ဟန်ဂေရီနိုင်ပွဲမှာ မိမိ၏ နိုင်ငံအတွက် အကောင်းဆုံးစွမ်းဆောင်ရည်ဟု ဟာဇာ့ဒ်ပြော

ဇွန် ၂၇၊ ၂၀၁၆
M-Media

– ယနေ့မနက်က ကစားခဲ့သည့် ဟန်ဂေရီအား အနိုင်ရခဲ့သည့်ပွဲမှာ နိုင်ငံအသင်းအတွက် မိမိပြသခဲ့သည့် အကောင်းဆုံး စွမ်းဆောင်ရည်ဖြစ်သည်ဟု ဘယ်လ်ဂျီယံ အသင်းခေါင်းဆောင် အေဒင် ဟာဇာ့ဒ်က ပြောကြားလိုက်သည်။

ဘယ်လ်ဂျီယံက ၄ ဂိုးပြတ်ဖြင့် အနိုင်ရရှိခဲ့သည့် အဆိုပါ ယူရို ၁၆ သင်းအဆင့် ရှုံးထွက်ပွဲတွင် ဟာဇာ့ဒ်မှာ တစ်ကိုတော် ထိုးဖောက်မှုဖြင့် ၁ ဂိုး သွင်းယူနိုင်ခဲ့ပြီး အသင်းဖော် မီချေး ဘတ်ရှာယီ သွင်းယူသောဂိုးကိုလည်း ဖန်တီးပေးခဲ့သည်။ ဟာဇာ့ဒ်မှာ အသင်းဖော်များအတွက် ထိုပွဲတွင် စုစုပေါင်း အခွင့်အရေး ၄ ကြိမ် ဖန်တီးပေးနိုင်ခဲ့သည်။

ထိုပွဲမှာ ၎င်း၏ ဘယ်လ်ဂျီယံနှင့် အကောင်းဆုံး စွမ်းဆောင်ရည်လားဟု မေးမြန်းရာတွင် ဟာဇာ့ဒ်က

“ဟုတ်ပါတယ်။ ကျွန်တော် နိုင်လိုစိတ်တော်တော်များများ ရှိခဲ့တယ်။ ကျွန်တော်တို့ဟာ ဂိုးတွေသွင်းယူနိုင်ခဲ့သလို၊ အခွင့် အရေးတွေလည်း ဖန်တီးနိုင်ခဲ့ပါတယ်။ ဂိုးသမား သီဘောက် ကော်တိုအစ်ကလည်း ဂိုးမပေးရတဲ့မှတ်တမ်းကို ရရှိခဲ့ပြီး အင်မတန်ကောင်းမွန်တဲ့ ညနေခင်းလေးပါပဲ။ အကောင်းဆုံးပြိုင်ဘက် မဖြစ်နိုင်ပေမယ့် ဟန်ဂေရီဟာ ကစားဖို့ခက်တဲ့ အသင်းပါ။ အပြစ်ပြောစရာမရှိအောင် သူတို့ ကောင်းလွန်းတာကြောင့် ကျွန်တော်တို့ စွမ်းဆောင်ရည်ကောင်းဖို့ ကြိုးစားခဲ့ရပါတယ်။ ကောင်းကောင်းလည်း ကစားနိုင်ခဲ့ပါတယ်” ဟု ပြန်လည် ဖြေကြားခဲ့သည်။

ဘယ်လ်ဂျီယံမှာ ကွာတာဖိုင်နယ်တွင် ဝေးလ်အသင်းနှင့် တွေ့ဆုံရမည်ဖြစ်သည်။

Ref: Goal