” ဒီမိုကရေစီ အစိုးရလက်ထက် ပထမဆုံး ဖျက်ခံရတော့မည့် ဖားကန့်က ဘာသာရေးဝတ်ပြုဆောင်”

ဇွန် ၂၂၊ ၂၀၁၆
M-Media
ဖြူလေး

ဖားကန့်။    ။ ကချင်ပြည်နယ် ဖားကန့်မြို့နယ်၊ လုံးခင်းကျေးရွာ အုပ်စု၊ လယ်ပြင်ကျေးရွာရှိ အစ္စလာမ်ဘာသာရေးဝတ်ပြုကျောင်းကို ဇွန်လ ၃၀ ရက်နေ့ နောက်ဆုံးထား ဖျက်သိမ်းပေးရမယ်လို့ သက်ဆိုင်ရာဒေသ အာဏာပိုင်များက ဆိုခဲ့ပါတယ်။

လုံးခင်း-လယ်ပြင် တံတားတည်ဆောက်ရာတွင် လုံခင်းအစ္စလာမ်ဘာသာရေး ဝတ်ပြုဆောင်မှ ပိုင်ဆိုင်သော မြေနေရာ အနည်းငယ် ပါဝင်ခဲ့ပါတယ်။ တံတားဆောက်ဖို့ ပေးခဲ့တဲ့ မြေနေရာအတွက်လည်း သက်ဆိုင်ရမှာ လျော်ကြေးငွေ ယူခဲ့ခြင်းမရှိကြောင်း သိရှိရပါတယ်။   ထို့အပြင် ဒေသခံရွာပိုင်မြေများလည်း ပါဝင်ခဲ့ကြောင်း သိရပါတယ်။ တံတားဆောက်လုပ်ချိန်တွင် ပစ္စည်းများသိမ်းဆည်းရန် လုံးခင်းဗလီတွင်း ဂိုထောင်ဆောက်လုပ်ခဲ့ပြီး အနီးနားမှာရှိတဲ့ ဘုန်းတော်ကြီးကျောင်းတစ်ခုမှာလည်း ဂိုထောင်တစ်ခု ဆောက်လုပ်ခဲ့တယ်လို့ သိရပါတယ်။ တံတားဆောက်ပြီးစီးသွားတဲ့အခါမှာ ထိုအဆောက်အအုံများကို ဒီတိုင်းထားပေးခဲ့ကြောင်း ဒေသခံတစ်ဦးက ဆိုပါတယ်။

“ကျွန်တော်တို့ ဗလီနေရာက တံတားနဲ့လည်း နီးသွားတော့ နေရာကောင်းလည်း ဖြစ်သွားတယ်။ ဗလီထဲက အဆောက်အဦးတွေကို ခိုးဆောက်ထားတယ်ပြောတယ်။ အဲ့ဒီတံတာားဆောက်တုန်းက အဆောက်အအုံကို ဒီတိုင်းထားပေးခဲ့တာ၊  တစ်ခုက ဘိလပ်မြေတွေထားဖို့၊ နောက်တစ်ခုက အလုပ်သမား မိသားစုတွေ ခဏနေဖို့ဆိုပြီး အဆောက်ဦး နှစ်ခု ဆောက်ပြီး ထားသွားတာ အုပ်ချုပ်ရေးမှူးတွေလည်း သိတယ်။ သူတို့က ဖျက်ပေးဆိုတော့ ကျွန်တော်တို့ ပြသာနာ မတက်ချင်လို့ ဖျက်ပေးလိုက်တယ်။ နောက် ထပ်တောင်းဆိုလာတယ်။ ဗလီဆရာနေတဲ့အိမ်ပါ ဖျက်ပေးရမယ်ပြောတယ်။ ဗလီဆရာ အိမ်ရှိလာတာက နှစ်ပေါင်း (၂၀) ကျော်ပြီ။ ဒါလည်း ကျွန်တော်တို့ ပြသာနာမတက်ချင်လို့ ဖျက်ပေးလိုက်တယ်။ ခုဟာက ပိုဆိုးလာပြီ။ ဝတ်ပြုဆောင်ကိုပါ ထပ်ဖျက်ခိုင်းနေတယ်။ အဲ့ဒါတော့ အရမ်းလွန်သွားပြီ။ ကျွန်တော်တို့ကတော့ ဝတ်ပြုဆောင်ကို ဘယ်တော့မှ ကိုယ်တိုင်ဖျက်မှာ မဟုတ်ဘူး ။ မဖြစ်မနေ ဖျက်ရမယ်ဆိုရင်လည်း ဖျက်ချင်တဲ့သူတွေပဲ လာဖျက်ပါစေတော့” လို့ ဒေသခံတစ်ဦးက အဖြစ်အပျက်များကို ပြောဆိုခဲ့ပါတယ်။

