုများကြောင့် အိမ်ထောင်စု ၅၈၀၀ သို့မဟုတ် လူပေါင်း ၂၆၀၀၀ ကျော် ထိခိုက်ခံစားခဲ့ရသည်ဟု သိရသည်။

Ref: mmtimes