ပါလက်စတိုင်းပိုင်နက်တွင် အစ္စရေး၏ပစ်ခတ်မှုကြောင့် လူငယ် ၁ ဦး သေဆုံး

ဇွန် ၂၂၊ ၂၀၁၆
M-Media

– ပါလက်စတိုင်းပိုင် အနောက်ဘက်ကမ်းကို ကျူးကျော်ဝင်ရောက်လာတဲ့ အစ္စရေးမော်တော်ယာဉ်တွေကို ကျောက်တုံးတွေနဲ့ပစ်ပေါက်တဲ့အပေါ် သေနတ်နဲ့ပြန်လည်ပစ်ခတ်ရာမှာ ပါလက်စတိုင်း ဆယ်ကျော်သက်လူငယ်တစ်ဦး မတော်တဆ သေဆုံးသွားတယ်လို့ အစ္စရေးစစ်တပ်က ပြောကြားခဲ့ပါတယ်။

အဲဒီ သေဆုံးသူဟာ ကျောက်တုံးနဲ့ပစ်ပေါက်မှုမှာ ပါဝင်သူလို့ စောစောပိုင်းက စစ်တပ်ကနေထုတ်ပြန်တဲ့ ကြေညာချက်မှာ ဖော်ပြခဲ့ပါတယ်။ ကျေးရွာအုပ်ချုပ်ရေးမှူးကတော့ ထိုလူငယ်လေးဟာ အသက် ၁၅ နှစ်ရှိပြီး မာမွတ် ဘာဒရန်လို့ အမည်ရတယ်လို့ ဆိုပါတယ်။

ပါလက်စတိုင်းကျေးရွာ ဘီအစ် အိုရီ တဟ်တာရဲ့ ဒေသကောင်စီဥက္ကဌဖြစ်သူ အဘ်ဒူလ် ကရင်မ် ကာဆင်က လူငယ်လေးဟာ ရွာအနီးရေကန်တစ်ခုကနေ ပြန်လာတဲ့အခါ အစ္စရေးစစ်တပ်က သေနတ်တွေနဲ့ ပစ်ခတ်နေတာကြောင့် အခြားသော ခရီးသည်တွေနဲ့အတူ ဘတ်စ်ကားတစ်ခုအတွင်းမှာ ရှိနေချိန် ပစ်ခတ်သတ်ဖြတ်ခံလိုက်ရတာလို့ ပြောကြားခဲ့ပါတယ်။

နောက်ထပ် ပါလက်စတိုင်းပြည်သူတစ်ဦးလည်း အစ္စရေးစစ်တပ်ရဲ့ပစ်ခတ်မှုကြောင့် ဒဏ်ရာရရှိခဲ့ပြီး အနောက်ဘက်ကမ်း ရာမာလာရှိ ဆေးရုံတစ်ခုကို ပို့ဆောင်ပေးခဲ့ရပါတယ်။

အစ္စရေးစစ်တပ်ကတော့ ပါလက်စတိုင်းတွေဟာ သူတို့ရဲ့ မော်တော်ယာဉ်တွေကို ကျောက်တုံးတွေ၊ ဓာတ်ဆီဗုံးတွေနဲ့ ပစ်ပေါက်ခဲ့တယ်လို့ ကြေငြာချက်မှာ ထည့်သွင်းဖော်ပြခဲ့ပါတယ်။

Ref: Aljazeera