ဇွန်လ ၂၀ ရက်နေ့ နေ့လည်ပိုင်းကလည်း လုံးခင်းဝတ်ပြုကျောင်းကို ဖျက်ရန်အတွက် လာရောက်သူများကို ဒေသခံများက တားဆီးခဲ့ကြကြောင်း သိရပါတယ်။ ဝတ်ပြုကျောင်းကို ဖျက်ဆီးရန်အတွက် လာရောက်ကြသူများမှာလည်း ဒေသခံမဟုတ်သူများနှင့် သံဃာတော်များ ပါဝင်ခဲ့ကြောင်း မျက်မြင် ဒေသခံတစ်ဦးက ပြောပါတယ်။

ဇွန်လ ၃၀ ရက်နေ့ နောက်ဆုံးထား ဖျက်သိမ်းပေးရမည့် လုံးခင်းအစ္စလာမ်ဘာသာရေးဝတ်ပြုကျောင်း ကိစ္စတွင် ဗလီဝတ်ကျောင်းတော်မှ ဂေါပကလူကြီးများ သက်ဆိုင်ရာဒေသ အုပ်ချုပ်သူများနှင့် သွားရောက်တွေ့ဆုံ ဆွေးနွေးခဲ့သော်လည်း ဝတ်ပြုဆောင်ကိုသာ အမြန်ဆုံး ဖျက်ပေးရန် ဖိအားပေးခဲ့ကြောင်း သိရပါတယ်။

အဆိုပါ ၀တ်ပြုဆောင်မြေနေရာမှာ ဒေသခံဖြစ်သူဦးရဲမောင်မှ ၁၉၉၀ခုနှစ် မတိုင်ခင်ကတည်း လှူဒါန်းခဲ့ခြင်းဖြစ်ပြီး ဝတ်ပြုဆောင်မှာလည်း တရားဝင် ဆောက်လုပ်ခဲ့ခြင်းဖြစ်ကြောင်း သိရှိရပါတယ်။

၂၀၁၅ နိုဝင်ဘာရွေးကောက်ပွဲ အပြီး ပြည်သူ့ဆန္ဒဖြင့် ဒီမိုကရေစီ နည်းကျရွေးချယ်၍ အစိုးရဖြစ်လာသော ဒေါ်အောဆန်းစုကြည် ဦးဆောင်သည့် NLD အစိုးရလက်ထက်တွင် ကရင်ပြည်နယ် အတွင်း ခရစ်ယာန်ဘာသာဝင်များ၏ ဘုရားရှစ်ခိုးကျောင်းဝင်းအတွင်း နှင့် အစ္စလာမ်ဘာသာဝင်တို့၏ ဗလီဝတ်ကျောင်းဘေး လမ်းအလယ်၌ မြိုင်ကြီးငူဆရာတော်မှ စေတီများ တည်ခြင်းများဖြစ်ပွားခဲ့သော်လည်း သက်ဆိုင်ရာ သာသနာရေးဝန်ကြီးဌာနနှင့် သံဃာနာယက အဖွဲ့တို့မှ တားဆီးကာကွယ်ပေးနိုင်ခဲ့ခြင်းမရှိပေ။

ယခု လုံးခင်းကျေးရွာမှ နှစ်ပေါင်း ၂၀ ကျော် တရားဝင် တည်ရှိပြီးခဲ့ပြီးဖြစ်တဲ့ အစ္စလာမ်ဘာသာရေး ဝတ်ပြုဆောင်ငယ်အား ဖျက်သိမ်းဖို့ လုပ်ဆောင်နေမှု အား သက်ဆိုင်ရာ ပြည်နယ်အစိုးရနှင့် သာသနာရေး ဝန်ကြိးဌာနတို့မှ တစုံတရာ ဝင်ရောက်ဖြေရှင်းပေးခြင်း မရှိသေးကြောင်း သိရှိရပါတယ်။