ဂျိုးကော့စ် (သို့မဟုတ်) လူပီသမှုကြောင့် လက်ယာအစွန်းရောက်တို့၏ သားကောင်ဖြစ်ခဲ့ရသူ

ဇွန် ၁၉၊ ၂၀၁၆
M-Media

– ၎င်းတို့၏ လူ့အခွင့်အရေးများအတွက် အမြဲလိုလို ကာကွယ်ပြောကြားကာ မားမားမတ်မတ် ရပ်တည်ပေးနေသော ဗြိတိန် လွှတ်တော်အမတ် ဂျိုးကော့စ် အသတ်ခံရမှုက ဗြိတိန်ရှိ လူနည်းစုများကို တုန်လှုပ်ခြောက်ခြားစေကာ ပူဆွေးသောက ရောက်စေခဲ့သည်။

နှစ်ပေါင်း ၂၀ အတွင်း လွှတ်တော်အမတ်တစ်ယောက် ပထမဆုံး လုပ်ကြံခံရခဲ့သည့် ထိုအဖြစ်အပျက်တွက် ဗြိတိန်တစ်နိုင်ငံလုံးကလည်း ယူကြုံးမရ ဖြစ်ကြရသည်။ အသက် ၄၁ နှစ်အရွယ်ရှိ ဂျိုးကော့စ်မှာ ကလေးနှစ်ယောက်မိခင်ဖြစ်ပြီး ဆီးရီးယား ဒုက္ခသည်များမှသည် ပါလက်စတိုင်းအရေး တက်ကြွလှုပ်ရှားသူများအထိ သူမနှင့်အတူ အလုပ်တွဲလုပ်ခဲ့သော အသင်းအဖွဲ့များက သူမ၏ အနစ်နာခံ ဆောက်ရွက်ခဲ့မှုများအတွက် ချီးကျူးဂုဏ်ပြုခဲ့ကြလေသည်။

ဘတ်တလေနှင့် စပန်ဒေသ၏ လေဘာပါတီ လွှတ်တော်အမတ်ဖြစ်သူ ကော့စ်မှာ ကြာသာပတေးနေ့က သူမ၏ မဲဆန္ဒနယ်ဖြစ်သော ၀က်စ်ရှိုင်းယားရွာရှိ ဘီရ်စတောလ်ရပ်ကွက်တွင် ဓား၊ သေနတ်တို့ဖြင့် လုပ်ကြံခံခဲ့ရသည်။ ထိုနေရာက သူမမွေးဖွားရာဒေသနှင့် ၅ မိုင်ပျော့ပျော့သာ ဝေးလေသည်။

နိုင်ငံရေးသမားဘ၀တွင် ကော့စ်က မတူကွဲပြားစွာညီညွတ်ရေး၊ ဆီးရီးယားပဋိပက္ခဒဏ် ခံစားရသူများအရေး၊ ကလေးဒုက္ခသည်များအရေး၊ ဂါဇာကမ်းမြှောင်အား အစ္စရေးက ပိတ်ဆို့ထားမှုကြောင့် အတိဒုက္ခရောက်နေကြသော ပါလက်စတိုင်းပြည်သူများအရေးနှင့် အစ္စလာမ်ကြောက်ရောဂါဒဏ် ခံစားနေရသည့် မွတ်စလင်များအရေး စသည်တို့အတွက် လှုပ်ရှားဆောင်ရွက်ခဲ့လေသည်။

“သူမဟာ နာမည်မကြီးပေမယ့် သြဇာကြီးသူတစ်ယောက်ပါ။ သူရဲ့အသက်ရှင်သန်မှုက ညီညွတ်ရေး ဖြစ်စေခဲ့သလို၊ သူ့ရဲ့ သေဆုံးမှုကလည်း ညီညွတ်ရေးကို ဖြစ်စေတာပါပဲ” ဟု ကော့စ်၏ မဲဆန္ဒနယ်အတွင်းရှိ အိန္ဒိယ ဂူဂျာရတ်နယ်ဖွားများ လူ့အဖွဲ့အစည်းနှင့် နှီးနွယ်ပတ်သက်နေသူ ရှေ့နေ ရာဇီယာ ဂျိုဂီက ပြောကြားခဲ့သည်။

သောကြာနေ့ညနေပိုင်းက အင်္ဂလန်မြောက်ပိုင်းရှိ မြို့ငယ်လေးတစ်မြို့တွင် ပြုလုပ်ခဲ့သည့် ဂျိုးကော့စ်အတွက် အောက်မေ့ဖွယ်အခမ်းအနားကို တက်ရောက်သူများတွင် ဂျိုဂီလည်း ပါဝင်ခဲ့သည်။

