ဆင်းတုတော် မှုတ်ဆေးဖြင့် မှုတ်သူ ကလေး(၃)ဦး ပြစ်ဒဏ် ၂ နှစ်ကို နေ့ချင်းအမိန့်ချ

ဓါတ်ပုံ-အင်တာနက်

ဇွန် ၂၁ ၊၂၀၁၆
M-Media
သီဟ
.
ဗုဒ္ဓရုပ်ပွားတော်နှင့် ရဟန္တာရုပ်တုများကို မှုတ်ဆေးဖြင့် ပတ်ဖြန်းခဲ့သည့် ကလေး(၃) ဦးကို ပြစ်ဒဏ် ၂ နှစ် စီ ချမှတ်လိုက်ပြီး လူငယ် သင်တန်းကျောင်း ပို့ဆောင်ရန် အမိန်ချမှတ်လိုက်ကြောင်း သိရှိရသည်။
.
ဖြစ်စဉ်မှာ ဇွန်လ ၁၇ ရက်နေ့က ရှမ်းပြည်နယ် မြောက်ပိုင်း လားရှိုးမြို့က အမှတ်(၉) ရပ်ကွက် ၊ အရှေ့ခါးရိုး ဘုန်းတော်ကြီး ကျောင်းတိုက်ဝင်းရှိ  ဗုဒ္ဓရုပ်ပွားတော်နှင့် ရဟန္တာရုပ်တုများကို အသက် ၁၂ နှစ် ၊ ၁၃ နှစ်၊ ၁၄ နှစ် အရွယ် ကလေး ၃ ဦးမှ  အနီရောင်မှုတ်ဆေးများဖြင့် ပတ်ဖြန်းပြီး နံရံများတွင် ၄င်းတို့၏ အမည်များကိုပါ ရေးဖြန်းခဲ့သည်။
.
၎င်းဖြစ်စဉ်အတွက် အဆိုပါကလေး ၃ ဦးကို ဖမ်းဆီးပြီး ပြစ်မှုဆိုင်ရာဥပဒေ ပုဒ်မ ၂၉၅(က) ဖြင့် တရားစွဲဆို၍ ဇွန်လ ၂၀ ရက်နေ့တွင် တရားရုံးတင်ကာ နေ့ချင်းပြီး အမိန့်ချခဲ့ခြင်းဖြစ်သည်။
.
ယခု ဖြစ်စဉ်နှင့် ပတ်သက်ပြီး  လားရှိုးမှ မြို့မိမြို့ဖ တဦးက ” ကလေးတွေဖြောင့်ချက်ပေးချက်အရ ရည်ရွယ်ချက်ရှိရှိ လုပ်ဆောင်ခဲ့တာ မဟုတ်ဘူးဆိုတာ ပြောလို့ရကြောင်း၊  ကလေး သဘာဝ စိတ်ရူးပေါက်ပြီး လက်ဆော့တာ ဖြစ်နိုင်ကြောင်း၊ ယခု ဖြစ်စဉ် နဲ့ ပတ်သက်ပြီး ပြစ်ဒဏ်မှာ အမြင့်ဆုံးဖြစ်ပြီး ပြင်းထန်လွန်း၍ မိမိတို့ စိတ်မကောင်းဖြစ်ရကြောင်း၊ ယခုကဲ့သို့ ရုံးတင်တဲ့ နေမှာတင် နေ့ချင်းပြီး အမိန့်ချတဲ့အတွက် အံသြမိကြောင်း ” M-Media ကို ပြောကြားခဲ့ပါသည်။
.
ပြစ်မှုဆိုင်ရာဥပဒေ (ယခင် ရာဇသတ်ကြီး) အခန်း ၁၅ ဘာသာသာသနာဆိုင်ရာပြစ်မှုများတွင် ပုဒ်မ ၂၉၅-က ကို အောက်ပါ အတိုင်း ပြဌာန်းထားပါသည်။
.
လူတစားကိုးကွယ်သည့် ဘာသာ သာသနာကိုဖြစ်စေ၊ ဘာသာရေးယုံကြည်မှုကိုဖြစ်စေ၊ စော်ကားခြင်းဖြင့်၊ ထိုလူတစား၏ ကိုးကွယ်ရာဘာသာရေး စိတ်ဓာတ်ကို နာကြည်းစေရန် ကြံရွယ်၍ မသမာစိတ်ဖြင့် တမင်ကျူးလွန်သောပြုလုပ်မှုများ။
.
ပြည်ထောင်စုနိုင်ငံတော်တွင် နေထိုင်သော လူတစား၏ ဘာသာရေးစိတ်ကို နာကြည်းစေ ရန် တမင်မသမာသောအကြံဖြင့် မည်သူမဆို၊ စကားဖြင့်ဖြစ်စေ၊ စာဖြင့်ဖြစ်စေ၊ ထင်ရှားသော ပုံသဏ္ဍာန်ဖြင့်ဖြစ်စေ၊ ထိုလူတစားကိုးကွယ်သည့် ဘာသာသာသနာကိုသော်၎င်း၊ ဘာသာ သာသနာရေးယုံကြည်မှုကိုသော်၎င်း၊ စော်ကားလျှင်၊ သို့တည်းမဟုတ် စော်ကားရန်အား ထုတ်လျှင်၊ ထိုသူကို နှစ်နှစ်ထိထောင်ဒဏ် တမျိုးမျိုးဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည်။