အမေရိကန်က ဒရုန်းလေယာဉ်ဖြင့်တိုက်ခိုက်မှုကြောင့် အာဖဂန်တွင် အရပ်သားများ သေဆုံး

ဇူလိုင် ၄၊ ၂၀၁၆
M-Media

– အာဖဂန်နစ္စတန်အရှေ့ပိုင်း နန်ဂါဟာဒေသမှာ အမေရိကန်က ပြီးခဲ့တဲ့ရက်ပိုင်းအတွင်း ဒရုန်းလေယာဉ်နဲ့ တိုက်ခိုက်မှုကြောင့် အရပ်သားအများအပြားအပါအ၀င် လူ ၁၄ ဦး အနည်းဆုံး သေဆုံးခဲ့တယ်လို့ သိရပါတယ်။

သေဆုံးသူတွေထဲမှာ တာလီဘန်စစ်သွေးကြွသုံးဦး ပါဝင်ပြီး ကျန်တဲ့သူတွေကတော့ အရပ်သားတွေဖြစ်တယ်လို့ ဒေသတွင်းသတင်းတွေက ဖော်ပြကြပါတယ်။

၂၀၀၁ ခုနှစ်မှာ အမေရိကန်က အာဖဂန်နစ္စတန်ကို ကျူးကျော်တိုက်ခိုက်ခဲ့ပြီးနောက်ပိုင်း အမေရိကန်လျှို့ဝှက်ထောက်လှမ်းရေးအဖွဲ့ CIA က မောင်းသူမဲ့ ဒရုန်းလေယာဉ်တွေကို အသုံးပြုပြီး တိုက်ခိုက်မှုပေါင်း ရာနဲ့ချီ ပြုလုပ်ခဲ့ပါတယ်။

အမေရိကန်ကတော့ အဲဒီတိုက်ခိုက်မှုတွေဟာ အလ်ကိုင်ဒါအဖွဲ့ဝင်တွေနဲ့ တခြား စစ်သွေးကြွတွေကို ပစ်မှတ်ထားတာဖြစ်တယ်လို့ဆိုပေမယ့် ဒေသတာဝန်ရှိသူတွေနဲ့ မျက်မြင်သက်သေတွေက သေဆုံးသူအများစုဟာ အရပ်သားတွေဖြစ်တယ်လို့ ဆိုပါတယ်။ အဲဒီလို ဒရုန်းလေယာဉ်တွေနဲ့ တိုက်ခိုက်မှုတွေကို အမေရိကန်က ပါကစ္စတန်မှာလည်း ပြုလုပ်လေ့ရှိပါတယ်။

အမေရိကန်က ကျူးကျော်တိုက်ခိုက်ပြီးနောက်ပိုင်း အခုအချိန်အထိ အာဖဂန်နစ္စတန်မှာ တည်ငြိမ်မှုမရသေးဘဲ ဗုံးခွဲတိုက်ခိုက်မှုတွေဟာ နေ့စဉ်လိုလို ဖြစ်ပျက်နေပါတယ်။

Ref: Presstv