“သူဟာ လူကြိုက်မများတဲ့ ကိစ္စတွေ၊ လူတွေက လက်မထည့်ချင်ကြတဲ့ ကိစ္စတွေကို ခေါင်းခံဖြေရှင်း ဆောင်ရွက်ပေးသူလည်းဖြစ်ပါတယ်”

လူ့အဖွဲ့အစည်းများအား ပေါင်းကူးပေးသူ

အဆိုပါ အောက်မေ့ဖွယ်အခမ်းအနားကို အိန္ဒိယမွတ်စလင်လူမှုဖူလှုံရေးအသင်းတွင် ပြုလုပ်ခဲ့ပြီး ဘာသာပေါင်းစုံ၊ လူ့အဖွဲ့အစည်းပေါင်းစံမှာ လူပေါင်းရာချီ၍ တက်ရောက်ခဲ့ကြသည်။

ကွန်ဆာဗေးတစ်နိုင်ငံရေးသမားဖြစ်သူ ဆိုက်ယီဒါ ၀ါဆီက ကော့စ်မှာ “နှုတ်ဆိတ်နေရသူများ၏ အသံ” “အမုန်းခံရသူများ၏ မျှော်လင့်ချက်” ဖြစ်ပြီး သူမဦးဆောင်လှုပ်ရှားခဲ့သည့် ကိစ္စများအတွက် ပါတီ၏ ကန့်သတ်မှုဘောင်ကို ကျော်လွန်၍ပင် ဆောင်ရွက်ပေးလေ့ရှိခဲ့သည်ဟု ၎င်း၏ အောက်မေ့ဖွယ်မိန့်ခွန်းတွင် ထည့်သွင်းပြောကြားခဲ့သည်။

“ဒေသတွင်းနဲ့ ဒေသပြင်ပက အစီအစဉ်တွေ၊ စီမံကိန်းတွေမှာ ကျွန်တော်ဟာ ဂျိုးနဲ့ နီးနီးကပ်ကပ် အလုပ်လုပ်ဖူးပါတယ်။ သူဟာ လူ့အဖွဲ့အစည်းမှာ ထင်ရှားသူတစ်ယောက်ပါ။ လှုပ်ရှားမှုတွေကို တတ်နိုင်သလောက် သွားရောက်ပါဝင်ဖို့ကို သူ့ရဲ့ အဓိကလုပ်ရမယ့်ကိစ္စအနေနဲ့ သတ်မှတ်ထားပါတယ်” ဟု ဘတ်လေတွင် လူငယ်အဖွဲ့များနှင့် အောက်ခြေလုပ်ငန်းအဖွဲ့များစွာကို ဦးစီးလုပ်ဆောင်နေသူ အဘ်ဒူလ် ၀ါဂျစ်ဒ်က ပြောကြားခဲ့သည်။

ဝါဂျစ်ဒ်မှာ ဒေသတွင်း ထင်ရှားသည့် စိတ်ပညာရှင်တစ်ယောက်လည်းဖြစ်သည်။

“သူမဟာ ပေါင်းလို့သင်းလို့ကောင်းတယ်။ ပွင့်လင်းတယ်။ ပြီးတော့ နားလည်ခံစားပေးနိုင်သူလည်း ဖြစ်ပါတယ်။ သူနဲ့ သဘောထားချင်း မတိုင်ဆိုင်ရင်တောင်မှ စိတ်ရှည်လက်ရှည်နားထောင်ပေးပါတယ်”

ကော့စ်မှာ လူ့အဖွဲ့အစည်းများကြား ပေါင်းကူးပေးမှုကို အဓိကအာရုံစိုက်လုပ်ဆောင်ကာ၊ ဘတ်တလေဒေသတွင်း အကြမ်းဖက်သံသယဖြင့် ဖမ်းဆီးမှုတစ်ချို့ ပြုလုပ်ခဲ့ပြီးနောက် ဒေသအား အကြမ်းဖက်ဝါဒဖောက်ဖွားရာဖြစ်သည်ဆိုသော ထင်မြင်ယူဆချက်များကို ချေဖျက်ရန် နှစ်မြှုပ်လုပ်ဆောင်နေသူတစ်ဦး ဖြစ်သည်ဟုလည်း ၀ါဂျစ်ဒ်က ပြောကြားခဲ့သည်။

နိုင်ငံသားကောင်းတစ်ယောက် ဆုံးရှုံးမှုအတွက် နိုင်ငံသားတိုင်းက ပူဆွေးဝမ်းနည်းနေကြချိန် ကော့စ်အား သတ်ဖြတ်ခဲ့သူ အသက် ၅၂ နှစ်အရွယ် သောမက်စ် မာအီရ်ကို တရားရုံးတွင် နာမည်မေးသည့်အခါ “ငါ့နာမည်က သစ္စာဖောက်တွေရဲ့ သေမင်းကွ။ ဗြိတိန် လွတ်မြောက်ပါစေ” ဟု ဖြေကြားခဲ့သည်။

ကော့စ်အား သတ်ဖြတ်သည့်အချိန်တွင် ၎င်းက Britain First ဟု ဟစ်ကြွေးခဲ့ကြောင်း သတင်းများက ဖော်ပြကြသည်။ Britain First ဆိုသည်မှာ အင်္ဂလန်ရှိ လက်ယာစွန်းရောက် အဖွဲ့အစည်းတစ်ခုဖြစ်ပြီး “စည်းရိုးထိုးအဖွဲ့” ဟု ၎င်းတို့ကိုယ်ကို သမုတ်ထားသည်။

ကော့စ်၏ နောက်ဆုံး စည်းရုံးလှုပ်ရှားမှုများထဲမှ တစ်ခုမှာ ဗြိတိန်အနေဖြင့် ဥရောပသမဂ္ဂမှ မထွက်ရေးဖြစ်သည်။ သူမကတော့ ဇွန်လ ၂၃ ရက်နေ့တွင် ပြုလုပ်မည့် ဥရောပသမဂ္ဂမှ ထွက်ရေး၊ မထွက်ရေး လူထုဆန္ဒခံယူပွဲမတိုင်မီ တစ်ပတ်အလိုတွင် အသတ်ခံခဲ့ရသည်။

“သူက လက်ယာစွန်းရောက် အကြမ်းဖက်ဝါဒကို ဆန့်ကျင်သူပါ။ နောက်ပြီး အစိုးရရဲ့ အကြမ်းဖက် တန်ပြန်တန်ဖျက်ရေး မဟာဗျူဟာဖြစ်တဲ့ Prevent ဟာ အစ္စလာမ့်မစ်အကြမ်းဖက်ဝါဒလို့ သမုတ်ခံထားရတဲ့ ကိစ္စကိုသာ အာရုံစိုက်လုပ်ဆောင်တာဖြစ်ပြီး လူ့အဖွဲ့အစည်းမှာ သင်းကွဲစေတယ်လို့ ထင်မြင်ယူဆထားသူလည်း ဖြစ်ပါတယ်” ဟု ၀ါဂျစ်ဒ်က ထပ်လောင်းပြောကြားခဲ့သည်။

ကမ္ဘာလုံးဆိုင်ရာ ပြဿနာ

သူမ မကွယ်လွန်ခင် ၂ လအရင် ဧပြီလက ကော့စ်မှာ ဗြိတိန်လွှတ်တော်တွင် ဆီးရီးယားအရေးနှင့်ပတ်သက်၍ ဂရုဏာသက်ဖွယ်ကောင်းသည့် မိန့်ခွန်းတစ်ခုကို ပြောကြားခဲ့ပြီး ဗြိတိန်အစိုးရနေဖြင့် ကလေးဒုက္ခသည်များကို လက်ခံရန် တိုက်တွန်းခဲ့သည်။

“ဘယ်ကလေးမျိုးမှ မကြုံတွေခဲ့ရဘူးတဲ့ အခြေအနေမျိုးတွေကို အဲဒီကလေးတွေက တွေ့ကြုံခံစားနေရပါတယ်။ ပြီးတော့ ကျွန်မရဲ့ သားသမီးရတနာလေး ၂ ယောက်သာ ဒီလိုကြုံတွေ့ရမယ်ဆိုရင် အဲဒီငရဲတွင်းထဲကနေ သူတို့လေးတွေကို ဆွဲထုတ်ဖို့ ကျွန်မ အသက်စွန့်ရလည်း မမှုပါဘူး” ဟု ကော့စ်က ပြောကြားခဲ့သည်။

‘ယော့ခ်ရှိုင်းယား ဆီးရီးယားအသင်း’ က ကော့စ်မှာ ဆီးရီးယားပြည်သူများ၏ ဒုက္ခသုက္ခများကို မီးမောင်းထိုးပြသော လွှတ်တော်အမတ် အနည်းငယ်ထဲမှ တစ်ဦးဖြစ်သည်ဟု ပြောကြားခဲ့သည်။

“သူမဟာ လေယာဉ်မပျံသန်းရဇုန် သတ်မှတ်ပေးဖို့ ဆော်သြခဲ့သူဖြစ်ပြီး၊ ဆီးရီးယားသမ္မတ ဘာရှာ အလ်အာဆဒ်ကို ဆန့်ကျင်တဲ့ဘက်မှာ ခိုင်မာစွာရပ်တည်ဖို့ ဗြိတိန်အစိုးရကိုလည်း တိုက်တွန်းခဲ့သူပါ။ ပြီးတော့ ခိုကိုးရာမဲ့ ကလေးဒုက္ခသည်တွေကို ထောက်ပံ့အားပေးဖို့၊ ဆီးရီးယားက အ၀ိုင်းခံထားရတဲ့ဒေသတွေမှာ လေကြောင်းကနေ အကူအညီတွေ ချပေးဖို့ ပါလီမန်မှာ စည်းရုံးလှုံ့ဆော်မှုတွေလည်း ပြုလုပ်ခဲ့ပါတယ်” ဟု အသင်း၏ ပြောရေးဆိုခွင့်ရှိသူ ဇာကီ ကဖ် အလ်-ဂါဇာလ်က ပြောကြားခဲ့သည်။

“သူဟာ မျက်နှာမြင်ချင်ခင်ပါစေဆိုတဲ့ ဆုတောင်းနဲ့ ပြည့်သူတစ်ယောက်ပါ။ သူမရဲ့ ပြောင်မြောက်တဲ့ လူသားဆန်မှုကိုလည်း တစ်သက်လုံး အမှတ်ရနေကြမှာပါ။ ဂျိုးဟာ ကြီးကျယ်တဲ့ သမိုင်းကောင်းတစ်ခုကို ထားသွားခဲ့ပြီး၊ ဘယ်တော့မှ အမေ့ခံရမယ့် လူမျိုးလည်း မဟုတ်ပါဘူး”

ကော့စ်မှာ ဗြိတိန်ပါလီမန်ရှိ ပါလက်စတိုင်းအရေး ဆောင်ရွက်နေသော အဖွဲ့များတွင် တက်ကြွစွာ ပါဝင်ဆောင်ရွက်နေသူဖြစ်သည်ဟု သူမ၏ ၀ဘ်ဆိုက်တွင် ဖော်ပြထားမှုအရ သိရသည်။

“အခမ်းအနားတော်တော်များများမှာ ကျွန်တော်ဟာ ဒီကိစ္စအတွက် သူနဲ့ မျှဝေပြောကြားခွင့် ရခဲ့ပါတယ်။ သူမဟာ ပါလက်စတိုင်းအတွက် ဂရုဏာအပြည့်နဲ့ ဆောင်ရွက်နေသူတစ်ယာက်ပါ။ ပါလက်စတိုင်း ကလေးငယ်တွေ ဖမ်းဆီးခံရတာ၊ ဂါဇာကမ်းမြှောင် ပိတ်ဆို့ခံရတာ၊ အစ္စရေးကို သပိတ်မှောက်ခွင့်၊ အခြားကိစ္စတော်တော်များများနဲ့ ပတ်သက်ပြီးလည်း ထောက်ပြဝေဖန်မှုတွေ ပြုလုပ်ခဲ့ပါတယ်” ဟု ပါလက်စတိုင်း သွေးစည်းညီညွတ်ရေးလှုပ်ရှားမှုအဖွဲ့၏ ဥက္ကဌဖြစ်သူ ဟုဂ်ျ လန်နင်းက ပြောကြားခဲ့လေသည်။

“သူမ အသတ်ခံရမှုဟာ သူမရဲ့ မိသားစုနဲ့ သူငယ်ချင်းမိတ်ဆွေအတွက်သာမက သူမ တက်ကြွလှုပ်ရှားစွာ ဆောင်ရွက်နေတဲ့ ကိစ္စတွေအတွက် အစားထိုးမရတဲ့ ဆုံးရှုံးမှုပါပဲ။ သူဟာ လူတိုင်း လွမ်းဆွတ်သတိရနေမယ့် ကြယ်တစ်ပွင့်ပါ”

ဗြိတိန်မွတ်စလင်ကောင်စီအကြီးအကဲ ရှူဂျာ ရှာဖီကတော့ ကော့စ်၏ လှုပ်ရှားဆောင်ရွက်မှုများက “ပြည်တွင်းနှင့် ပြည်ပရှိ ပြည်သူမြောက်များစွာအတွက် အပြုသဘောဆောင်သည့် သက်ရောက်မှုများ ရှိခဲ့သည်” ဟု မှတ်ချက်ပြုခဲ့လေသည်။

Ref: Aljazeera

(Aljazeera တွင် ဖော်ထြားသည့် Jo Cox: Minority communities pay tribute to slain UK MP ဆောင်းပါးကို လေးမောင်မှ ဆီလျေ်ာအောင် ဘာသာပြန်ဆိုသည်။)